【少林足球】田啟文親證醬爆零NG 星爺私下解釋原來唔關演技事

撰文:許育民
出版:更新:

田啟文(田雞)日前上新城電台接受《詩情廿四味》訪問,大談跟星爺周星馳合作,期間講到2000年拍攝《少林足球》時的點滴,仲親證坊間一個傳聞,話醬爆在饅頭店前嘅爆發Moment,真係一take過冇NG搞掂!

《少林足球》為周星馳帶來金像獎最佳男主角及最佳電影獎項。(《少林足球》劇照)
田啟文日前上電台接受訪問,重提跟星爺的合作點滴。(陳順禎 攝)

陳國坤拍足34 Take
2001年上畫的《少林足球》,是星爺正式衝出國際的代表作,更為他帶來香港電影金像獎影帝及最佳電影等榮譽。談到創作時,當年跟足全程的田雞,憶起周星馳對拍攝的嚴謹已達到吹毛求疵,閒閒地一個鏡頭都要Take廿次,其中四師弟陳國坤便首個中招。田雞︰「單是拍陳國坤出門一幕,足足拍了34 Takes,好痛苦,拍到陳國坤都想放棄自己。周生要求好高,所以大家都認同在他執導之下,冇可能有人做到一Take OK,但結果醬爆做到。」

陳國坤在戲中一個行出門口的鏡頭,便拍足34次。(《少林足球》劇照)
在饅頭店唱歌一幕,可謂電影的重頭戲。(《少林足球》影片截圖)

周星馳︰「你哋邊個做到吖​」
在《少林足球》入面,醬爆要在饅頭店門前講一段發人深省,激發起星爺及豬肉佬等人內心一團火。田雞︰「起初開拍,大家都在估至少要NG幾多次?我估起碼雙位數。然後當拍完第一Take,李力持正準備再嚟多Take時,周生突然一句︰『OK㗎喇!』」這個回應,的確震驚全場。

+14

一Take過!現場大家都呆了。田雞︰「第一場戲如是,去到第二場戲,周生又話收貨,到第三場戲又係一Take OK,大家開始覺得唔對路,我還特意問句使唔使嚟多過當保險?」結果周生終於講出一Take收貨的理由︰「佢做嘅嘢我根本做唔到,佢係做番自己,好自然,你哋邊個做到吖?你改佢就搵自己笨!頭先機器有冇事吖?冇吖嘛,咁OK啦!」田雞回想跟周生共事十多年,從未見過有人可以一Take過,連他本人都因經常忍不到笑而NG,可算是創下紀錄。