秘密訪客.專訪|郭富城自言是「順得人」爸爸 :絕不擺出嚴父樣

撰文:
最後更新日期:

由郭富城、段奕宏、許瑋甯、張子楓、榮梓杉主演,在韓國取景的內地懸疑片《秘密訪客》將於6日香港上映,郭富城日前接受《香港01》訪問,提及自己做爸爸以及戲中爸爸的分別,亦有分享拍戲過程中的趣聞。

郭富城表示大家將會見到他未曾示人的一面。(葉志明 攝)

城城在《秘密訪客》中是位富有人家,屋企做生意、在外國讀書且喜歡攝影,本想發展攝影興趣,但就因為被家人逼使回流接手家族生意,戲中他演的汪父在家中是話事人,任何事都要在他的控制之下進行,在他極強控制慾下,一家人似乎過得不太和諧。

郭富城講到:「劇本好紮實,個角色自己都未演過,係一個高冷、沉鬱嘅爸爸。」(《秘密訪客》劇照)

城城自言是「順得人」父親

當問及城城自己在家中又是位怎樣的父親時,他回應:「返到屋企就係個好踏實嘅父親,唔會將自己係個藝人、演員、歌手擺喺入面,點樣去建議幸福家庭,就係你要對所有嘢都包容、互相去體諒,同埋我係一個『順得人』,呢個好重要,我唔會擺出一個嚴父嘅角色,應該要去愛錫小朋友,佢哋做錯個陣要悉心教導,咩係啱咩係錯,而唔係話擺出姿態、大聲喝罵、好嬲咁就得,要有耐性,而呢樣都係我學習做父親嘅階段。」

另外,都有講到屋企小朋友曾產生「爸爸係咪偏心」的問題,不過他指出自己會在過程中觀察,告訴她是錯覺,雖然是難但都要盡量做到兩邊平衡。

城城希望同囡囡可以做到朋友的角色,大家會互相傾訴冇咩秘密。(葉志明 攝)

城城原來拍攝《麥路人》後緊接拍攝《秘密訪客》。(電影劇照)

同期拍攝《麥路人》、《秘密訪客》

及後城城表示:「呢個電影角色係我未演過,正正當時同期拍緊《麥路人》,唯一可以畀自己分開兩個角色,有個喘息嘅空間就係一個係全香港取景,一個就係喺韓國嘅大屋中實景拍攝,都有考驗到自己嘅情緒控制,每個角色都會有難度,係一個挑戰嚟,但我鍾意挑戰唔同角色。喺《麥路人》要捱餓,不修邊幅,球產同流浪街頭嘅人,而去到汪父佢係個好執著,外型、服裝、髮型都好講究,一着起套西裝,講兩句對白已經好形容投入其中。」

郭富城與許瑋甯主演的新戲《秘密訪客》,講述表面和睦的四人家庭,因住進一位陌生客,而出現「怪事」連連。(《秘密訪客》劇照)

十分欣賞同戲的演員

由於今次的男女主角不如其他愛情片一樣甜蜜,反而有種抗衡性、害怕在其中,問及城城會否因此而更覺得許瑋甯是位好對手時,他大讚:「瑋甯係一個好認真、努力、好容易進入角色情緒嘅一個演員,而另外兩個小朋友都係非常好演技嘅小演員,一個獲金馬獎提名最佳女配角(張子楓),相信另一位(榮梓杉)都好快會有提名,佢哋真係好聰明又有質素,真實又不做作。」

城城表示今次難度在於,劇組不是順拍而是跳拍,所以要一下子就要去到該情緒當中。(葉志明 攝)

城城指抽離角色好簡單 最近發展新嗜好

城城直言抽離角色好簡單,以前會玩賽車釋放情緒,一來因為疫情關係,二來自己發展了新嗜好:「好多年前開始自己會收藏、去買自己喜歡嘅畫,我喜歡藝術,突然之間睇到幅畫會有好多幻想空間,有時遇到自己喜歡都會收藏,唔一定係天價,可能係個新人,但覺得佢有嘢,又俾到感覺你。疫情關係少咗出街,又可以上網睇好多大師嘅作品,到自己真係好有興趣,時間又許可就搵老師,由書法開始學起,又演唱會應該會係8月後先開如,所以呢段時間發展個較為靜態嘅興趣。」

+9
+9
+9


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。