【矚目配角】樊亦敏因長期病被迫放棄愛情:睇醫生睇到無時間拍拖

撰文:
最後更新日期:

感情世界是複雜的,因為一個「愛」字,兩個人可以走在一起直到老死,而又有些人因為一個「愛」字而選擇分開。樊亦敏說話很快,如果不仔細聽的話,很容易聽漏,但是話語之中夾集很多人生道理。與她談起戀愛經驗,大抵可以形容是:苦澀之中夾雜着無奈。她說:「唔係我唔愛佢,而係我生唔到仔,所以選擇離開。」

樊亦敏在《愛.回家之開心速遞》中飾演大龍生龍敢威的三太「白天娥」。(電視截圖)

後生時的樊亦敏已經十分有氣質。(網上圖片)

為何昔日女神的樊亦敏依然單身?

與資歷較深的同事談起樊亦敏,無不讚她是昔日女神,最後更有人說:「如果要形容嘅話,佢靚嘅程度就係而家岑麗香個Level!」喔,懂了!其實有點年齡的讀者,都會記得她做過陽光檸檬茶第一代「陽光妹」又是選1991年香港小姐成為最上鏡小姐,套用現在的叫法就是「仙氣女神,純過蒸餾水」,所以,當日訪問談到感情生活時,記者劈頭第一句就問:「以前妳都好靚吖,點解而家仲單身嘅?」

無綫劇集《殺手》,樊亦敏飾演「紅姐」一角也令她廣受歡迎。(《殺手》截圖)

自言因病無奈結束多段戀情

她似乎被記者突如其來的提問嚇親,停了半秒,然而嘆了一口氣,就說出了自己因頑疾而錯失愛情的事:「坦白講我都有鍾意人嘅,你好鍾意佢,但係你會覺得(自己)畀唔到嘢佢。我所有時間就係去咗睇醫生,如果同我喺埋一齊,你嘅時間除咗會見到我發脾氣之外(就乜都冇)。因為我真係好辛苦,要成日陪去醫院,一時就要去睇哮喘,食完藥又要去睇腸胃科。我成個生活就係睇病,我唔係唔想同你喺埋一齊,我唔係唔鍾意你,但係你同個咁樣嘅人喺埋一齊做咩呢?」

訪問當日正是《殺手》的宣傳活動的日子,還記得樊亦敏表示,願意載着記者由將軍澳電視城駕車半小時到荃灣的訪問場地,足見她的豪爽又不拘小節性格。(梁碧玲攝)

【殺手】樊亦敏曾為劉家輝追回財產 18歲已做第一代陽光妹勁仙氣

因病狂甩頭髮:每次都要喺個頭度打200幾針

其實不少有行內人都知道,樊亦敏自參選前就已經有免疫系統上的問題,不單止影響日常生活,就連拍拖都有影響。問到這個病,她就如數家珍一般跟記者詳細解釋,原來免疫系統會攻擊身體內好的細胞,以致會大量甩頭髮,還會有哮喘問題,出埠隨身都要戴着一大盒急救藥物,以前還會隨身帶備兩部霧化呼吸機以供不時之需,經常出入急症室等等。說:「以前要喺個頭度啪針,醫生為咗我專登買咗三支槍,但係打壞咗兩支,因為每次起碼要喺個頭度打200幾針,一次打足幾個鐘...」治療佔據了她生活所以時間,不止工作上,就連戀愛時間都要犧牲。

初入行時,樊亦敏已不時有嚴重甩頭髮的問題,可惜因為當時風氣較保守,電視城內沒有太多人知道,以致當時產生了不少誤會。(網上圖片)

因為愛他,所以分手

「好多次㗎啦,算啦,你走吧啦。拍拖係有嘅,每一次都認真,但係當你認真嘅時候,你又畀到啲咩人哋呢?」當時記者說問:「可能有人唔介意呢?」她語調突破變慢,似是若有所思,說:「我唔知道,但係錯失嘅嘢令我覺得健康嘅可貴,同埋自己都咁唔舒服,可以對方都應該會好唔舒服。」原來一個「愛」字,除了「擁有」外,還包含了「放手」兩個字。

字裡行間感覺到樊亦敏談了不系次戀愛,但每次都無奈地要選擇分手。(梁碧玲攝)

不過,比起受免疫系統問題的困擾,其實不孕才是間接令她選擇不婚的原因。她說:「唔係話冇,(對身體)唔係咁好,好難囉。如果我冇呢個問題,其實(以我性格)都好難,再加上天生出嚟(有呢個病)就自己諗諗啦。我好細個嘅時候已經問過醫生,佢話:『就算妳做人工受孕都好,你做咗都唔一定會成功。』可想而知係幾咁難。」

【殺手專訪】龔嘉欣拍劇周身傷 最懷念家庭溫暖:有湯飲就好開心

樊亦敏的」愛」其實十分偉大。因為愛他,所以不讓對方辛苦,而默默選擇分手。(梁碧玲攝)

因不孕而選擇退出:冇咗我,佢都可以有第二個,一樣會幸福

記者心中不禁想到:「現實往往就係鍾意捉弄人。」她也說:「唔知點解,拍親拖唔係九代單傳,就係屋企得佢一粒仔。」所以她會想到,萬一結婚後,「生仔」的重擔就將會落在她身上,而她又是不孕。粗俗一點說,在那個年代,不孕的女性就如一件殘次品。記者又問她:「或者有人唔介意冇小朋友呢?」她想了一想,又再給出一個似足韓劇女主角的答案。

未曾經歷過,其實很難去理解樊亦敏的愛情世界。(梁碧玲攝)

她說:「人係好現實㗎,我唔想去到嗰個Moment,就係生唔出嘅時候,成屋人望住你...你明唔明?我又唔想另一半難做,咁點吖?我覺得,天下間個個女人都一樣,可能係唔鍾意我,你都會鍾意另一個。尤其係男人,(指着記者說)你係男人都知。呢個好愛,但係嗰個都OK,(冇咗我)一樣都會幸福㗎嘛。我都唔係好緊要㗎啫,得啦,咁我走啦。我會選擇分手,但係我唔會擺明同佢講,會自己行咗去。」

矚目配角下一集:

矚目配角|樊亦敏因惡疾被迫放棄內地拍劇:就連搭飛機都好辛苦

參選1991年香港小姐,樊亦敏奪得了「最上鏡小姐」,那一年由郭藹明獲得冠軍、周嘉玲獲得亞軍和蔡少芬獲得季軍。你話樊亦敏冇人追,都冇人信啦。

甘心做感情中的壞人:唔通同佢講不如我哋試吓啦?點試啫?

記者驚訝地問:「唔會對佢好唔公平?」她笑了兩聲:「哈哈,你當我唔係一個好人囉,我呢個人好瀟灑,唔使同佢講咁多嘢,你明唔明?唔通同佢講不如我哋試吓啦?點試啫?醫生都講咗唔得,唔係一個講,而係兩個。」

欣然接受自己:呢樣嘢係生命嘅軌跡

因為疾病而錯失愛情,因為不孕而選擇不婚,是不是代表要怨天尤人?又未必,相反地其實樊亦敏已經看透了。她說:「我好欣然接受,呢樣嘢係生命嘅軌跡,每個人都會有起跌,即係我哋(學道嘅人)叫『成住敗空』,有開心一定有唔開心嘅時候,就好似影子咁係對立,有寂寞一定有唔寂寞,呢樣嘢就係靠你自己點樣去理解。」直到現在,記者還不是很明白什麼叫做「因為愛所以放手」的道理,或許要像樊亦敏一樣,經歷過才能夠領略吧。

講起感情事,不得不問樊亦敏和何寶生的一段情。不過她就不願多說:「佢而家身份比較特別,因為佢係一個出家人。我比較唔會去講佢嘅嘢,因為佢喺世間上嘅任務唔同咗,係一個出咗世(凡塵)嘅人。當然佢係一個好人啦。」(網上圖片)

點擊睇 檸檬茶廣告嘅樊亦敏,仲有金莎朱古力廣告:

+8
+8
+8

點擊睇 樊亦敏IG相:

+13
+13
+13


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。