有「金牌媒人」之稱的林盛斌（阿Bob）今日（17/2）現身電視城出席無綫真人騷《女神配對計劃》記者會。提到他作為真人騷主持要為5位女神梁敏巧、葉蒨文、關嘉敏、羅毓儀及李芷晴作戀愛配對，任務相當有挑戰性。林盛斌接受《香港01》訪問時表示：「其實呢個都係一個好重要嘅任務嚟，公司搵我因為知我係『金牌媒人』，想我喺呢個節目發揮呢一樣嘢，令到呢5位女神，可以同啲男士掀起話題，又令到大家可以好玩得埋，咁所以我嘅作用就係做穿針引線嗰個人。」

林盛斌續指：「而家全球招親，我都有叫身邊單身嘅男性朋友參加，有啲朋友好鬼怕醜，擔心要出鏡，而有啲朋友都會話俾啲時間佢哋諗諗。同埋我都有問過之前成功配對嘅醫生朋友，都叫佢哋搵身邊嘅醫生朋友去參加，呢排我都會努力咁再去搵嘅。（知唔知有冇水著環節？）其實我哋仲未傾到當中嘅細節，如果有泳衣咁梗係歡迎同支持，始終可以俾雙方知道大家嘅狀態，例如有冇紋身，因為唔係每個人都鍾意，咁所以都有一個參考價值喺度。」