【職場】新人晚晚OT 「old seafood」日日早走 最忌搵老闆出頭
撰文：仲欐因
出版：更新：
轉新工本來是件開心事，但不幸遇上「old seafood」（資深同事）大玩「乾坤大挪移」，將工作卸晒畀你便拍拍屁股準時收工，初到貴境的你就真是有冤無路訴。因為上一篇「son」姐張慧敏已經講到，打工仔最忌試圖找老闆出頭，因為死的必然會是自己。既然投訴不得，打工仔可以如何是好？
明明打同一份工，點解人哋日日準時走，自己就要做到10點？(視覺中國)
除了將工作「外判」，「old seafood」通常年紀較大，往往會以照顧家庭為由未完成工作便準時「鬆人」。「son姐」教路，見人早走，新人最好別問「點解人得我唔得」。
「舊人有時確會做落舊制度，無褔利對方都不會做咁耐，可能請人時老闆已經知道對方要湊小朋友，畀佢準時走都未定。所以你不應問『點解』，人哋早走亦唔關你事。如你不忿氣硬要比較，老闆可以話『人哋交到咁咁咁成績，你交到咩呀？』，只會比氹自己踩。」
然而，「old seafood」未完成工作離場，令你要花更多時間處理是事實，對事不對人據理反映，就可以點出問題之餘而免做炮灰。「你可以平心靜氣反映：如果A、B、C同事走晒，我要留低處理件事會花多幾多時間，問老闆點樣可以令件事做得更好。如果老闆話做好自己事就可以走，你亦無需覺得唔好意思夾硬留多半個鐘或一個鐘；但如果制度上改變不了，你的工作其實就是要『執屎』，咁你都無謂浪費時間留低。老闆請你返黎為乜，自己多多少少會知。」
「son姐」強調，不公平的處境「幕後黑手」其實是老闆處理不善，因此嬲同事完全是錯重點，亦不應敵視同事，因為出問題的地方是制度。「揸住雞毛當令箭的人大把，但作為新人，幾時都應該先調節心態，放下比較、不忿氣和偏見，任何關係都要透過一齊合作『波來波往』的過程才睇得真，過早對人下定論並不正確。」
「old seafood」A字膊大玩「卸膊操」？ 「son」姐教你一招封佢門！