公務員一向被視為「鐵飯碗」，吸引不少年輕人爭相投考，但近日有職場小薯反映，覺得「公門深似海」，入到去未必如想像中風光！最近有新入職公務員發文控訴，指入職後面對極度壓抑的辦公室文化與職場欺凌，甚至壓力大到有情緒問題，掀起網民對「政府工神話」的熱烈討論。

日前有網民於Dcard討論區發文，請各位新入職紀律部隊/公務員的90/00後，「你哋到底係點捱過probation（試用期）」。PO主表示入職第一個星期已經發現「唔對路」，原本以為做政府工有鐵飯碗，怎料入職後要面對的是恐怖的職場欺凌與高壓監視，令她大呻「日日大壓力到有情緒問題」，工作環境甚至「衰過坐監」！

力數5大職場苦況

1. 擺款玩小圈子欺凌

前輩自我感覺良好，高高在上，只要其中一個不喜歡新人，就會「夾埋其他人黎玩職場欺凌」。

2. 假關心設陷阱痛罵

表面打著「我而家塞錢入你袋」、「我都係為你好」的旗號，問到未學過的事情還裝作親切鼓勵「試下估啦又唔會X既」，隨後即被痛罵：「你on9架？咁都up得出」，「每一句就有毒既，句句X落黎，但又唔知X乜，成日雞蛋裏挑骨頭。」

3. 極致雙重標準同監視

老屎忽停手沒事做「坐喺度吹水就得」，新人做著事與旁邊同事傾兩句都不行；事主身子弱平均一年看5-6次醫生，就被指責像「日日射波咁樣，個個都黎生咁上身咁」，但前輩自己生病請假卻理所當然，令她覺得一直被監視「衰過坐監」。

4. 升職全靠「埋堆」

上位不看能力只看政治關係，有能力又識埋堆的「坐火箭咁升」，無能者上位後連累下屬「咩豬頭骨都要啃」，升官後更會反過來「玩9你班散仔、新人」。

5. 待遇與發展不如預期

沒有雙糧花紅兼「醫療又冇，退休之後冇醫療」，要等多十幾二十年兼「同啲大佬打好啲關係」才敢想升職，跳Point慢，人工回報甚至不如私人市場。

網民熱議：現實市況更殘酷

帖文引發不少網民熱烈討論，有打工仔勸喻PO主，雖然政府工難頂，但私人市場市況更殘酷，「你自己有幾多能耐喺出面同人撞先？私人市場利益至上嘅老闆會比較大包容心？甚至NGO非牟利機構入邊一樣都會有呢啲西文化」、「私人點可能薪金好好多呀，專業職系政府講緊多成倍呀」。

不過，亦有大批網民表示同情，但仍然「保飯碗要緊」，「做政府工真係高壓，第一日返工個office靜到耳仔痛，身邊啲senior同chief都會mon住你」、「心理健康比起賺幾多錢更加緊要，唔適合真係冇辦法」。

過來人傳授生存法則

至於打算繼續留在體制內的打工仔，有過來人傳授公務員體系生存之道：「返工就返工，唔好喺工作上諗太多多餘野，淨係做自己職位本份，唔好手長，唔使特別要同人打好關係。保持對同事友善關係，只傾公事唔傾私事，淨係諗點唔得罪人就已經夠。」