若然有重要約會應預早出門，而非要求司機「衝紅燈」！有的士司機在其經營的社交平台專頁貼出影片，顯示他日前接載1名趕往應約的女乘客，在燈口處明顯看見亮起紅燈情況下，竟被對方兩度要求「過咗先」，他事後幽默稱「過咗就真係仙」。

網民批評女子自私，「唔計扣分罰錢，發生意外點算」、「遲到好過去唔到」，亦有人調侃女子，「莫非趕住投胎」、「佢約咗閻羅王」。

的士乘客趕時間　司機被要求衝紅燈：傻的嗎

該的士司機分別在facebook、threads、Instagram等社交平台的專頁「的士佬奇遇記」上傳影片，質疑「親～你趕時間，就要我搵命搏？傻的嗎？」，並標籤「過咗先過咗先，過咗就真係仙」、「睇住對家幾架車出都叫我過」、「雖則不能同年同月生，但更加唔想同佢同年同月同日死」。

燈口明顯亮起紅燈　女乘客兩度要求衝紅燈

影片長約15秒，當時樓主駕駛的士駛至灣仔萬麗海景酒店對出的會議道，當時燈口處明顯亮起紅燈，不過後座趕着赴約的女乘客竟然要求樓主「過咗先過咗先，無時間」，其時已經有1輛大貨車從右方轉入樓主正前方行車線，女乘客見樓主沒有回應，再次要求「過咗先啦司機」。樓主面對催趕，只能傻眼向對方表示「紅燈呀小姐」，片段至此告終。

網民斥女乘客漠視安全：趕時間就早啲出門

許多網民斥責該女乘客的要求無理，「趕時間就早啲出門」、「世界真係無奇不有，叫人衝紅燈」、「真係以為世界圍住佢轉」、「你約咗人大過危險駕駛，你個腦放咗床下底呀」、「紅燈加黃格點同妳去呀？」、「就算趕飛機，都係咁話啦」、「遲到好過去唔到」、「若然呢個乘客有駕駛執照，真係累死好多人」。

咁X自私都有，唔計扣分罰錢，發生意外點算

有人則調侃該女乘客，「莫非趕住投胎」、「佢約咗閻羅王」，另有留言笑稱「你同佢講：你落車跑，到綠燈我前邊接返你」、「落車叫佢自己揸呀」。

（Facebook「的士佬奇遇記」）