移英5年越住越摺!港媽慨嘆:感受到隱性歧視 為下一代啞忍惹議

撰文:田中貴
出版:更新:

移民不一定代表生活更美好,甚至住得越久,越想和當地人保持距離!近日有移英5年的港媽在Threads發文,直言在英國生活5年,「越來越摺,越來越唔想同英國人接觸太多」、「有時真係好唔鍾意佢哋」,原因是遭到歧視,「越留得耐,越feel到個隱性歧視。一見到你就目無表情、扮見你唔到,只因為你唔係白人」。

樓主更舉例「有時個staff見下一個係亞洲人,佢專登唔叫你過去,等你去另一個counter先serve下一個白人」,自己試過好幾次,「呢啲咁隱性嘅真係啞巴吃黃連。觀察力少啲都feel唔到」。

樓主質疑「有時唔係好明點解要留喺度受呢啲氣,呢度好多嘢都好落後,你見到啲人做嘢唔係為咗解決問題,而係想得過且過」,因此明白為何有人想回流,「但我望住個細嘅,知道此路(回流)不通」,目前希望小朋友「生性,第時有能力再去第度」。

樓主表示在英國生活5年,「越來越摺,越來越唔想同英國人接觸太多」,「越留得耐,越feel到個隱性歧視。一見到你就目無表情」。(AI生成圖片)

帖文引起許多網民熱議,分享更多在外國遭外國人歧視的經歷:

「我今日搭飛機同空少講Hello,佢目無表情,然後勉強笑一笑;兩秒後大聲同後面講 Good Morning,Welcome On Board,當然後面個個係白人」

「原來唔係剩係得我有相同嘅感覺,我間唔中去超級市場,Self Service Counters附近會有職員企喺度,我發現佢哋對本地白人態度友善,會打招呼同微笑,但對我係木口木面,甚至有啲X」

樓主明白為何有人想回流,「但我望住個細嘅知道此路不通」,目前希望小朋友「生性,第時有能力再去第度」。(AI生成圖片)

有網民認為歧視必然存在:

「都唔關流利英文事,其實唔使開口,望我哋個樣,佢哋都唔想招呼我哋」

「相反,我就係鍾意摺埋,英國好啱我,歧視呢家嘢係必定存在,就好似太陽照耀大地,周圍都有陰影,所以我唔會融入、唔會討好,英文夠用就夠,反正冇諗過喺到一世,就算以前住香港,大家都係分晒小圈子㗎啦」

有網民分享「我就係鍾意摺埋,英國好啱我,歧視呢家嘢係必定存在,就好似太陽照耀大地,周圍都有陰影,所以我唔會融入、唔會討好」。(《翻盤下半場》劇照)

但有網民分享不同經歷,稱去到英國很快就結識到很多朋友:

「今年係我喺英國留學嘅第4年…我一開始嚟到英國其實英文都麻麻哋,又得我自己一個過嚟,所以本身係完全冇朋友,但因為我有去玩唔同活動(做gym、返學、打拳、返工、做義工),所以我好快已經識到好多當地朋友,可能因為我住嘅係小城市普雷斯頓(Preston),亦可能因為我都比較外向,會成日同人打招呼,所以𠵱家每次出街都一定會撞到Friend Say Hi,而呢種體驗,反而喺香港比較少。所以我覺得如果你平時可以大膽少少、多啲small talk,例如買嘢嗰陣Nice啲講多句『You Alright, Mate?』、『Have A Good Day!』,自然就會吸引多啲正面嘅Interaction」

「我反而被同區香港人歧視過,同啲鬼反而幾friend。唔好畀某一段經歷或某一間公司某一個群組就認定所有英國人係咁,其實佢哋心地幾好,無香港人咁計較,係懶啲啲囉」

有網民指出,自己在英國經常參與不同活動,反而認識許多朋友。(AI生成圖片)

英國官方數據種族仇恨罪案上升

樓主的經歷是否屬於種族歧視難以核實,但英國官方數據顯示,當地種族仇恨罪案確實值得關注。英國內政部2026年10月8日公布最新統計,2025年4月至2026年3月期間,英格蘭及威爾斯警方共錄得146,825宗仇恨罪案,按年增加7%。當中涉及種族的仇恨罪案達107,926宗,按年上升9%,佔整體約74%,為各類仇恨罪案之冠。

白人遭種族仇恨比例遠低於亞裔及黑人

此外,英國官方於2025年公布的犯罪調查顯示,在2022年4月至2025年3月的統計期間,亞裔及黑人成年人遭遇種族仇恨罪案的比例均為0.7%,白人則為0.1%,前兩者比例為後者的7倍。不過,內政部提醒,警方紀錄不能完全反映實際情況,因為並非所有仇恨罪案均有人報警,而罪案紀錄方式亦曾改變。

英國內政部最新統計,2025年4月至2026年3月期間,英格蘭及威爾斯警方共錄得146,825宗仇恨罪案,按年增加7%。當中涉及種族的仇恨罪案達107,926宗,按年上升9%。(英國內政部官方圖片)

六成在英少數族裔認為種族歧視普遍

比起涉及刑事罪行的種族仇恨事件,樓主所形容的冷漠態度及隱性歧視,更難單憑警方數據衡量。英國智庫British Future於2026年9月15日發表種族平等研究,訪問2,009名白人及3,014名少數族裔成年人,發現60%少數族裔受訪者認為,種族歧視在英國日常生活中相當普遍。

調查更發現,46%少數族裔受訪者表示,過去1年曾因種族或國籍受到偏見對待,當中25%在公共場所遇到相關情況、20%在社交媒體遇到,14%則在職場經歷。另有44%少數族裔受訪者認為,英國種族不平等問題正在惡化。

研究結果反映,種族歧視並不局限於公開辱罵或暴力衝突,日常相處及工作環境亦可能出現偏見。

(Threads@aimee_ee9)