分手專家|練美娟爆公司曾要求「執執個樣」:我極力爭取話講唔會

撰文:沈洛嘉
出版:更新:

由葉念琛執導,陳家樂、曾樂彤、馬思惠、黎峻等人主演的英皇電影《分手專家》今日(29/9)舉行煞科儀式,而在電視劇《大叔的愛》中以Carmen姐一角入屋的練美娟,首次拍電影表示興奮又緊張。

《分手專家》今日(29/9)舉行煞科儀式。(葉兆康 攝)

問及娟姐是否在《大叔的愛》後準備開展演員之路時,她笑言:「我好開心《大叔的愛》之後都有啲導演、監製想認識我,今次真係好開心葉導搵我參與佢一年一度嘅愛情作品。其實你睇我個打扮就知同以前角色好唔同,希望可以俾到新鮮感觀眾。(導演有讚你喎!)係咩?導演好鬼馬,佢唔會喺你面前讚你,如果佢真係咁講件事就真係真嘅,佢可能驚我囂啊。我好慶幸佢發掘到我另一面,竟然夠膽搵我去做呢啲角色,我真係多謝佢。」

娟姐笑言自己今次個妝似60歲。(葉兆康 攝)

及後娟姐補充今次擔任類似反派、較為惡的角色,跟她以往滿有傻氣、時常大笑的好不一樣,當收到劇本時都在想:「你(葉念琛)究竟喺邊個節目或範疇見到我呢面,覺得我可以勝任呢?內心都有懷疑過嘅,但做落去佢都有好好指導同教我,希望出到嚟大家會覺得除咗Carmen姐之外都可以做到其他嘢。」

娟姐講明唔會減肥、整容。(葉兆康 攝)

事實上今日娟姐的妝較為濃,問到是否為了要扮惡特地化得更濃,娟姐回應:「啲人成日都話我個樣好老積,似3、40歲,我覺得我呢個妝係有60歲,你哋覺得呢?呢個妝簡直係要退休嘅妝嚟,應該係職場嘅老屎忽嘅樣。」

最後問到有冇曾被公司要求減肥或整容時,她直言:「開頭公司真係有要求過,想我清減少少,然後我極力爭取同佢哋講『其實我瘦咗又同一般靚女有咩分別?喺大海之中見到一樣嘅靚女,即係我肥得嚟都靚都討好咁先至係獨特啊嘛』,我就最鍾意獨特,如無意外,我都同公司講聲,我唔會減肥㗎!哈哈!」

+6