【素食達人】茹素令10年怪病不藥而癒 林雲中赴日鑽研精進料理

撰文:鄧穎琪
出版:更新:

經常感冒、胸口凹陷、呼吸困難、生毒瘡、無法大小二便、肚子脹鼓鼓的……你無法想像,這一切病症霎時出現在一個25歲的年輕人身上。他是林雲中(Jeffrey),本來是個藝人,但大概觀眾對他並不很熟悉,正常的,因為正當他25歲那年從日本留學回港考入無綫藝員訓練班後,滿心歡喜以為銀色旅途即將啟程時,卻忽然染上了怪病,一病便是十年,如今他已經45歲。
攝影:龔嘉盛

人生黃金十年被惡疾纏繞,沒有人敢再起用這位動輒就不舒服的新人開工,而Jeffrey根本無法好好地過每一天,時間表上的日程也盡是睇醫生、食藥、休息……他形容那十年就是不停「尋找隱世醫術」,用錢來買個希望,遺憾的是,從未有一位醫生能準確地告知自己究竟患上了甚麼病,「試過好多方法,醫生不停叫你食抗生素,照呢樣、照嗰樣,照唔到就叫你驗下個腦,總之人生就係抗生素,西藥、中醫、針灸,乜都齊!

林雲中(後排左二)畢業於第12期無綫藝員訓練班,同期還有林遠迎(前排左一)、周家怡(前排左三)及任港秀(前排右四)等。(受訪者提供)
在藝員訓練班實習期間,Jeffrey(左)已獲得演出機會,驟眼看有幾分似當年紅爆的陳曉東。(電視截圖)
我覺得自己死㗎喇!本身都冇話有生命危險,最後就有喇,個肚脹埋出嚟,起晒毒瘡、去唔到大小二便,一去就痛,因為成個身體入面都已經錯晒。

10年來Jeffrey看過無數醫生,甚麼名醫、神醫,他通通去試,惟病情不但沒有好轉,後來更嚴重到只能臥病在床,「我覺得自己死㗎喇!本身都冇話有生命危險,最後就有喇,個肚脹埋出嚟,起晒毒瘡、去唔到大小二便,一去就痛,因為成個身體入面都已經錯晒。」幾近絕望的他,除了睇醫生、還是睇醫生,當中最極端是找了一位內地「神醫」來幫自己「換血」,Jeffrey坦言那是最痛苦的一次,「個頭要剃晒,然後針灸,唔係針咁簡單喎,好似凌遲處死咁,針頭成支箭咁粗!幾千針插入去,由頭頂一路落到屁股,針完你後面,個人已經死咗,冇晒力。佢話要抽走我啲死血,到傷口好返晒又抽前面,話咁樣可以換血,抽到落腳板底都要針!」難道就此便痊癒了?他說:「睇咗5次,全身換晒一次血,但係都冇幫助……」

就在這時候,又冒來了另一個認識自稱少林寺中人的親戚,已「中伏」多次的Jeffrey不敢再抱太大期望,可是除了再孤注一擲,還有其他選擇嗎?「當時梗係去試下啦,唔理喇,都冇得揀,佢話不如你試下食素啦,哦,好囉。」他再一次以為病情從此會有所起色,然而現實不但止沒有,他食完兩星期後更加暈倒了!不過Jeffrey「唔信邪」,繼續試,「我個理念係,你叫我食一段時間,我都會聽足,我相信任何嘢都需要時間,我覺得冇理由會唔得,所以我去研究,諗點樣去食,因為當時對素食冇認識,咪食啲菜呀、菇呀、豆呀……梗係唔夠營養啦!跟住我上網Check,又問啲食素嘅人,嗰刻開始就戒晒所有嘢。」

本來我係一架跑車,已經Total Loss咗㗎喇,去任何一間車房都搞唔掂,但我用素食去將呢架跑車個外殼搞返靚仔,同埋Keep住好嘅生活習慣,等我入面可以繼續去運行、繼續我嘅生活!

原來即使病入膏肓,本身沉溺於夜場,夜夜笙歌兼又煙又酒的Jeffrey都改不了劣根性,身染頑疾期間還是煙不離手,那一夜卻突然決斷到話戒就戒,他如似解釋:「個人未面對過死亡係乜都唔會理,但你面對死亡之後就會覺得:『唔係喎,大佬,死喎!我後生遙遙仲有好多嘢未做㗎嘛,咁樣死咗唔得喎!』於是我就學素食,戒晒所有壞習慣,改善我嘅生活,學好多瑜伽、拉筋,慢慢去改變自己嘅思想同行為。你要恆久咁去排毒,根本唔需要靠任何藥物,靠自己就做得到,我直情係一個人辦!」他坦言自己10年間的醫藥費,湊湊埋埋已夠買兩架「波子」(保時捷跑車),問到當得知原來食素就能治病後,是否覺得自己嘥了很多錢,他卻謂:「調返轉頭講,你未去到咁死,係真係唔會決斷去做咁多嘢,依個都係我小小得著。」

除了明白這個道理,Jeffrey也終於領悟出自己因何而病,原來是因為在日本京都生活時,經常於家人開的餐廳飲酒所致,「我好好酒、又好夜生活,開頭細個就鍾意咗嗰樣嘢,一飲酒生活就唔協調,加上身體個底子又唔好,返香港之後個病就開始發出嚟。」

1995年,在日本留學期間,Jeffrey(左三)亦有擔任模特兒去行Show。(受訪者提供)

患病10年、康復又用了10年,Jeffrey直言現時45歲的自己,正處於人生最顛峰狀態,更打了個譬喻,「本來我係一架跑車,已經Total Loss咗㗎喇,去任何一間車房都搞唔掂,但我就用素食去將呢架跑車個外殼搞返靚仔,同埋Keep住好嘅生活習慣,等我入面可以繼續去運行、繼續我嘅生活,但係當然唔好亂跑。」

他認為茹素最緊要識食,只要集合多種顏色食材,根本無需擔心營養不足,「未食素之前又唔見你諗自己夠唔夠營養,點解食素要諗呢?我當你出去食黑椒雞扒飯,你冇菜,夠唔夠營養吖?唔夠吖嘛!其實最簡單就係你要食多種顏色嘅食物,喺嗰棵植物由葉食到落根,乜都食,咁樣就夠晒所有營養。」當記者叫Jeffrey建議一個自備便當的組合,他就說:「首先我唔會食白飯,白飯啲營養喺外面層殼,即係最好嘅反而畀啲豬食晒,我會食五穀飯、十穀飯或者十六穀飯,然後會用根莖類,例如蓮藕、薯仔整出嚟嘅食物,另外再食番茄、海藻,加個湯,其實已經好足夠。」

用五種顏色嘅蔬菜,再用五種調味同烹調嘅方法,炸、蒸、煮、燒、生(SashImi),依幾種煮法做出嚟嘅料理就係精進料理。
遠赴日本學藝的Jeffrey,能煮出一餐完整的精進料理。(受訪者提供)

直言「食素原來咁堅」的他成為素食者之後,更不斷鑽研日式素食以及「精進料理」,行外人一聽,大概以為「精進料理」就等於「高級料理」,Jeffrey說「精進料理」其實是「懷石料理」的前身,以素食為主。精進料理豐儉由人,日本許多家庭主婦都會做,而Jeffrey則如此為它下定義,看完你便會明白了,「用五種顏色嘅蔬菜,譬如紅、黃、藍、白、黑,再用五種調味同烹調嘅方法,炸、蒸、煮、燒、生(刺身),Sashimi用喺植物度都得㗎,依幾種煮法做出嚟嘅料理就係精進料理。」

1、2年前,他更決定利用識日文這個優勢,遠赴日本考取5張料理證書,包括:茶屋長壽甜品文憑(Macrobiotic Sweet Diploma)精進料理課程證書無麩質無蛋奶蛋糕及甜甜圈證書豆腐Meister認定講座證書以及生機飲食基本證書,部份專業資格更是全港只有Jeffrey一人成功考獲!眾所周知日本人凡事認真,一絲不茍的態度堪稱全球之冠,幸好Jeffrey從小在日籍後父那位於京都的日式料理店成長、幫手洗碗和執頭執尾,多少都打了個底,他憶述從前的經歷,「舖頭個木趟門上面好多一格格,老竇叫我清潔佢,我就好Hea咁逐格抹下囉,佢鬧我,因為每一格都有塵,佢要見到每一格都冇晒塵先得,仲要我抹埋天花板,我諗平時就算大掃除都唔會抹啩?都要抹,嗰時日日畀佢鬧。」

Jeffrey成為全港首位考獲茶屋長壽甜品文憑的人!(受訪者提供)
Jeffrey考獲豆腐Meister認定講座證書後,對豆腐於不同料理的運用都出神入化。(受訪者提供)
每用一個盤之前就會噴消毒藥水,一定要噴過先可以用,噴完又要即刻抹。用完咪有一大堆嘢要洗嘅?要即刻洗㗎,洗完即刻抹返乾晒,之後先可以做下一個Step,唔可以擺晒喺度之後先抹。

而去到上堂的時候,導師對所有用具的衛生程度都要求極高,「整蛋糕要好多個盤,每用一個盤之前就會噴消毒藥水,一定要噴過先可以用,噴完又要即刻抹。用完咪有一大堆嘢要洗嘅?要即刻洗㗎,洗完即刻抹返乾晒,之後先可以做下一個Step,唔可以擺晒喺度之後先抹。同埋譬如我上甜品堂,同老師一人一個甜品,一齊做,有少少步驟錯咗,或者出到嚟個餅底爭少少都好啦,都要再由頭做過!」

Jeffrey成為首位考取精進料理課程證書的香港人,當然要跟導師麻生怜菜(左)留影。

嚴謹也有嚴謹的好,Jeffrey能學到最正宗的一套料理方式,亦從中更了解日本飲食文化和禮儀,例如倒茶、斟茶要如何拿杯等等,但他就謙稱只略懂皮毛,有機會必定會再去日本進修。他一直把其中一位全日本做無蛋奶甜品最神級之前輩的話銘記於心,對方講過:「我哋學依種甜品,唔係甜品嚟,係藝術品。」

當大家以為Jeffrey學成歸來,做起日本料理必定萬無一失,事實回港後卻是屢次碰壁,即使他已按足步驟、拍齊片段、寫妥筆記,還是出錯,因為那位神級前輩也講過另一番話:「用蛋奶整甜品本身已經好易出錯,我哋呢科會更容易出錯,因為佢冇蛋同奶,要搵豆腐同其他材料代替,可能爭1個gram、2個gram已經好大變化,仲有空氣同潮濕度、溫度都影響。」香港的水質、焗爐跟日本不同,有些食材也不能進口,Jeffrey只好屢敗屢試,不斷找娛樂圈朋友試食,從而修正和提升自己製作的日式甜品,沒想到因此無心插柳地認識了現時的經理人公司,重投演藝圈,拍攝《暗算天機》等網劇和電影,再續20年前未能發展的演藝事業。

按圖即睇更多Jeffrey的影視演出作品,有部分更是從未曝光!

Jeffrey目前仍有跟周家怡(左二)及林遠迎(右一)等藝訓班同學聚會,當然少不了導師羅冠蘭(前)!
我想透過精進料理去改變啲人對素食嘅睇法,吸引更多香港嘅後生仔去食,因為素食根本好有營養、好時尚,係有佢嘅意義喺度。

日本對很多香港人來說,總是有個光環似的,如果有人都想學Jeffrey一樣去日本進修廚藝,他有點小建議,首先是否懂得下廚並非重點,因為他之前對入廚都幾乎是白紙一張,然而他表示:「一定要識日文先,我有兩個老師都講過,好彩我識日文佢先會接受我嘅申請,如果唔係唔會教我,太煩呀,唔知點溝通,會阻礙好多時間。同埋個課程要上一年,我好彩先搵到個導師兩個月密集式咁同我上堂咋喎,咁你能唔能夠喺佢開課嘅時間飛嚟飛去呢?要3個月返嚟一次,如果你有充裕嘅時間同金錢,咁梗係得啦!」Jeffrey大約用了6萬元去完成5個課程,不過最大開支其實是生活費,住屋、食飯錢、水電媒等,他形容是「攞命」,所以大家要考慮清楚是否有能力負擔。

親身接觸過日本的素食文化後,Jeffrey認為最大分別是日本素食餐廳並不會大大隻字在門口寫住個「素」字,多數以”Vegan”的片假名拼音代替。除此之外,整個餐廳形象都跟香港齋舖不同,「一講『素』字我哋好潛意識覺得係嗰科嘢,但嗰邊係好後生,入面成個環境做到好時尚,9成都係女士、後生嘅OL,呢個係最唔同。」

他也希望自己學會日本的一套後,能搬到香港持續發展,「我覺得香港嘅素食行到好盡㗎喇,都係港式新潮嘢,但其實日本精進料理又靚,入面又包晒唔同煮法、顏色、季節食物,一Set已經有晒你想要嘅嘢,我想透過咁樣去改變啲人對素食嘅睇法,吸引更多香港嘅後生仔去食,因為素食根本好有營養、好時尚,係有佢嘅意義喺度。」深明社會風氣就是「相機食先」,Jeffrey製作的日式甜品和精進料理都是非常精緻,「你個Presentation要令人覺得好新穎,呢樣好緊要,因為依家所有嘢都要對眼食咗先,係幾考工夫。」

按圖即睇更多由Jeffrey親自炮製的日本精進料理及甜品!

訪問那天,Jeffrey預先為我們準備好《HK01》字樣的無蛋奶曲奇,令記者和攝影師相當驚喜,現場人士都大讚鬆脆可口,吃得開心之際,試了一口的Jeffrey竟不太滿意成品,說放置一晚後已開始變腍,不及初出爐般好味,足見他要求相當高!
+6

Jeffrey目前經常在自己的facebook專頁分享日本素食料理食譜,獲不少網民分享,使他體會到香港人對新穎食譜其實有所渴求。而身為藝人的他亦想過開飲食節目,但要不就不要開始,既然要做他就希望做到最好,「我諗過做YouTube,不過我想做啲正規啲嘅嘢,嚟緊可能有啲好Formal嘅製作,希望畀更多人知道素食嘅好處。」至於長遠來說,Jeffrey的心願還是擁有自己的餐廳,他想開一間走傳統、正統路線的日式素食餐廳,帶給食客一個寧靜、優雅的環境,也能在用餐時學習到正規的日本餐飲禮儀,可是Jeffrey笑言「哪有錢」,「啲錢醫病都醫晒啦!」那麼現階段唯有先努力搵錢和搵合夥人吧!

Jeffrey大方在facebook分享日式精進料理食譜,不但附有入廚跟購買材料的小心得,亦會解答網民留言,難怪有過萬支持者,網友更經常留言叫他開班教人。
Jeffrey亦曾上過《都市閒情》,趁元宵節教家庭觀眾製作日本傳統白玉團子,旁為主持人劉彩玉。