狂舞派3專訪｜Lokman顏卓靈受盡觀塘之苦︰最搞笑有個page專鬧
榮獲金馬獎6項提名，隔足8年終於推出續集的港產片《狂舞派3》由黃修平編劇及執導，今集顏卓靈（Cherry）和楊樂文（Lokman）繼續在戲中飾演情侶，早前兩人接受《香港01》訪問時分享了拍攝內外的感受和趣事，更大談對觀塘的睇法。
攝影：葉志明
有冇諗過拍唔成續集？
其實《狂舞派3》隔足8年才面世，雖然導演黃修平自認手腳慢，但演員方面又有冇諗過會拍唔成續集呢？飾演Hana的顏卓靈率先回應：「冇喎！佢（黃修平）有冇同你講話想再拍續集？佢個語氣都好firm（確實），佢係個啲我說故我在個啲人嚟，講咗就係自己對大家嘅承諾，最近都夠挑起佢條癮話一定要拍，咁佢講到咁firm，今集都係啦，都係因為佢上一次謝票時不斷講，所以係好相信佢一定會（拍）！」而繼續飾演Dave的Lokman則表示：「我就順其自然嘅感覺，因為導演有時就開咗個頭就擺一陣，之前再蘊釀一下搵到方向再同我哋講，我係期待嘅，但都知佢有呢個做事模式，所以都係再等下先啦咁樣，慢工出細貨。」
有冇試過喺觀塘塞車塞到崩潰？
顏卓靈和Lokman一聽到問題都大笑，顏卓靈：「成日啦！」Lokman：「唔係塞車，有時行路都崩潰，唔記得係咪《狂舞派》去完美國返嚟定咩，第2日就要係食晏時間喺觀塘出現，真係有好強烈嘅對比，覺得真係有啲辛苦！」顏卓靈再補充：「以前未真正入行，好多試鏡都要嚟觀塘，當時眼裡只有捉緊機會，成日都要喺人群穿插，好似跳舞咁，以舞步攝嚟攝去避人，更加唔可以撞到人，要快到好似流水咁，有時都會笑返自己頭先喺到做乜，當大個咗再去返觀塘就開始有種唔係幾好嘅感覺，後來發現原來有好多人都好唔鍾意觀塘，最搞笑係仲有個page（專頁）！大家都係苦難中have fun（作樂）！」
為咗夢想、事業去到幾盡？
Lokman：「我覺得以前同朋友傾偈，朋友有句說話好影響到我，可能我哋做呢行或是藝術係比較任性，甚至乎係唔生性，但係佢話『我將前途、以後嘅時間、所有嘢投放喺最鍾意嘅嘢到，有呢個咁大嘅賭注，係咪真係任性同唔負責呢？』呢句說話對我嚟講係好大嘅鼓舞，同時間我覺得好多嘢都係做盡咗再算啦，諗咁多都無補於事，做咗先，所有嘢都盡力做，跟住自己鍾意嘅嘢做咗先。」
顏卓靈：「我覺得有時我去到好盡，但去到好盡又發覺太盡個人會hand hand地機（壞機），都要抖下，所以係一個起落嘅過程，盡過一排都要鬆返，抖咗一排，好似最近疫情，到好返啲又會衝啊咁樣。」
點擊睇更多靚相：
顏卓靈
Hair：Hugo Poon
Makeup：Winki Tsang @vinciwinki.com
Outfit：Diesel
Accessories：initial Accessory
Lokman
Hair：Leo Fan @ Chic Private I Salon
Makeup：Cori Wong @AnnieG.Chan Makeup Centre
場地：Green Tomato Limited