【犯罪現場】李璨琛喪屍造型現身？　「當汗水混埋一齊好逼真」

電影《犯罪現場》正式上畫，在戲中跟古天樂飾演同黨的李璨琛，本想淡出跟老婆（蔡潔　飾）過安穩生活，可惜被一直被仇家釘住，最終更在經營的洗衣店中被放炸彈，一齊被炸。而為這一幕，琛仔更化了一個火燒妝，不過睇落更似喪屍，都幾應節。

電影講以古仔為首的打劫集團，被仇人逐一滅口，古仔由通緝犯變成偵探，要搵出到底邊個對付緊自己。一直緊隨古仔的李璨琛，因為太太懷有身孕，已改邪歸正開洗衣店，結果仍避不過追殺，被放炸彈炸死。

問到今次拍攝，琛仔大讚夠逼真。「試造型時，化妝師將個妝試在一位同事身上，大半身都血肉模糊，已經覺得好震撼。到正式拍攝，因為我仲有件衫在身上，要化的範圍細了，但依然好嚇人。尤其今日又熱又濕，當自己的汗水跟化妝料融在一起後，感覺好似真係流緊血一樣。」

至於扮演懷有6個月身孕的蔡潔，雖然不用化火燒妝，但就對這間洗衣店的佈置讚歎不已。「在門口看以為是一間真的洗衣店，入到去才知是劇組搭出來的，好逼真。加上今次爆炸場口要一鏡過，第一次在身邊發生猛烈爆炸，好難忘。」