書展2022|行山書出版商嘆難以生存 「旅行狂」梁榮亨:功成身退

撰文:顏銘輝
出版:更新:

2022年的書展,可能代表行山書一個時代的結束。「社長」梁榮亨宣布不會再出版《知情識趣遊香港》系列,感嘆實體書愈來愈難生存,他們的歷史任務完成,可以功成身退。

行到友晟出版社的書展攤位,「社長」梁榮亨如生招牌般坐鎮,為每位買書的讀者簽名。梁榮亨介紹今年出版的新書《知情識趣遊香港9》,從他口中,香港奇山異水,趣石勝景,如數家珍,但他告訴記者:「我哋呢個系列到此為止,唔會再寫。」

友晟「社長」梁榮亨今年繼續有在書展擺檔。(顏銘輝攝)

梁榮亨是香港旅遊行山界的傳奇人物,1988年起為報刊撰文,介紹本地風光山水,到90年代著書,出版的行山旅遊書籍超過30本。他在2012年起編著《知情識趣遊香港1》,介紹難度較高或非常規的探奇式路線,幾乎每年出一冊。來到2022年,他宣布這個系列完結。

梁榮亨解釋:「一來覺得實體書愈來愈難生存,第二,除咗第一本係25條路線,我們每本書都有30條路線,乘一乘,你見我哋介紹咗幾多條路線,都不得了!出版實體書成本愈來愈重。你一開啲Apps,大把路線。我哋嘅歷史任務已經完,都可以功成身退。」幫「社長」計一計,《知情識趣遊香港》系列10年間介紹了265條香港行山路線。

梁榮亨續說:「舊年已經有呢個想法,覺得有啲路線開始重複,有啲作者都話『榨到乾晒嘞』,佢哋都覺得有壓力,如果有壓力就無謂啦。我覺得都差唔多要抖一抖,任何嘢都有開始有結束,結束得漂亮好過格硬落去。」《知情識趣遊香港1》由梁榮亨及何同益合著,來到完結篇的《知情識趣遊香港9》,作者已加至9人,包括「香港山友石頭谷」的李志成、「山城縱走」創辦人莫智傑及區以駿。

「(有沒有感到可惜?)可惜都有,但覺得推廣香港旅遊文化嚟講,已經盡咗力。」梁榮亨說。他感謝友晟的社友贊助部分製作費,「如果冇佢哋嘅熱心贊助,根本冇得搞!」他表示發行及書店的生態已跟以前不同,而且圖書館購書亦比以前少,「以前會要300本,𠵱家最多百幾本,300本變100本,冇咗200本點搞!」

梁榮亨推介今年出版的兩本新書《知情識趣遊香港9》及《賞遊香港離島》。(顏銘輝攝)

友晟出版社原本位於長沙灣宏昌工廠大廈,但政府要清拆改建,友晟不得不遷出,搬到土瓜灣的工廈。梁榮亨說:「政府要拆,我哋要搵地方搬,都花好多精力同心血,由500呎搬到170呎,你話要清幾多嘢。出呢兩本書比較急,離島呢本書,我本身想加入更多資料,但到我落手做嘅時候,剩番3星期時間。又要排版及印刷,我得兩星期去寫,已經好快手。」

除了合著《知情識趣遊香港9》外,梁榮亨今年還出版了《賞遊香港離島》,介紹馬灣、坪洲、吉澳等地的行山見聞,「好多嘢想擺落去,都無可奈何,時間問題。希望用相吸引人,啲相盡量做到有新有舊,希望有對比,等人懷念一下過去。」

談到回憶,梁榮亨大讚以前馬灣出產的蝦膏「真係好正」。(顏銘輝攝)

撰寫《賞遊香港離島》時,梁榮亨用了很多舊照片,有張更加是他廿多歲時在青衣打工所攝的。他一邊翻書,一邊說:「出呢本書都有感觸。我以前能夠去喜靈洲住一晚,嗰位(帶我去嘅)社友早幾年喺家中出意外,撞親個頭,已經過身。相中同我上山下海嘅戰友,又已經移民,都覺得好唏噓,好多回憶。我以前啲小朋友真係是小朋友嚟,十幾歲,一齊行山,𠵱家都已經40歲。時間真係過得好快好快!通過本書,希望保留到啲島以前係點樣。」

雖然梁榮亨為《知情識趣遊香港》系列寫上句號,但未來會不會再出其他系列的行山書呢?「睇下有幾多需要?睇下有幾多材料?如果有,都可能會再出。」他回答:「年紀都有返咁上下,我都70歲人,要做嘅野,有能力做嘅野,都做咗咁多,畀其他人做下啦!」

梁榮亨坐鎮書展攤位,與到訪的書友山友聊天。(顏銘輝攝)