周潤發認真分析劇本寫到密密麻麻 「關乎香港電影要畀啲心機」

撰文:葉詩
出版:更新:

周潤發(發哥)周六(7日)獲浸會大學頒授「榮譽人文學博士」後,聯同畢業於浸會大學傳理系、又在電影《無雙》合作的莊文強導演與200多浸大學生舉行分享會。發哥談及由一個電視演員一步步走向國際舞台成為影帝,所以莊導演集中了解發哥成功之道。問到發哥每次收到劇本如何準備,發哥說:「會分析每一場戲,好似《無雙》角色係虛但我要做到實,要呃到觀眾,要點做到真?我會喺劇本做Mark,記得大學拍嘅一場,要到第二、三個Take 至捉到導演感覺,有時對白寫同講唔一樣,要化成角色口吻,所以每場我都重新寫對白、再做一次俾導演睇,要做好足準備,電影關乎到我前途、收入,好緊要,仲關乎到香港電影,支持香港電影係要畀啲心機。」

周潤發獲浸會大學頒授「榮譽人文學博士」後,與莊文強導演舉行分享會。

問到遇到唔好劇本又應如何處理?發哥覺得演員要放下身段,有時新導演被有經驗的演員震攝,所以演員要以謙虛態度去協助導演,演員職責希望導演成功,演員是去服務個角色、感動觀眾,發哥再補充說:「演員遇到溝通唔到嘅導演、唔太理想嘅劇本,演員唔好理太多嘢,只需要做好個角色,宜家演員太多顧忌、想做到咁做到咁、外國好多演員係經過訓練,做戲做到好自然,做戲好簡單,我好欣賞吳孟達,你覺佢演出好誇張、但依個就係佢嘅角色。」

+1

一向風趣的發哥又分享得到台前幕後愛戴之道,自爆當年在無綫不見天日拍劇時,不時會自掏腰包麻煩工作人員買豬扒牛扒,與台前幕邊拍邊「巴別橋」(BBQ),次數之多有日連盧海鵬(鵬哥)都忍唔住問:「你哋成日講條橋,其實喺邊?」

最後發哥以招牌式自拍與學生大合照,台下隨即起哄,發哥和莊導演走到台下官方合照時,又主動問學生開不開心,笑言將來得閒無事做,會回來再同大家分享。