黃浩然與億萬愛妻結婚21年零緋聞 絕情拒跟女星交換電話防誘惑
51歲的「不老男神」黃浩然入行多年,向來是圈中的頂級「愛妻號」。近日他罕有接受周國豐的YouTube節目《國豐百科》訪問,除了宣傳即將演出的互動舞台劇《平安夜,請勿相信任何人》外,更大方剖白與富貴太太莫家嘉(Kaka)結婚21年來的保鮮秘訣!身處五光十色的娛樂圈,黃浩然直認身邊誘惑不斷,但他卻以極度「絕情」的招數斬斷TVB狂蜂浪蝶。
黃浩然絕情拒交換電話抗誘惑
要在誘惑處處的圈中保持「零緋聞」,黃浩然坦承全靠高度自控並將界線劃得極度清晰,絕不讓花邊新聞拖累事業:「我都好少完咗工作再約出嚟嘅女性朋友,我好深信係:冇嘢做咩約佢出嚟啫?瞓都冇得瞓,唔好搞咁多嘢啦。」 提到昔日效力TVB時如何避開狂蜂浪蝶,他更自爆入台頭五、六年採取極端「絕情」狠招,堅決不與女演員交換電話:「講真我嗰時,喺電視台裡面頭嗰五六年,係冇女性演員有我電話嘅,我唔畀㗎!交換都冇,係好friend嗰啲去到後期我先至會交換電話。」他直言此舉是為免夜長夢多:「好驚嗰啲,半夜兩點send個WhatsApp畀你。你就算冇嘢你都大鑊啦,唔好搞呢啲矛盾啦,我會係咁囉。其實佢半夜搵得我,一係就真係半夜收工想搵人傾吓,一係就真係對我有嘢,唔好搞咁多啦。」從根源杜絕任何惹麻煩的機會,給足太太滿滿安全感!
馬主千金原是不婚族
黃浩然與身家億萬的馬主莫英儒千金莫家嘉,早於2001年拍攝電影《新紮師妹》時因對方任職形象指導而結緣,兩人於2005年拉埋天窗。雖貴為「億萬駙馬爺」,但黃浩然多年來堅持自食其力拚搏養家。他更揭露太太思想前衛,最初竟是不婚主義者:「其實我老婆係話唔使結婚嘅!喺我哋拍拖嘅時候,佢話其實拍拖咪得囉。但係佢知道我諗住、想有小朋友,同埋亦都要同屋企人交代,佢嘅父母,咁咪結婚囉。」他亦深情強調婚姻需要雙方經營:「如果我係諗住古靈精怪、玩玩下,咁做咩要結婚、做咩要束縛呢?既然大家都係有共識想生小朋友,就一定要用努力去維持啦。」
曾患罕見病停工9個月
拚搏背後,黃浩然2014年曾因長期過勞突患罕見免疫系統疾病「貝賽特氏症」,出現喉嚨潰瘍及視力模糊等症狀,被迫停工休養9個月。重提這場大病,他坦言是身體發出的警號:「嗰時我都話:『我冇乜壓力呀,好OK呀!』但係其實個身體話畀你知:『喂你唔得啦,你個炸彈爆啦!』」他更以汽車比喻身體耗損,慶幸三十幾歲便及早發現:「即係你部車,我唔會揸咗三十萬公里先至跪低,你揸咗十幾萬公里就跪,你都仲有得整。同埋康復過程快啲嘛,你年紀太大搞唔掂。」大病過後他學會平衡工作與健康,現時更經常帶着兩名兒子跑步強身健體。