一秒拳王|魔鬼教練梁博恩堅持跟足拳法 周國賢:未試過咁辛苦

撰文:沈洛嘉
出版:更新:

熱血打拳電影《一秒拳王》由ToNick成員趙善恆自編自導自演,同場更有周國賢(Endy)、張建聲、泰國小鮮肉《出貓特攻隊》Nonkul、林明禎,現時票房已衝破400萬,票房成績的確得來不易,當中有份訓練眾人的動作指導的梁博恩中前接受《香港01》訪問,他都有講拍攝過程中的辛酸。

《一秒拳王》現時已擊破400萬。(官方圖片)
提起《一秒拳王》,恆仔十分感謝大家支持。(葉志明 攝)

其實日前恆仔出席《#PTGF出租女友》時,笑言拍《一秒拳王》時非常辛苦,著記者一定要問下教練梁博恩:「點解嗰時要咁糟質我哋啊?」今日記者致電梁博恩,其回應爽直有力:「唔糟質佢哋點會有而家嘅成果呢~哈哈!其實一開頭都係當佢哋正常學生咁教,出拳、步法,不過後來都係因為唔夠時間,得返兩個月時間,所以要當佢哋真係出賽拳手咁去操,大家喺片尾見到嘅鐵皮屋其實喺天台上面,每日上去都要先行6層樓梯,已經熱好晒身,呢間鐵皮屋真係為佢哋而設,真係地獄場所嚟。」

為拍攝電影《一秒拳王》,梁博恩訓練周國賢和趙善恆。(照片由受訪者提供)

點解會稱之為地獄場所呢?恆仔透露:「其實第一次上去真係暈低,因為特登唔開冷氣,又要花好多體能,真係會抖唔到氣,加上好多時間我哋一路度劇本動作,本來都只係坐喺到,度度下就話起身嚟試下喇!就又開始打架啦!」而梁博恩就講到當時真係好熱,同埋再將佢哋由0操到100真係要谷到盡,他都有試過跟恆仔一試在擂台上真正打一次,好讓他感受一下,他:「其實佢哋已經學咗好多,不過到真係要打個陣未必轉得切,所以會亂、驚同埋唔習慣。」

梁博恩大讚周國賢最有打拳天份。(照片由受訪者提供)

周國賢最有打拳天份

至於問到邊位學生最好又有邊位差一點點時,梁博恩大讚:「Endy好好,佢真係好有天份,可能佢又白紙一張,加上又好信任我,真係叫佢做咩都照做又做到,阿聲(張建聲)就差啲啲,因為佢初嚟個陣因為上一部戲所需身型問題,較為重同遲鈍,入面有個鏡頭佢亂打,反面Endy好純熟咁避開晒,不過Endy一開始已經受咗傷,某程度上對佢嚟講都有唔少難處。」

周國賢自己都話:「咁大個仔未試過捱得咁辛苦。」(《一秒拳王》電影劇照)

梁博恩續指出:「本身大家見到Endy都係好瘦,佢真係好努力谷盡晒出嚟,又要增肌、飲蛋白粉,佢真係好厲害,佢自己都話『咁大個仔未試過捱得咁辛苦』,呢班男仔有樣好,佢哋又唔會頂唔順,反而一大班一齊操,有時仲會鬥做得多,你做十下我就十二下,真係好有心!」

電影《一秒拳王》拍攝花絮。(照片由受訪者提供)

唔會隨便放過佢哋

梁博恩跟一眾演員打成一遍,同出同入,一齊捱過咁刻苦的操練,問及他有冇因此而放過一班大男孩時,他:「我好執着呢啲細節位,拳法要打得準打得啱先可以過關,觀眾都會識睇、識打拳,絕對唔可以求其。而且監製都有俾壓力我架!要佢哋一定有腹肌,影相先會好睇,仲好記得阿聲戒得最清,仲着住膠衫焗汗去操,務求早日成功修身。」

梁博恩笑言:「唔糟質佢哋點會有而家嘅成果呢~哈哈!」(照片由受訪者提供)

林作有機會贏

近日林作、鍾培生9月舉行的「林鍾一戰」拳賽成為全城熱話,問及梁博恩覺得林作有否勝算時,他:「勤力操會有機會嘅,鍾培生本身有底子,林作想贏一定要加緊訓練,知道佢搵咗向柏榮做教練,師傅都一定會有一套拳法去對付對手,有得打嘅。(身形點先會有優勢?)當然高大會有優勢啦,比如你出拳伸直手都會先擊中對方,加上你嘅身型同埋反應都好大影。」

《#PTGF出租女友》開鏡日,恆仔跟鍾培生都有同場,恆仔表示未有機會跟對方交流打拳。(葉志明 攝)
+15