林家棟親解畫四哥狀況 因為一個原因唔可以除口罩
撰文:陳穎思
出版:更新:
林家棟與王丹妮今日(1日)一同出席代言的保險品牌活動,二人合作拍攝宣傳影片,化身成特務夫婦,相當有型有款。
「四哥」謝賢在日前舉行的《第40屆香港電影金像獎》上憑《殺出個黃昏》封影帝,現身頒獎禮時有點嘴歪疑似健康狀況欠佳,身為這部電影的監製的家棟當晚全程傍實四哥,他今日受訪親自解畫四哥的狀況:「以我理解唔駛太擔心,佢換牙,比較大工程,特別係呢個年紀,會有呢個情況,加上人多,佢個私人醫生已經成日𥄫住我,唔好畀佢除口罩,點解呢?之前佢都考慮咗好耐出唔出嚟,因為佢擔心人多,有我全程睇住可以放心,先會出現,佢個嘴…因為換牙冇辦法,你叩我剝隻智慧牙都腫晒啦,撞正嗰日冇辦法。」
家棟笑言四哥得獎後沒有多謝他,反而問他「𡃁仔,幾時仲有得撈啊?」,家棟指已在為四哥籌備新劇本:「我話『你畀啲時間我寫下先啦』,因為其實要寫一個劇本唔容易,加上我要度返能夠讓佢變乜嘢,唔可以又再演同一個角色,但我慶幸佢成日問我幾時有得再撈,我覺得佢仲有個心好想去做,下次希望撮合佢同BoBo姐(馮寶寶)以Couple形式畀大家睇。」