【金像獎2019】《無雙》橫掃惹爭議 莊文強︰我仲有向20部戲致敬

撰文:
最後更新日期:

《無雙》在本屆金像獎一共獲得17項提名,最後更獲得7個獎項,可說是滿載而歸,成為本屆金像獎的大贏家,當中包括最佳電影。身為《無雙》的導演及編劇莊文強,更摘下最佳編劇及導演兩獎。

電影自推出以來,都備受爭議,最為觀眾詬病是有指創作上,跟荷里活舊作《非常嫌疑犯》有類近。早前莊文強參與亞洲電影大獎時,便接受《香港01》專訪,除說到自己的入行經歷,更講到《無雙》的創作由來,連網民的質疑都大方回應。

莊文強在頒獎禮未舉行前說最想奪得最佳攝影的獎項,皆因自己是編劇出身,一直被認定影像不夠突出,這次投放了很多心機進去,結果如願以償。(劉智源 攝)

諗過下半世教書
莊文強在1999年憑《失業皇帝》步入電影圈,今年亦是他入行的第二十年:「其實我開頭冇諗過入電影圈,嗰時我已經浪費咗五年時間喺呢行,做電視同時Part-time做電影,但嗰五年就冇乜收入,係剪過若干電影預告,拍過啲Making of,寫過啲劇本又冇人要,所以諗住讀個博士學位,以後可以教書,呃啲學生錢。」

可是在因緣際遇之下,莊文強還是步入了電影圈,工作接踵而來:「我辭咗份工之後就有橋,嘉禾總監莊麗珍小姐就叫我:有個劇本你過嚟幫下手啦,嗰套係《陽光警察》,幫幫下就俾隔籬嘅馬楚成導演搵我幫手做《東京攻略》,然後又被陳木勝導演知道我寫緊劇本,搵我去寫《特警新人類》,搞下搞下就到今日咁。」

莊文強一口氣贏得最佳編劇及導演,最後《無雙》更贏埋最佳電影,成為全晚大贏家。

莊文強以編劇的身份入行,2005年《情義我心知》開始兼任導演。(劉智源 攝)

兼任導演和編劇
在一部電影裡有導演和編劇雙重身份,莊文強說在處理上會比較方便:「其實導演同編劇係兩樣嘢,譬如好多時寫完劇本,未必一定實現到,導演就係要將文字變成現實。我自己又係編劇就好方便,譬如我做導演嘅時候要求個編劇改劇本,咁我就要求自己改,件事變咗易啲,唔使打電話。調返轉我係個編劇,我唔希望個導演亂咁改我個劇本時,同樣都係唔使打電話,自己同自己講就得。唔係話權唔權力,最緊要係方便!」

雙重身份除了有便利,在肩上的壓力也是兩倍:「如果自己兼任就有種我手寫我心嘅效果,啲嘢會直接啲,同埋贏同輸都冇得賴。好多時導演會賴編劇、有時編劇又會賴個導演,自己一個人就冇得賴。」自己要對電影的成績負責任。

《無雙》在香港累積票房3千萬、在中國大陸更獲得12.7億元人民幣的票房成績,以過億預算來說可謂非常可觀。(電影海報)

《無雙》的由來
原來《無雙》從劇本階段到在大屏幕上放映,一共花了九年時間,莊文強:「其實《無雙》個劇本出現喺2009年,嗰陣于冬先生第一個聽到,但呢個劇本喺當時係好敏感,原則上係過唔到內地審查,冇一個大嘅市場就冇大嘅資金去拍,就一直擱置咗。于冬先生一直都鍥而不捨,所以期間我都冇乜四圍Sell過,直到幾年前過咗審。」

當問到如何請到兩位影帝級人馬同場鬥戲,莊文強笑說其實幸運成份居多:「現實係你嘅Budget有幾多,係睇你嘅Cast有幾大。我一開始搵咗Aaron(郭富城),Aaron好鍾意個劇本,佢經理人小美姐睇到劇本又發現原來我寫緊周潤發,佢就幫我約周潤發,發哥睇完又好鍾意便應承,我先能夠有呢個錢去拍,可以話係運氣造就成件事,運氣比重好大。」

莊文強這個名字是障礙
莊文強已是業內有名的電影人,有一定地位,當被問到是不是莊文強這個名字已經是一個品牌,不用太費力去找投資者、演員,他極力否認:「唔係話有個名就得,始終人哋嚟買嘢你都要有件貨。其實我個名係一個障礙,啲人一聽到我個名就會話:『俾個劇本嚟望下!』大家都知呢行啲人都唔睇劇本,就聽個導演講個故仔。我成日都問啲演員:『你哋係咪恰我有劇本?』個個都問我攞劇本又留難我一番。」

+7
+6
+5

《無雙》劇本爭議
看畢《無雙》,有些人卻從中看到了1995年美國電影《非常嫌疑犯》的影子,莊文強正面回應:「你話似《The Usual Suspects》(非常嫌疑犯)嘛?其實我去咗世界咁多地方,好多人都有提到呢個問題,但大家都唔覺得係一個咩問題,只有香港最覺得係一個問題,反而內地都不覺得係咩一回事。」

莊文強又補充說道:「我諗《無雙》劇本嘅時候好想做到好似一首歌咁嘅結構,嗰隻歌叫《K歌之王》,譬如你睇《無雙》,好多人話睇到《The Usual Suspects》,其實你仲睇唔睇到其他更多嘅電影喺裡頭?作為一個電影愛好者,處理呢個劇本嘅時候我係玩得好開心,裡面有超過20部戲,亦都係某啲鍾意《無雙》嘅影迷搵到到箇中樂趣。」

想落力撐香港本土電影?即刻上Now E即租即睇專區,只需$22起就可以48小時內欣賞最人氣港產片!(按此

莊文強稱自己的抽屜裡有十幾份劇本存貨,類型都不一樣,相信會為觀眾帶來驚喜。(劉智源攝)

被問到在自己的電影中投入其他電影的元素是致敬,還是看完電影後太喜歡自己也不為意重叠了想法,莊文強則回應:「兩樣都有,尤其是我係一個咁鍾意電影嘅人,有時候忍唔到手㗎!咁好玩!我成日都講《無雙》係我同電影之間一個好大嘅玩笑,但呢個幽默得我自己知,真係好失敗。」談到新的電影計劃,莊文強說:「梗係有啦,唔係食西北風咩?要搵食加嘛!你係創作人,梗係有故仔想同人講嘅!」又坦言日後會較集中於編劇工作。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。