限枱令放寬|灣仔茶餐廳負責人:6人一枱酒樓分薄生意 寧維持4人

撰文:黃穎津
出版:更新:

政府今日(30日)起開始放寬部份防疫措施,食肆由最多4人一枱增至最多6人一枱。有茶餐廳負責人表示,政府放寬人數限制對酒樓生意幫助更大,這反而分薄茶餐廳生意額,故寧願維持4人一枱。他又指政府支援食肆應更具針對性,幫助商戶支付租金更為有效。也有食客認為,食肆人數限制無助控制疫情,政府應更注重入境措施,避免不明源頭個案。

茶餐廳負責人陸先生表示,對茶餐廳而言,4人或是6人一枱並無太大分別,即使放寬人數限制,但客人已經習慣4人一枱。(黃穎津攝)

6人一枱市民更願意到酒樓聚餐 分薄茶餐廳生意

政府今日(30日)起開始放寬部份防疫措施,食肆由最多4人一枱增至最多6人一枱。記者今日中午到灣仔一帶視察,發現大部分茶餐廳人流不多,放寬食肆人數限制並沒有為餐廳帶來更多人流。

茶餐廳負責人陸先生表示,對茶餐廳而言,4人或是6人一枱並無太大分別,即使放寬人數限制,但客人已經習慣4人一枱,亦會留意餐廳人流,避免到人多的地方用膳。而放寬食肆人數限制,反而增加市民到酒樓多人聚餐的意願,變相分薄茶餐廳生意,故陸先生表示,寧願維持4人一枱。

▼10月30日起食肆和表列處所的放寬措施▼

+12

放寬社交距離措施 茶餐廳:吊住條頸睇下邊個斷氣先

陸先生又指,稱自疫情後,餐廳生意額大減,由原來的1萬餘元一日,跌至第三波疫情時僅餘數千元一日,難以支付10萬一月的租金。即使後來業主有減租3個月,但當時環境艱難,陸先生更稱自己需向相熟街坊借貸度日,即使現時每日收入已逐漸回復至正常水平,但仍拖欠業主一月租金。陸先生大嘆:「老細(業主)都唔知我哋嘅苦況,一雞死一雞鳴,唔租咪要我哋走囉!」

因此,陸先生認為,政府對食肆的援助應更具針對性,現時食肆東主最大問題在於租金,即使政府陸續放寬防疫措施限制措施,亦只是「吊住條頸睇下邊個斷氣先」。陸先生感嘆:「人工可以商量,出住半個月先得,租冇得交一半㗎嘛,支票都搣爛你呀!」他又批評政府保就業政策不公,「超市咁好生意都唔知點解補咁多錢!冇生意又唔關佢地事,佢地又唔會請多啲人,比筆錢我我可以請多好多個人開分店添呀!我哋冇生意就死得啦!」

堂食放寬至6人 食客:無聊

泰國餐廳食客黃小姐對於堂食放寬至6人枱感到「無聊」,指「6個人坐埋一齊點解唔可以6個人一齊入去?好唔make sense囉!」她又稱目前疫情反覆的主要原因是「不明源頭患者成日都係唔知邊度爆發」,故政府應該在入境措施和關口方面再加斟酌。另外黃小姐亦稱政府應要平衡商家利益,「反正啲人都照出嚟食飯,行山啲人都照出去㗎啦」,認為限制食肆人數對控制疫情幫助不大,「搞死啲商家咋!」

另一位冰室食客黃小姐則稱,政府可再放寬食肆人數限制,「6個同12個都冇乜分別,都係同一個空間咋嘛」,加上食肆防疫措施充足,枱上放有隔板,不太擔心會增加感染風險,認為放寬與否「冇乜所謂」。

發表評論...