【80後承父業】家姐患頑疾靠石斛醫好 棄夢想賣打卡凍齡養生花茶

撰文:
最後更新日期:

以往總覺得是長輩才會注意養生,而且都是靠食中藥、做氣功等「老餅」方法,年輕人總是帶點抗拒。不過近年坊間的健康飲品店開到成行成市,不論裝修或意念都銳意打入新一代市場,其中的花茶品牌「花研草說」就是一個成功例子,靠著「IG-able」的西洋書法飲品瓶及擺市集等招數,成功把「石斛茶療」概念推廣給後生女,負責人Stone對於重塑這品牌絕對功不可沒!

攝影:鄧倩螢

本身有睇過「花研草說」Instagram,不論是那個戀水瓶、背後佈置的花花、打卡相等,都相當之女性化。當我邀約品牌做訪問時,心想對方可能都是後生女,就跟它本身的客源一樣,但沒想到創辦人居然是位男士、一位父親!而「花研草說」之所以誕生,正是基於這位父親對女兒的關愛。

服用石斛半年 家人成功治好免疫系統失調

創辦人黃啓明先生已很少打理這品牌,幾年前全盤交由兒子Stone主理。Stone說,他家中有四兄弟姊妹,唯獨是姐姐童年時身體異常地差,讓一家人煩惱不已。

佢可以同時間個口入面有二、三十粒痱滋;由本身好肥,到食唔到嘢變得好瘦、好虛,我哋著晒短袖衫,但佢都話凍要著褸、好多嘢都唔食得,就連食菜有少少油,都好似對身體好重負擔。

家姐整整10年被這些症狀纏繞,為人父親者當然不惜一切希望找個好醫生,但總是沒有人能準確告知這家人,到底她身患何病,直至遇上一位中醫,整個家庭似是覓得靈丹妙藥似的。「個中醫話家姐係免疫系統出咗問題,亂晒、打晒仗,所以用咗石斛幫佢調理呢樣嘢,最後又真係畀佢醫返好!」

Stone以「仙女」形容病癒後的家姐確是有些誇張,不過他在訪問後向記者展示對方的照片,30來歲、已是兩子之母的她確是保養得宜。

Stone的家姐用半年時間終於調理好身子,身型回復正常,Stone形容她變得像仙女一樣,也解釋到何以有這個變化。

點解我哋會肥呢?未必真係我哋食咗好多卡路里,係因為好多毒素喺身體排唔到出嚟,咁如果清晒啲毒素,其實就OK。

石斛由高至低級主要分為三種,鐵皮石斛、紫皮石斛和水草石斛,價錢可以相差近10倍,而圖中這種正是花研草說自家種植的鐵皮石斛,一般$3,000至$6,000一斤,最貴甚至可達過千元一両。

夢想與事業之間的抉擇

去到2012年,Stone的父親受家鄉福建政府邀請,決定大力發展石斛產業,甚至在當地開墾出自家的石斛種植園,專門種植最高級品種的鐵皮石斛,「我哋用香港對食品管理嘅概念去做呢樣嘢,自己種先確保到個品質,因為我發覺好多人做生意都真係為咗賺錢,你同人攞貨可能會買到假嘢,或者攞啲紫皮石斛(次一等的石斛)嚟扮囉。」

這是花研草說位於福建的種植園,用彷野生方式種植,雖然石斛粗生,但有冇營養等又是另一回事,所以Stone和父親對水分、養分、吸收多少陽光等都嚴格監控。(Instagram:mzklifehk)

其實Stone從來都不是那種想接管家族生意的人,不過父親早年已多次暗示屬意將石斛業務交到他手,出身於紐約電影學院的Stone,一心視攝影為夢想,內心固然經過多番掙扎,但他形容自己很快「向現實低頭」,「因為嗰個係你老竇吖嘛,算啦,都要有啲膊頭,雖然我鍾意影相啫,但都要做返啲幫屋企嘅嘢,我都鍾意做嘅,依家啲Product相全部係我影,咁做出嚟幾靚,啲人又開心,我都好有滿足感。」

向父親妥協其實並不等於放棄夢想,Stone調整過自己想法,領悟到兩者其實可以共存,「可以一路影相一路做啫,影相當Part-time囉,所以我喺火炭都有個4千呎嘅Studio,專做攝影同廣告,有接啲廣告同MV返嚟拍,可以做下導演。」因此,他並沒有對當年的決定後悔,反而於這個可以由自己話晒事的品牌中,逐漸找到成功感,從起初半推半就,到後來樂於經營好這個心血。

Stone至今仍然堅持以攝影為副業,主要拍時裝為主,早前亦與溫碧霞、楊思琦及譚嘉儀等藝人合作。

楊思琦的MV《愛的森林》由Stone操刀。(圖片由被訪者提供)

重塑品牌 足料茶包助客人每日飲足8杯水

即使家族已有一大個自家種植園,可是7年前的花研草說,跟現在差得太遠了,講到公司原本的風格,Stone笑笑說:「一開始,有啲成熟囉,因為我哋好原始,唔係做凍齡茶嘅產品,淨係賣一粒粒石斛,又或者做緊啲粉呀、片呀咁。」這種專賣藥材的路線,又怎會得到年輕人注意呢?深感「唔掂」的Stone當時廿幾歲,站在後生仔角度的他坦言:「根本唔係每個人每日都會去食或者飲石斛,覺得係好傳統嘅藥材或者苦茶,你幾補都好啦,啲人唔食都冇用,我就諗不如做啲靚啲又易入口嘅嘢,同中醫傾開『茶療』概念,就係每日靠你飲茶去吸收微量嘅營養,咪可以調理身體囉。你話煲湯嗰啲,又要買材料、洗嘢、煲幾個鐘,依家啲都市人點會咁同你咁玩呀?我都唔會理你啦!

每個戀上.瓶的字樣都由Stone親自設計,有打氣說話,也有獻上心意的字句。

花研草說的花茶明顯比其他品牌大包,平時可能只是一個茶包仔,但這裡的花茶茶包約莫有1部iPhone般大,整包都被填滿,兩個字總結——足料,按中醫建議的分量,每包都可以翻沖3至4次,並且能冷泡。

講起成本就真係一額汗,開頭我爹哋都問,係咪真係需要咁多料倒晒落一包嘢裡面呀?我話真係要,因為你足唔足料係啲人決定繼唔繼續飲嘅原因,唔足料,啲人覺得唔夠味,轉頭又飲返珍珠奶茶㗎喇!

不少家長都會買石斛花茶給小孩,首先它甜甜的,不會有「趕客」的藥材味,而且沒卡路里和添加劑,「佢係健康飲品,小朋友飲下飲下就飲咗8杯水㗎喇,就算你撇除咗石斛或者檸檬有冇營養都好,飲多啲水點都係好㗎,我好多朋友話『我唔鍾意飲水㗎,都冇味嘅!』好,咁我整啲有味嘅水畀你飲囉。」

按圖看「花研草說」有什麼石斛花茶:

品牌共有5種花茶口味,每包茶包都近乎有一部電話般大,而且材料很豐富。

+3
+2

「戀水.瓶」不止得個樣,樽口更有個隔篩,讓大家飲用時自動隔走各種花和材料,飲得更順暢。

石斛好處多 凍齡益脾胃

Stone深信他們是全港首家以石斛茶療為主打的店,除了因為石斛曾治好家姐的病,也因為他確實從科研報告中認識到石斛的4大好處,「第一佢對脾胃好好,第二佢對睡眠好好,因為滋陰。人點解會瞓唔著呢?因為你陰虛,陰陽失調就好容易失眠,你試下每日瞓足8至10個鐘,個人會自動消瘦,所以呢隻茶幫到你瞓覺、腸胃,佢最貴就係石斛多糖,幫到你調節個免疫系統。」五款石斛花茶又名「凍齡茶」,凍齡在於抗氧化功效,多個實驗顯示出它能對抗「歲月殺手」自由基,難怪深得女士歡心。

問到有沒有一些特別的個案讓Stone特別深刻,他即語帶激動說:「有呀!醫偏頭痛!曾經有個我哋Staff嘅朋友,同我哋講話以前成日頭痛,飲得石斛多就冇咗呢樣嘢,我哋都不以為然㗎,點知之後又有個街客inbox我哋,話頭痛問題改善咗,我哋都係嗰時先知原來醫到頭痛。我諗可能都係關免疫系統事啦!」

脾胃、睡眠真係人嘅根本!你食嘢慢啲,就冇咁傷脾胃,消化又好啲,瞓得優質啲,咁咪Recover好啲囉。人每日都死緊100萬個細胞,瞓覺就係幫你Recover緊嗰100萬個細胞。

石斛品質取決於其石斛多糖含量,鐵皮石斛內的石斛多糖達30%以上,相反水草石斛可能只得15%。Stone就表示自家的石斛一般都有32-35%石斛多糖,有時更高達38%。(Instagram:mzklifehk)

冇大財團撐腰 靠市集讓人認識

這幾年做生意的方式跟從前實在相距甚遠,隨著社交媒體興起,要做好網絡公關和宣傳,也要影靚相來吸客,不過如何讓更多人認識自己的品牌,也是一門學問,Stone坦言自己是「揼石仔」,facebook的支持者以至整個牌子本身的知名度,都是由零開始,「本身又唔係話好勁好有規模,又唔係有新世界喺後面撐腰,都係Small potato,咁我咪去擺下市集,同多啲人接觸,話畀人聽石斛有咩好囉,間中有啲媒體訪問吓,Online又寫吓啲關於健康嘅文章。」

市集都係本地文化之中,可以慢慢滋生嘅一個位,佢門檻唔高,但插畫家呀、手作都可以喺入面做,係幾好嘅地方。

這2、3年花研草說都有積極參與不同市集,向客人推廣石斛花茶,右邊的「大同月餅花茶」更是讓Stone最引以為傲的產品,成功邀請老字號大同餅家和插畫家合作出禮盒,原來大同成立70幾年來都沒有跟任何品牌合作過!(instagram:mzklifehk)

他提到市集,原來亦是與客人建立關係的一大渠道,「開頭人哋乜都唔識,但喺市集見到你個Brand連做一個盒用咩紙都咁高要求,仲要幾靚,咁就會覺得可以試一盒囉。就算你話我哋同屈臣氏合作,都係由市集開始。同埋我諗市集都係本地文化之中,可以慢慢滋生嘅一個位,佢門檻唔高,但插畫家呀、手作都可以喺入面做,係幾好嘅地方。」所以,本月19號,「花研草說」又會去「社區健康型活墟」擺市集了!

花研草說
售賣點:花研草說茶療工作室、誠品生活各分店、文化村各分店、婆婆雜貨店及HeArtStudio(詳見官網)
Instagram:mzklifehk 

「社區健康型活墟」活動詳情:
日期:2019年4月19日(星期五)
地址:灣仔修頓足球場
時間:12nn-6pm

【第一屆武博】格鬥籠內,高手埋身肉搏,真實呈現你眼前!武博內設「格鬥籠」,將有不同類型的表演賽,包括泰拳、MMA綜合格鬥、菲律賓魔杖及業餘修斗等,力量、拳風、汗水,比賽就是如此真實!快約定熱愛搏擊運動的朋友們,5月3至5日,眼界.決定境界,九展見!

按此立即購票
按此瀏覽武博專頁



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。