分手專家|曾樂彤演新阿寶感壓力 陳家樂:七師傅拍戲緊張好好笑

撰文:沈洛嘉
出版:更新:

由葉念琛執導,陳家樂、曾樂彤、馬思惠、黎峻等人主演的英皇電影《分手專家》今日(29/9)在舉行煞科儀式,曾樂彤首次擔任女主角之餘更要飾演新任「阿寶」,她自言都有壓力同緊張。

《分手專家》會由一班人組成一個團隊,專門去拆散情侶。(葉兆康 攝)

曾樂彤和陳家樂先講到各自的角色,曾樂彤:「呢個阿寶係個好固執,一就一、二就二嘅女仔,面對我同另一個拍拖3年嘅男仔,係一對好貼地嘅情侶,但就因為發生金錢上糾紛,導致成為了分手專家,而陳家樂就係呢個團隊入面的大師兄。」陳家樂:「我係一個智慧型嘅大師兄,佢哋呢班小朋友蠢得濟,我就會獻計去統籌一件事嘅主要人物,但係後來大家就會發現每次都有好多狀況發生。」

陳家樂笑言七師傅拍戲時更加搞笑。(葉兆康 攝)

提及今次有不少新人參演,陳家樂表示:「今次係好玩,又有好多新鮮嘅組合,就好似七仙羽師傅同阿Bob組成一對,所以都好期待。(片場嘅七師傅係點?)佢拍嘢個陣係好好笑,但佢唔拍嘢個陣係好正經,佢都會緊張,拎住劇本問『我第一次做點算呢』都會問我點做,我就話師傅唔緊要㗎,你做咩都啱㗎,你個特色就係你做咩都得先好睇。(七師傅喺戲入面係咪做返師傅?)唔係,師傅唔係做返師傅,不過都係個會談戀愛嘅人。」

曾樂彤和陳家樂笑言未知會否合唱主題曲,不過曾樂彤就確定會唱其中一首。(葉兆康 攝)

曾樂彤講到自己飾演新任「阿寶」都會緊張及有壓力,她:「其實導演好好,佢俾咗好多空間我,又會同我哋排戲,大家都會好直接講出啲問題,除咗某啲好重要嘅場口,其他都好享受。」最後問到電影講分手,陳家樂有冇好心痛的經歷時,曾樂彤即時在旁幫口:「個個都有㗎啦,而家咁開心,而家咁開心咪得囉。」陳家樂補充:「我就唔記得晒㗎喇,總知過咗去我就唔記得㗎啦。」

+6