聖誕必睇《真的戀愛了》 經典示愛紙牌出自邊個手筆?

撰文:陳穎思
出版:更新:

又到聖誕~又到聖誕~除咗開P、睇燈飾同食大餐,睇戲都係其中一個慶祝聖誕嘅必備節目。歷年來有咁多聖誕電影,大家最鍾意睇邊一部?
相信15年前上映嘅《真的戀愛了》(Love Actually)會是心水之一。以下就同大家講講幾件有關呢部戲嘅趣事,其中當然包括最經典的揭紙牌示愛。

《真的戀愛了》講述10段感情遭遇,有喜有悲有窩心有心碎,扣在一起成為一部經典電影。

4大刪減情節

最初劇本原來有14段關係,但因篇幅所限,其中4段被刪走,當中兩段仲已經完成拍攝。未拍嘅人物故事同一位坐輪椅嘅女仔有關,而另一段係講Band仔錄歌畀同班女神示愛,但原來對方跟鼓手早已搭上。至於已拍攝的劇情就關於一對面對飢荒嘅非洲情侶,以及擁有同性伴侶嘅女校長。

路雲雅堅遜戲份不多,但對劇情起重要作用。

戇豆原來係天使

戲中飾演百貨公司珠寶售貨員嘅「戇豆先生」路雲雅堅遜(Ronan Atkinson),原來其角色最初設定係天使!其中一幕佢協助小朋友Sam喺希斯路機場突破守衛追女仔後,接下來佢會蒸發消失,證明佢並非人類,但導演Richard Curtis覺得這設定太Over而放棄咗。

更多劇照

+3
呢一幕成為日後很多表白場面的「參考」。

示愛紙牌係演員真跡

戲中Andrew Lincoln愛上好友老婆姬拉麗莉(Keira Knightley),最後更上演一幕浪漫紙牌示愛戲碼,成為經典電影場面。據演員受訪所講,每一張紙牌都由佢本人親手寫,「我跟住美術部嘅鉛筆筆跡去寫,真係我親手寫!」

雖然示愛方式好浪漫,仲成為往後好多影視作品嘅借鑑,但其實好多影迷都唔鍾意Andrew同姬拉呢一對,事關姬拉已經有老公,仲「戀搞好朋友」當眾Kiss,根本就係偷食。

重溫經典一幕

+16
咁樣唔係出軌係咩?

紙牌示愛本來不存在?

導演透露Andrew Lincoln向姬拉麗莉示愛嘅方式曾經有5個方案,仲專登向每一位女同事徵詢意見,其中一個方案係男方在女方屋外花園擺滿玫瑰花,但頭4個方案都係換來女同事「妖妖」聲,最後先揀到紙牌示愛。

片尾嘅真實片段好Sweet。

片尾接機場面係真偷拍

雖然戲中並非每一段關係都有完美結局,但片末加插嘅路人機場接機畫面就夠晒溫馨。原來劇組真係於禁區外設置攝錄機,花了一星期時間去捕捉這些畫面,並非預先安排嘅偽偷拍。

作為觀眾睇到呢一幕,都戥曉格蘭特尷尬。

曉格蘭特最痛苦演出

著名影星曉格蘭特(Hugh Grant)於戲中飾演英國首相,與家傭展開一段浪漫故事。但原來曉格蘭特本人並不特別喜歡呢部作品。「我唔明《真的戀愛了》點解仲咁受歡迎,一到聖誕個個都會睇,都好嘅」,佢仲話其中一幕熱舞戲係佢拍過最痛苦嘅場面,頂自己唔順。