【金像獎2019】《三夫》《淪落人》未上已大熱 谷德昭:唔同玩法

撰文:洪曉璇
出版:更新:

第38屆香港電影金像獎將於今年4月14日舉行,作為年度影壇盛事,能夠入圍角逐獎項嘅電影、藝人、幕後功臣,通通升價十倍。不過大家發唔發覺,近年睇住份入圍名單時,會覺得有點陌生?作為影壇活躍份子嘅谷德昭都有同感,呢日佢上載同《三夫》女主角曾美慧孜合照,並喺網上留言慨嘆:「抱歉我還未看過《三夫》,不是不想看,只是看不到。」

谷德昭於網上分享,對近年金像獎多套未正式上映電影入圍角逐獎項嘅感想。(谷德昭Facebook)

谷德昭︰「一早預售晒,神心都冇用」
近年香港影壇趨向兩極,大型合拍片例如《無雙》入圍角逐多個獎項屬平常事。至於小本拍攝嘅本土電影例如《淪落人》、《非分熟女》、《逆流大叔》一樣獲評審青睞。但普羅大眾有幾多人真係有機會睇過晒呢d入圍作品?谷德昭話:「看過的都說曾美慧孜在《三夫》中的演技很出色,抱歉我還未看過《三夫》,期待。不是不想看,只是看不到。作為金像獎有份投票的一份子,曾經好神心地想睇晒嗰幾齣行內睇好會攞獎嘅戲,但真係冇辦法,就算上網搵到有一日有一間戲院上映幾場,但哈哈一張飛都經已一早預售晒,神心都冇用。」

曾美慧孜於《三夫》中表現亮眼,已入圍多個頒獎禮角逐影后,但真正睇過套戲嘅觀眾有幾多?(劇照)
蔡卓妍憑《非分熟女》再次入圍角逐金像影后,電影將於四月初正式上映。(劇照)
+6

【金像獎2019】吳鎮宇《逆流大叔》再提名影帝 秋生成最大阻力?

最想跟觀眾同步呼吸
根據金像獎官方網站列明參選電影資格,要上一年度「於香港作首輪公開售票放映,連續七天內於五十個座位以上的影院放映不少於五場的香港電影。」今年入圍名單中,《三夫》、《淪落人》、《非分熟女》、《G殺》都未曾正式上映,對於只睇過預告片嘅普羅大眾,對傳媒及行內人吹捧某一兩位候選人為大熱門,除咗不明所以亦無咩投入感。雖然谷德昭有辦法優先觀賞,但佢話:「我入戲院其中一個大原因就係同普羅觀眾撈埋一齊睇戲,同步呼吸、感受一齣戲。同業內人仕一齊睇戲,似開OT多過娛樂。」

黃秋生憑《淪落人》中演出成今屆金像獎大熱,剛剛亦勇奪第25屆香港電影評論學會大獎最佳男演員。(劇照)
+3

有人話香港片商開始以奧斯卡電影策略推港產片,即係小本拍攝作品會拎去參賽,入圍或得獎後多咗人認識再安排公開上映,自然收得最高效益,最明顯例子就係2018年金像獎於4月15日舉行,《黃金花》安排於4月12日上映,當毛舜筠及凌文龍分別勇奪最佳女主角及最佳新演員後,最終便帶挈有540多萬票房。

毛舜筠及凌文龍分別勇奪金像獎最佳女主角及最佳新演員,挾聲勢《黃金花》最終有五百四十多萬票房。(視覺中國)

【金像獎2019】《逆流大叔》牽頭 港產片靠多元化本土題材回春

谷德昭都不禁話:「巿道艱難,小本經營,如果能夠在攞到獎項後才挾聲勢上映,當然會有較好成績,完全明白。怕只怕金像獎會逐漸變成預告片,預告將會有什麼好片並已頒了獎項,普羅觀眾在之後才按得獎名單索驥。咁係咪唔得?又唔係唔得,因為符合了白紙黑字,只係唔同咗玩法。2019年,我感受最深嘅係 - 咩都唔同咗玩法。」

+2

即刻投票,揀選你心水男、女主角,仲有你最撐嘅香港電影,即有機會獲得戲飛。

《香港電影我撐場.民選大獎2019》投票專頁:https://voteforhkmovies.hk01.com/

發表評論...