【90後創業】為中學時夢想打拼10年 三閨密土瓜灣開港式甜品店

撰文:
最後更新日期:

「我哋第時大個咗,要一齊開間糖水舖!」小時候把一切看得簡單,類似的承諾許過太多,說過要跟好朋友一起搬出來住、長大後要怎樣怎樣……步入社會才知道,這些諾言大多無法兌現,友誼原來比想像中脆弱。陳奕迅唱過:「為何舊知己在最後變不到老友?」莫說要跟好友開店這些宏願,根本連約出來食餐飯都難過登天!不過凡事總有例外、Charlie、Moon和阿秀這3位90後,果真敵過時間洪流,實現中學時期的約定,在土瓜灣開了間甜品店。

攝影:鄭子峰

識於微時 堅守戲言般的承諾 

這三個女生的緣分,在於她們不約而同於2009年插班到同一間中學,一樣都經歷過初到陌生環境不知如何融入的不安,正是這樣使她們愈走愈近。Moon說:「我哋放學成日都去食甜品,食得多會自己研究下點整,跟住就會諗『不如第時我哋有能力就開一間糖水舖啦!』大家都一齊擁有呢個夢想。

離開校園後三人各奔前程,Charlie修讀酒店管理課程,做過酒店業和證券行工作;Moon坦言公開試成績不好,讀了些護理系課程就去醫院上班;而阿秀大專畢業便加入了服裝公司,打工一段時間後更創立了自己的店舖。儘管各有不同事業發展,但三位始終沒有忘記過心底的夢想,「中學嗰時覺得開一間甜品店需要好多錢,所以都當講笑咁講。」Charlie聽完阿秀說便續道:「直至我哋有兩個人都辭咗職,講起真係好想實現呢個夢想,亦做咗好多資料搜集、報告,計過每日做幾多生意先回到本,發覺可行先做。」

(左起)阿秀負責文書處理和會計、Moon主力在網上做宣傳、而Charlie溝通能力強,將以前工作學到的待客之道都應用於此,三人各有分工,加上建立多年的默契,每天回到舖頭已懂得自動埋位,「一返到嚟邊個做啲乜,已經知㗎喇,邊個擅長乜嘢就整咗先,冇嘢煮嗰個就企樓面。」

懶理家人反對 實現夢想不靠別人

她們打從中學開始自學整甜品,屢敗屢試,一年前終於見時機成熟,三位走勻全港去睇舖、選址、搵門路攞貨、設計舖面……當中最困難是接舖後的清理工作,「我哋冇請清潔公司,全部都係我哋三個做,執咗過百隻曱甴,地下同廚房全部都係我哋自己搣膠紙、抹地、買傢私,廁所都自己洗。」這一切一切,對比平日做的家務,簡直小巫見大巫。

訪問當天甫踏進糖妃,最先見到阿秀在拖地,還未察覺到我又已被客人叫去收錢了。這期間見到她的手上有被燙傷的疤痕,她說是遭焗爐灼傷,但礙於店裡只得三個人,受傷也只好頂硬上,流血就趕快貼膠布,之後戴上手套繼續做。

阿秀、Moon及Charlie今年分別是27、25和24歲,已經儲夠錢開舖,很多人問是否靠父幹或母幹,不過她們堅稱不靠家人,投放到這盤生意的一分一毫都是自己賺回來,過程中也犧牲了不少娛樂,「同齡嘅女仔可能仲行緊街、講緊買咩唇膏、去邊度旅行,但我哋冇㗎,唱K同睇戲都比其他同學少好多,食飯都慳住慳住。」

糖水店營業時間大約10小時,但她們每晚收工善後完都3、4點,翌日中午又要回來煲糖水並準備開店前的工夫,工時長到每日都不夠時間休息,不過三人始終覺得一切也值得。(受訪者facebook)

之所以不靠父母,背後藏著的是一份倔強,原來阿秀和Moon都是冒著家人反對來實現這個夢想,前者說:「佢覺得我哋投資咁多錢,如果回唔到本好蝕,開咗之後係咪賺得返呢?係咪真係做到成功嘅甜品畀客人呢?我哋後生冇經驗,又係女仔,所以屋企人同朋友都好反對,睇唔起我哋,覺得我哋做唔到。」Moon也深深體會這種感受,在醫院的工作月入兩萬多,高過不少初出茅廬的大學生,家人自然不想愛女放棄穩定收入去冒險,

唔趁依家去試,幾時去試呢?等到30幾40歲,我哋唔會再博囉,趁依家呢個歲數有時間就去試吓、闖吓,睇吓我哋有冇機會成功。如果最後唔得,咁先至返去做其他工囉!

Moon放棄穩定的醫護工作來開店,因為她覺得過了這個年紀便不會再有勇氣嘗試和冒險,坦言要做醫護幾時都可以做,但此刻既然只得開舖一個目標,當然要試!

撇除家人,三位為新店張羅期間亦遇到不少歧視目光,「啲人唔係好相信我哋,覺得係咪公司派我哋嚟㗎呢,亦有人聽到我哋把聲已經Cut線,有人仲要問:『你租唔租得起呀?』」正因如此,反而更激起她們的決心,充滿鬥志的Moon說:「你愈覺得我唔得,我愈要做畀你睇!

三位小妮子不時遇上質疑或遭客人看輕,Charlie憶起曾有客人來吃芋頭西米露,上桌後試都未試便拋下一句:「海記唔係咁㗎喎……」她建議客人先試一啖才決定要否更換,結果對方整碗吃完。客人先入為主是在所難免,Charlie縱然理解,卻始終相信用心和用實力製作甜品,總會有人見到。

十年友情 從不缺席對方每個重要日子

記者本身沒生意頭腦,不知道經營一間餐廳究竟有多難,然而在成長過程中親歷過許多昔日好友相繼成為過客後,我領悟到要維繫一段友誼,有時或許比儲錢開店更不容易,因此更覺她們仨的友情難能可貴。Moon憶述:「我哋嗰時一齊搞學生會、參加歌唱比賽,一齊搞活動,返學、放學、放假都一齊,呢十年所有生日或者特別日子都會一齊過。就算有啲咩緊要事都好,我哋嗰日都一定攞咗假,點都會出嚟,即使唔係日日見,每個月都至少見幾次。」

要維持跨越10年的情誼,甜品也是一道重要橋樑,「唔知點解就係有個連繫感,我哋成日睇下邊個屋企得閒就上去整糖水,又會去唔同嘅糖水舖度試下,裝下人哋個廚房,睇下依家興啲乜。」

花了一年時間和心力,「糖妃Sweetie」終於在2月開幕,那種滿足感不能言喻。「追夢」二字人人會講,然而想真一點,「夢想」本質卻是虛無飄渺得很,猶如遙不可及的泡影。當聽到她們說:「係由零開始變咗一間舖出嚟!」霎時感覺到那份重量,「籌備咗咁耐嘅嘢終於可以實現,而且係由一個夢想變咗做目標。之前點解話係夢想,因為覺得唔會達到,但依家已經變咗目標,當目標達到咗,會再有下一個目標。(目標係咩?)梗係營業額高漲,跟住開分店啦!哈哈!」整個開店過程中,Moon和阿秀都不諱言最感動是親手撕下「紅紙」的一刻,

搣紅紙嗰刻真係好開心,啲人終於知道我哋正正式式開咗間舖,屋企人態度都唔同咗,好鼓勵我哋,因為佢見到原來我哋真係有呢個本事同能力,去做到其他同齡女仔做唔到嘅嘢。

開幕當日,醫院的前同事都有前來向Moon道賀,還送上這個手工製品,每一條線都是同事親手在釘板上繞,做出三位老闆娘的樣子,極有心思!

搏盡無悔 全力追夢不怕輸

講到對這間舖的期許,Charlie賣花讚花香地說:「我哋真係想畀客人一個舒適啲嘅環境,唔係好似出面咁食完就走,我哋呢度有音樂、有電視睇,想畀人享受美食,唔係為做生意而做生意,賺嘅利潤都唔係好大,賣平民價錢,但五星級嘅享受!」

請即按下圖睇糖妃Sweetie有咩食:

朱古力雪糕金磚$48|糖妃的主打之一,廣受客人歡迎。要營造外脆內軟的效果,Charlie教路多士兩邊沾牛油就夠,若整塊都沾滿牛油就會變硬,她坦言這甜品成本不高,但工序繁複、很花時間。

蒜香雞翼尖$19|甜品店賣雞翼尖,很自然讓人想起元朗名物,精華所在的辣汁蒜香充沛、辣得過癮,雞翼尖腍滑易吮,不會煮到甩皮甩骨,個人認為更勝甜品,驚喜度亦高,難怪老闆娘說曾經有客人一買就買了5碟!

+7
+6
+5

香港地飲食業流轉速度快,講到會否怕這一番心血,到頭來還是失敗收場,她們表示會竭盡全力去做,若然最終都不成功,始終相信過程中必有得著,年紀最小卻予人感覺最成熟的Charlie謂:「當攞個經驗㗎咋,唔緊要㗎,人生梗係有成功有唔成功,唔係每一樣嘢都順事順景㗎啫。

聽到她那樣豁達,忽爾想起五月天的歌曲,《有些事現在不做一輩子都不會做了》,有人覺得年輕是任性的代名詞,但大概就是年輕才有這樣的本錢和拼勁,全力追夢不怕輸吧?

糖妃Sweetie
地址:土瓜灣美景街26號地舖
電話:3954 5859
營業時間:星期二至日15:00-01:00(逢星期一休息)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。