行李箱於街上隨處擺放，毫無公德心！有啟德街坊於網上發文批評，啟欣苑近啟德零售館外有群來港觀看演唱會的人未有租借行李寄存櫃，直接將行李箱放在街上。照片見到，即使地盤圍板貼有食環署告示，警告「勿於公眾地方擺放雜物」，該群人也視若無睹。

根據香港法例第228章《簡易程序治罪條例》4A條「在公眾地方造成阻礙」，任何人無合法權限或解釋而陳列或留下，或導致陳列或留下任何物品或東西，而這些物品或東西對在公眾地方的人或車輛造成阻礙、不便或危害者，或可能對在公眾地方的人或車輛造成阻礙、不便或危害者，可處第4級罰款（2.5萬港元）或監禁3個月。

啟德零售館外大堆行李箱隨街放

有啟德街坊8月23日於Threads發文發相，指啟欣苑近啟德零售館外有堆行李箱四散放置在大街上，質疑是屬於來港觀看演唱會的人，指出「原本啲行李係四散，有好心人擺一邊免阻街咋」，怒斥「去啟德有錢睇演唱會，冇錢租儲物櫃，擺低就走晒去睇show」。

有錢睇演唱會，冇錢租儲物櫃

堆放約20個行李箱　無視食環署告示

照片見到，約20個行李箱堆放在地盤圍板旁，而圍板上貼有食環署告示，警告「請勿於公眾地方棄置垃圾或擺放雜物」。

根據資料，啟德主場館8月22日至23日舉辦「2026 TIMA國際音樂大賞」，活動雲集海內外一線頂尖藝人，包括多個韓國人氣團體及歌手。

網民：喺韓國睇演唱會都係咁

網民留言批評，「張食環告示真係諷刺，叫你唔好擺就偏要擺喺度」，又指出「竟然冇人偷咁X癲」、「主要係佢都冇錢租儲物櫃，你慌佢入面有好嘢咩？」、「Locker仲貴過佢件行李」、「佢哋諗住呢呢度天眼多冇人夠膽偷，叫啲好心人唔使咁好心由佢得㗎啦，你幫佢排好下次仲多啊」。

有網民直言韓國演唱會場地外也有同樣亂象，「喺韓國睇演唱會都係咁，一大排空嘅locker唔用（唔想畀錢），將堆篋放喺locker隔籬就算。而且佢哋出奇地團結，1個人放可能會俾人收走，但一堆人放，staff根本懶得處置」、「去韓國仲勁，成個公園都係佢哋啲嘢，主辦有得寄存佢哋可以因為懶同完場趕時間就唔寄存，日本就唔多覺有，可能因為日本真係會捉佢哋，佢哋一出國就濫用嗰邊啲人嘅公德心」。

網民建議：主辦方劃地方收費寄存行李

有聲稱於尖沙咀酒店上班的網民表示，「成日特登擺啲行李喺度博你唔敢掉，夜晚行完街先施施然嚟拎返！仲有，有幾次我經過K11 Lush埋邊個寄存櫃，我唔知係咪滿晒啦，反正有一大堆行李箱就咁擺喺度，至少二三十個，超級無恥」。

有網民認為，「香港無論商場定演唱會場地長期都嚴重缺乏租借locker/baggage storage」，又建議「主辦方可以劃1個地方寄存行李收50元1個」。

啟德體育園行李擺放亂象

其實啟德體育園自落成以來，吸引不少外地人士來港觀看演唱會或體育比賽，惟行李擺放亂象一直存在。TVB（無綫電視）節目「東張西望」早前曾報道，疑似有人利用鄰近啟德體育園的居屋單位，提供收費式行李寄存服務，日租50至80人民幣（約57至91港元），客源為來港看演唱會的外地人。涉事屋苑業主王先生（化名）指出，從去年12月起，就有1群閒雜陌生人進出屋苑單位，詢問後得悉是寄存行李，認為相關行為騷擾鄰居，批評提供服務的業主自私。

（Threads@yosuper101）