【鐵探】網民封許紹雄尖酸刻薄王:好多人都話我好衰格
撰文:吳子生
出版:更新:
無綫重頭劇《鐵探》今晚(10/5)於旺角舉行「大結局終極電視送飯」晚宴,出席演員包括有垶Sir(袁偉豪飾)、萬晞華(惠英紅飾)、賤Kan(許紹雄飾)(Benz雄)、程Sir(黃智賢飾)及谷Sir(梁競徽飾)等人一齊睇《鐵探》大結局,場面非常熱鬧。
Benz雄在劇中飾演簡Sir,又名賤Kan,經常口沒遮攔,處處出言侮辱程Sir(黃智賢飾),演技備受網民肯定,更被眾多網民封為「世紀賤人」。Benz雄聞言,即笑著說:「呢套劇算係我拍咁多套以來,真係算講得最多尖酸刻薄說話,好多人都話我做得好衰格,但又話鍾意睇!不過有啲賤格金句係爆肚講,例如係『盲精啞毒跛招積!』其他金句就唔係好記得啦,通常一拍完就即刻忘記晒。如果而家仲記得的話,容乜易患腦膜炎呀。哈哈!」