【全民造星II】被網民質疑節目出蠱惑 Oscar︰我立誓冇造假!

撰文:李婉文
出版:更新:

ViuTV大型選秀節目《全民造星II》十強才剛誕生不久,就即將要迎接決賽的挑戰,由全民投票和星級評判一同選出心目中的三甲!早前,十強的參賽者出席活動為自己拉票時,吸引大批粉絲撐場,場面熱鬧。其中五強——Phoebus(吳啟洋)、Oscar Li(李祉均 )﹑JJ(范卓言)、Brian(阮頌揚)和George(歐鎮灝)接受《香港01》記者訪問時,大談看好的參賽者,他們都相當識做,互笠高帽,各自選對方,當中Oscar選身旁的JJ,而JJ也選對方,但JJ就搞笑話︰「我今晚會投你(Oscar),之前投返自己,(Oscar︰咁聽晚呢?)聽晚都係投返佢,(Oscar︰決賽前呢?)決賽前就投返我自己啦緊係!」事關在決賽前,選擇都可以任意更改。

《01最賞睇娛樂大獎》即日起至12月24日接受投票喇,仲可以參加勁抽雙重獎,隨時贏旗艦手機11 Pro Max、Dyson風筒、01積分等,總值超過70萬元!

十強參賽者(左起)︰Phoebus(吳啟洋)、Oscar Li(李祉均 )、Mike(曾比特)、MC( 張天賦)、Tank(梁德忠)、JJ(范卓言)、Brian(阮頌揚)、George(歐鎮灝)、Hugo(丘凱雄)、Justin(陳樂)。(梁碧玲攝)

比賽其中一個熱門人馬Oscar雖然一向唱歌表現一般,但這次在台上唱出《芳華絕代》看得出他進步了不少,而現場所見,他的台風和舞功也相當之厲害,他在台上也揚言想在紅館演出。被問到是否要一洗唱歌不好聽的污名?他笑指︰「嘩,一洗唱歌污名,呢個title好大啊!咁呢度唔係紅館咪我將佢變做紅館囉!唱歌我真係有努力去練嘅,我尋晚練到一點幾先返屋企,當你付出嘅努力得到人哋嘅認同嘅時候,呢件事係無與倫比嘅開心,所以多謝全世界!」

【全民造星II】粉絲嫌決賽太少觀眾名額   花姐︰其實上年都少位㗎

【全民造星II】MIRROR為十強打氣   非大熱門竟獲最多成員睇好?

五位參賽者互相推舉看好對方!(梁碧玲攝)

另外,十強的名單其實也是在一片爭議聲中誕生,特別是對於George入選,有網民質疑他未夠實力入圍,他坦承自己也想證明給大家看他是有進步的,他指︰「我自己都有留意啲負評,其實我當初都冇咩信心入十強,宣布嗰刻我係真係好驚訝點解會入到,既然都入到嘅話,咁不如就將自己嗰兩個表演做到最好,甚至係將自己最好嘅嘢攞晒出嚟,啲觀眾覺得得嘅就得,唔得就之後都可以再證明嘅。」

George被網民質疑實力不足以入圍十強,他希望以表演證明給大家看。(梁碧玲攝)

其實自節目播出不久後,網上就一直有聲音質疑節目有造假,幾位參賽者就連聲反對這個說法。George直言節目一直是公平對待每一件事或人,Brian就覺得每個人也有他們心水的十強,他相信評判的眼光和意見是中肯的,至於節目公平與否,他就拿自己來開玩笑,笑指︰「我自己覺得一定公平,因為每一round好多幕後都話『Brian,你下round應該入唔到㗎喎!』如果真係唔公平嘅話,我呢個『復活不死鳥』就唔喺呢度啦!」事關他有幾輪也是在復原區「返生」入圍的。而Oscar更說︰「我以我嘅名稱去立下誓言,《全民造星》真係冇造假!真係好辛苦嘅半年嚟嘅!」

點擊下圖睇吓更多靚相︰

+4