調教你MIRROR|鍾雪瑩被姜濤捉實手兼揉手指 「拍完都驚俾人話」

撰文:沈洛嘉
出版:更新:

ViuTV節目《調教你MIRROR》,當中除了有MIRROR 12位成員以及梁祖堯外,最新兩集更請來《狂舞派》導演黃修平以及《殺出個黃昏》的新晉演員鍾雪瑩,一齊調教MIRROR做戲以及揀出一位「最佳演繹」成員。

姜濤出招捉實鍾雪瑩隻手。(節目擷圖)

鍾雪瑩令姜濤緊張到手震?

今集講到由姜濤先跟鍾雪瑩對戲,不過一開始姜濤已經手震,鍾雪瑩問他是否好驚,姜濤笑言:「有點吧!」及後緊張的姜濤開始唔記得對白,一於自行創作,出奇招捉實鍾雪瑩隻手,令到一眾MIRROR成員都為劇情走勢而感到相當緊張。姜濤更突然爆肚問她:「MIRROR入面你最喜歡誰?」鍾雪瑩則回應:「唔話你知,不過最鍾意係你。」姜濤又再突然爆自己就係姜濤,笑爆全場,更有人即時大叫︰「放開佢隻手!」

點擊即睇更多:

+16
鍾雪瑩笑言節目出街後都有少少擔心。(鍾雪瑩IG)

姜糖留言支持

鍾雪瑩今日(18/6)接受《香港01》訪問回應:「最近自己都在工作,未有時間睇節目播出,不過IG今朝都收到不少姜糖和鏡粉的inbox,未睇訊息時都真係有點手震同驚。(拍個陣驚唔驚?)反而拍的時候盡量去配合對方,都係比較自然,拍完之後都有擔心過,但節目播出後粉絲們好好,會inbox留言鼓勵同多謝我,更指自己睇得好開心,多謝我去同MIRROR交流,(有冇多咗Followers?)冇特別留意,但都應該有少少。」

鍾雪瑩在《狂舞派3》飾演BabyJohn女朋友。(鍾雪瑩IG)

其實鍾雪瑩今年才26歲,為商業電台的DJ,既是演員又是填詞人,把把刀都一樣咁鋒利,她早前曾演出過ViuTV劇集《教束》、《無限斜棟有限公司》,電影《狂舞派3》飾演阿良(BabyJohn)女朋友等,在最新作品《殺出個黃昏》中更是扮演四哥謝賢的「孫女」。鍾雪瑩笑言今次有份演出《調教你MIRROR》全因黃修平導演介紹,她直言:「《狂舞派3》是我首套電影,今次導演叫我去幫手其實係好開心,反而同Lokman就未有太多交流,因為當時即使大家同場都沒有對手戲。」

Jace多首作品都是鍾雪瑩填詞。(鍾雪瑩IG)

四哥出場似摩西過紅海

再講到《殺出個黃昏》時,鍾雪瑩憶述自己在一次903互外Band Show,首次見到四哥,當時因為謝霆鋒擔任壓軸表演嘉賓,她驚嘆:「四哥到場時當時大家就似摩西分紅海一樣,感受到他好有地位,大家極尊重,加上在太陽眼鏡低下的四哥極有神秘感又帶丁點冷漠。」因為鍾雪瑩在戲中飾演四哥的「孫女」,問到初印象跟真正認識的四哥反差有多大時,她笑指沒太大反差,但就發現他為人十分友善,是位開心且健談的人。

而鍾雪瑩在現場都有主動跟謝賢傾偈,謝賢都有講到︰「其實我有一個任務,就係帶住班新人。」又笑言︰「我都係跟他們(新人們)學嘢!」

當時24歲的鍾雪瑩要扮演15、16歲的小女生,但絲毫沒有違和感。(劇照)

最後鍾雪瑩成功獲得《殺出個黃昏》一角都有個小故事,林家棟曾說該角色試了很多個不同演員,本來已揀好一位,直到鍾雪瑩的出現才落實揀她,而她都是後來才得知。她憶述:「據我所知,身邊有好多朋友都有去試鏡,自己試完都等了好一段長時間,直情忘記發生了這事,到後來接到一個電話跟我說『有點事想同你傾傾』,最終得到通知電影將於2星期後便會開拍,自己當然開心,相對來說較為平靜,因為得兩星期時間,比較注重在如果做好件事和準備好心態上,當時24歲拍要扮15、16歲,要令自己變得細個一點,更貼近角色。」

點擊即睇更多:

+6
發表評論...