感到不適時獲得好心人的幫助，特別感到窩心。本港一名女子在Threads表示，自己是「一個返通宵更嘅倉務小薯仔」，半個月前左右開始乘搭路線265S的九巴，「搭嗰班係特別車嘅最後一班」，平日會早到巴士站等車，衣着通常是黑色上衫帶帽，每次上車都會向該名林姓車長說一聲「唔該」，但對方「經常黑面……無應過我」。

樓主日前上車前感到不適，於是在巴士站附近便利店買藥，該輛巴士正常是早上7時58左右到達，自己當時大約7時52分行到車站附近，突然聽到九巴響號，最初沒有留意，「因為平日呢個鐘數有另外一架埋站，同一個站嘅巴士叔叔都有響咹呢個習慣，用意係提醒人上車」，所以樓主沒有轉頭。

但當時車長連響數下，樓主大感奇怪，轉身見到其平時乘搭的巴士已經埋站，原來林車長從樓主背影認得出她，卻見到她遲遲沒有上車，於是響號提醒，樓主形容大受感動，「車長竟然認到我，仲要係背脊，嗰刻我上車多謝佢，亦都好似平日咁同佢講聲唔該晒」。

我要大大大大力讚賞佢，實在係位黑面暖男，我已經記低咗你職員編號，我決定請你飲咖啡！

樓主坐言起行致電九巴熱線交代事件，盧姓接線職員形容林車長「好厲害，咁都認到」，樓主數次強調，「一定一定一定要讚揚佢」。

帖文引來許多網民留言：

「車長肯定認得啲客，搭開見慣見熟」
「其實好多車長都黑口黑面，其實好暖心」
「呢個畫面好感動，一個小動作，令你成日都溫暖起嚟，願呢份善意繼續流傳」
「林車長呢招夠晒貼心，大佬級服務態度」
「林車長呢啲真係做到出晒面，背脊都認到你，暖到入心！勁！」

樓主回覆網民留言，笑言林車長「日日見咁多人，佢記得真係好厲害」、「加上我會同車長講唔該啩，所以先認到我」。

佢最厲害係我未行到巴士站，佢已經響咹提我，佢喺我後面，呢下真係大癲！

樓主同時直言「自己做過好長時間服務業」，將心比己，明白獲得顧客讚賞的喜悅。

其實聽到客人多謝自己真係好開心，講唔係浪費好長時間，但真係會令對方開心一日。

如果九巴乘客想讚揚車長，官方網站列明方法：

1. 致電九巴顧客服務熱線 2745 4466（熱線員服務時間為每日早上8時至晚上9時）
2. 透過九巴手機應用程式App1933及九巴網站的「bot1933」互動對話功能提交「顧客意見」

（Threads@hingman.lau.52）