【復仇者聯盟4】開賣日戲院打蛇餅網站癱瘓 3D版呢間$100有找!

撰文:陳穎思
出版:更新:

全城期待Marvel年度大作《復仇者聯盟4:終局之戰》(Avengers: Endgame),於今日(5日)0時0分起,公開預售24號上映日連續幾天的戲票,有影迷昨晚提早到戲院排隊,令現場出現「打蛇餅」情況,相當墟冚。而網上購票的觀眾,都紛紛表示戲院網站死機入唔到,可謂一票難求。

《復仇者聯盟4》今日0時0分開始預售,戲院網站相繼癱瘓。(網站截圖)

由於《復仇者聯盟4:終局之戰》片長達3小時,票價難免會再調高,3D IMAX版早場叫價160至260元,正場更去到290元,雖說《復仇者》系列粉絲眾多,但並非每一位都能負擔此等票價,小編今日化身格價專員,為大家搜羅最抵睇資訊,原來想以最低價睇3D版《復仇者4》,唔一定要去到無雷公咁遠,距離旺角10分鐘車程、100蚊唔駛就搞得掂!

MCL長沙灣戲院24號晚9點場只係95蚊,仲有唔少位剩。(網站截圖)

記者講緊嘅就係MCL長沙灣戲院,《復仇者4》普通3D版全日所有場次一律95元!以同類型戲票來說,如無意外應該係平霸全香港!長沙灣都算就腳,想睇早場或者放工、放學入場,都係同一價錢,暫時各場次都仲有唔少飛剩,大家仲可以去撲飛。

L Cinema一點前的《復仇者4》2D版場次只售45蚊,真係平到你唔信。(網站截圖)

《復仇者4》未上映,睇住預告精彩場面先

+27

筲箕灣2D版 下午1點前場次僅$45

不過想以最低價錢睇2D版,就要遠少少過海,位於筲箕灣的L Cinema一向出名夠平,下午1點前的《復仇者4》2D版場次,只係45蚊一張飛!你冇睇錯!係45蚊!記者打過電話去問,而家仲有位!有時間睇早場,搭車加食埋早餐,成件事都唔駛100蚊。不過留意,下午1點後嘅場次,就會收85蚊,反而MCL長沙灣嘅《復仇者4》2D版門票,全日都係75蚊。

巴黎倫敦紐約米蘭戲院嘅24號晚9點場,暫時一張飛都未賣出。(網站截圖)

屯門巴倫紐2D版有飛冇人買

除了大院線外,部分舊式戲院不設網上售票,例如備受影迷喜愛、位於紅磡的寶石戲院,記者致電戲院查詢《復仇者4》的票價,職員表示暫未確定會上映3D版還是2D版,所以未能決定票價,但由於片長關係,相信會比平日55至58元票價稍高。至於位於屯門的巴黎倫敦紐約米蘭戲院,只會上映2D版,早場票價75元,正場加多5蚊,記者查看24號上映當天、晚上9點場的售票情況,發現…一張飛都未賣出,各位唔想同人迫的影迷,不妨考慮一下。