【全民造星II】決賽或對撼無綫頒獎禮 花姐:唔知公司有冇咁諗!

撰文:
最後更新日期:

ViuTV最強自製綜藝節目《全民造星II》的99位參賽者日前已順利誕生,並隨即安排一眾新丁秘密練兵,迎接6月23日首次開廠錄影,不過據了解製作團隊早已開始零碎拍攝工作。監製「花姐」黃慧君率先透露,今屆將於9月底起周一至周五晚橫線播出,每集一小時,直至11月最後一個星期常規比賽結束後,小休一回,12月中才舉行總決賽,剛好跟無綫慣常舉辦「萬千星輝頒獎典禮」的日子撞到正,莫非「花姐」刻意為之,希望借助《造星》成功捧紅MIRROR與ERROR的威勢,以今第二屆參賽者的粉絲效應,掀起一場久久沒有在香港電視界發生的「兩台大戰」,由姜濤領軍與台慶頒獎禮主持Do姐(鄭裕玲)決一高下?

撰文:游大東

事隔不足一年,ViuTV再次製作新一季《全民造星》,並於5月初在其總部落戶的九展商場內舉辦大型招募,一眾參賽者,包括經已確認入圍的洪助昇(最後排右二)、胡學軒(第三排,站在Ian和Anson Lo中間)、嚴政(最後排右六)以及吳啟洋(第三排右四),與師兄MIRROR及幾位《造星II》的導師一同合照。(資料圖片)

官方六月公布《造星II》99人名單 部份入圍者IG「劇透」

雖然ViuTV要等到六月中才公布《全民造星II》(簡稱《造星II》的入圍名單,但不少參賽者早已興奮得在自己的Instagram帳戶搶先「劇透」,只要用「#全民造星2」這個標籤搜索一下,就會找到好些焦點人物及他們的最新資訊和排練情況。綜合Instagram、《明報周刊》和《香港01》報道,成功獲選為《造星II》99強的,包括大熱人馬洪助昇(Aiden)、胡學軒(Alfred);YouTuber嚴政(Wallace)、吳啟洋(Phoebus)、陳軍政(Cotton)與黃浚銘(波仔/Boris),以及9位曾於去年參加第一屆比賽的9位「再戰軍團」 ── Aka@Supergirls的表弟容穎賢(Kenny)、「酒粒仔」趙敬賢、梁德忠(Tank)、何駿廷(Ting Ho)、王焯南(Louis)、黎官驟(Sunny)、何志浩(Derek)、溫明龍(Zero)和崔可迪(Lucas,阿Lu),還有Kay Chan(@guitarcck)、湯皓深(@oscartong1111)、兩蚊(@roy_moon_king)、凌峰(@tsuilingfung)和曾啟剛(@lokitsangsimple)等等。

《造星II》的賽制將會跟第一屆有點不同,不再將所有入圍學員分開兩組較勁,而是悉數接受劉美君、Eric Kwok以及火火3位導師教導,圖中另外兩人分別為音樂總監MCgroovy(左)以及舞蹈總監耀老師(右)。(資料圖片)

第一屆《造星》反應理想,花姐接受電話訪問時指,《造星II》的製作預算方面跟往年差不多,不過節目對於廣告商的吸引力是有增加:「今年係比上年好,但你話係唔係比上年好好多?又唔覺真係好好多,不過Sales真係容易Call咗,有啲品牌喺節目未開始前已經Approach我哋,但我又好衰,要睇啲Sponsor適唔適合我哋個節目,唔啱嘅我情願唔要!」至於《造星II》的冠軍獎金是否照舊有100萬港元?她大賣關子:「未能公布!」(資料圖片)

5月開工9月首播 冀爭取更充裕製作時間

據《造星II》的製作團隊透露,現時節目已開始零碎拍攝,6月23日才會首次在ViuTV九展總部開廠錄影,並安排於9月底首播。監製「花姐」接受訪問時承認,今年《造星II》的製作期較去年第一屆來得長,亦來得早,但常規播放集數反而由60集縮減至40多集,旨在令製作團隊和參賽者有更充裕的時間準備。「因為今次播放時間長咗,《造星I》係45分鐘一集,今次係會播一個鐘。上年我哋個節目喺7月世界盃決賽之後出街,今次就Plan咗喺9月底,點解要提早到5月中就開始Recruit(招募)同埋拍攝呢,因為上一屆啲嘢好急呀,變咗節目頭一段嘅後期做得唔夠好。」

「花姐」解釋,去年留意到《造星》播放初期,無論內容篩選和節奏控制都未如理想,令節目吸引力大打折扣,汲取經驗後,今年決定盡量提早拍攝,冀能騰出更多時間可以花心機去經營頭幾個階段的節目內容,「睇番上屆,參賽者其實都唔係好夠時間訓練,因為我哋要趕住播出街,所以要佢哋盡快比賽,結果播咗兩個星期之後,就已經要開始比賽(99強進50強),於是乎,佢哋為咗要遷就開廠嘅密度,Training嘅時間變相係少咗,所以今年想拖番長件事,因為我真係希望可以訓練班參賽者,想見到佢哋去到第2、第3 Round已經有進步,而唔係去到節目後期先見到。」據《明周》報道,《造星II》雖然跟第一屆同樣有99位參賽者,惟賽制有變,不再分開兩組競賽,而是悉數接受劉美君、火火、和Eric Kwok等導師的訓練,去到50強後才會分開十組對壘,除了依照唱歌、比賽和演戲的表現評分,製作團隊更會設置很多陷阱,參賽者要爭取入圍,就得過五關斬六仗,花姐更坦言有打算讓MIRROR回到戰場,與《造星II》一眾師弟比試實力,務求令節目更吸引,甚至有可能成為下半年用以對撼無綫的「最強武器」。

游大東其他文章:

【鐵探.專訪】棄百萬片酬回娘家    吳廷燁唔後悔:圓咗個心願!

【全民造星.專訪】三甲未慣爆紅成焦點    姜濤:有人圍住部𨋢揮手

【胎Story.專訪】寫劇本講生B辛酸   黃詠詩親解:點解阿媽咁煩?

【咪搞啦!】過埋50周年   TVB應取消台慶的三大理由

姜濤去年10月勝出《全民造星總決賽》奪得總冠軍後,旋即成為新人王和廣告界寵兒,風頭一時無兩,一眾「姜糖」為之瘋狂!(資料圖片)

去年10月舉辦的《全民造星總決賽》,最終由大熱的姜濤(中)、陳卓賢(Ian,左)及楊樂文(Lokman,右)奪得三甲。(資料圖片)

《全民造星》成功讓更多觀眾認識ViuTV這家才成立3年的新電視台,就連周慧敏這種級數的藝人也願意為總決賽擔任評判和頒獎嘉賓(她跟花姐認識多年,也是《全民造星》的忠實擁躉),可見這個節目的品牌效應有多利害。(資料圖片)

《全民造星總決賽》稱得上是ViuTV自2016年4月開台以來,最成功的自家製大騷,這幕一眾《造星》參加者跟創作主題曲《前傳》的李拾壹於台上又唱又跳,氣氛絕不遜於無綫製作的綜藝大騷。(資料圖片)

據《明周》報道指,花姐承認有想過安排MIRROR回到《造星II》戰場跟師弟一決高下,唯獨沒有ERROR份兒。「記得有次我跟MIRROR聚會,說要將他們放回去比賽,當時他們的反應很踴躍,個個都話好,因為他們很Enjoy比賽的過程,也想看看自己的實力,現階段我未有任何決定,但一定不會將ERROR放進去,因為他們比較獨立,我一直都說MIRROR是AKB48,可以愈來愈多成員,可以大家一齊做一件事,亦可以個別或出現不同的小組,所以應該說MIRROR更像一間學校!」(資料圖片)

沒想過讓決賽對撼無綫頒獎禮 花姐:咁樣度節目會容易諗歪!

事實上,ViuTV因為憑《造星》捧紅了MIRROR和ERROR,當中奪得冠軍的姜濤更是近年罕見的新人王,極速成為本地廣告客戶新寵,他的粉絲更可以用瘋狂來形容,每逢偶像所到之處,都會聽見她們尖叫吶喊的聲音,洶湧程度不輸一眾飛來香港宣傳的韓流藝人,另邊廂,就連無綫高層樂易玲也曾公開稱讚MIRROR「幾靚仔,幾有活力!」證明大台也不敢小覷這股來自競爭對手的新力量。

如今《造星II》捲土重來,由9月底一直播至11月底,總決賽更於12月中舉行,跟11月19日無綫台慶和「萬千星輝頒獎典禮」的慣常舉行日子撞到正,這個安排,是否意味ViuTV有意掀起香港電視界久久沒有出現的「兩台大戰」?花姐坦言今趟製作新一屆《造星》沒有這個意識,「我唔知公司的Program部門(節目部)會唔會咁諗,但我自己度嘢,去製作一個節目呢,就冇呢個想法,因為我以前亦都係喺TVB做過,我成日都覺得,當一個製作人有呢個(對撼)諗法去製作節目嘅話,個人就會好容易諗歪,會諗一啲懶係Gimmick嘅嘢去打人哋,咁就唔係真係為咗個節目,所以我唔會咁諗,做好自己就算,至於公司到底有冇呢個諗法呢?我就唔知道喇!」

坦白講,無綫舉辦的《萬千星輝頒獎典禮》從來都只是一場騷,很多人批評這個節目是名副其實「圍威喂自己人揀自己人」,無助推動本地電視業發展,不過你有你鬧,無綫繼續照辦,而且很懂得掌握主流觀眾的八卦心理,將藝人的私生活變成節目的一部份,製造話題,去年蕭正楠於領獎期間宣布已經跟黃翠如結婚,隨後更公開錫錫,就是一例,如果今年一屆與ViuTV《全民造星II總決賽》同時間正面對撼,相信會是香港近年罕見的一場電視大戰。(資料圖片)

無綫年年都會播《萬千星輝賀台慶》,講真,內容十年如一日,你仲想唔想睇?(資料圖片)

假如今屆台慶,又是麥明詩與一眾小花臨時拉扶學跳舞跳到「甩晒Beat」,而ViuTV則可能派出晉身《造星II》總決賽、歌精舞勁的小鮮肉又唱又跳,你會想睇邊一個節目?當然,你可以兩個節目都不看,反正今時今日,電視節目選擇多的是。(資料圖片)

冀先做好內部溝通 加強網絡宣傳讓觀眾盡快認識參賽者

花姐說的「做好自己」,除了是指節目內容本身,亦包括節目宣傳及與公司內部的溝通,事關去年《造星》播放期間,曾有不少人取笑ViuTV的社交網絡推廣部門,指他們不懂網絡平台的宣傳方法,比如直接將每一集《造星》最關鍵最精彩的內容足本放上網「開心Share」,觀眾變相不用開99台追看,花姐笑言:「聽講其實唔只我嘅節目有呢個問題,好多時佢哋都係咁,我覺得主要都係因為佢哋唔係太多人手去做呢樣嘢,而且係要同時負責好多節目(宣傳),根本冇乜時間去消化整個節目,所以先會有呢個問題,佢哋會覺得最方便就係拎一段最精彩嘅片段出嚟畀大家睇就得喇,所以先會有呢個問題。」

花姐認為,礙於經驗,上屆在網絡做宣傳也是亂衝亂撞,效果平平,來到今年,應該會有進步,但跟完美距離仍然很遠,她又坦言,與其要求負責社交網絡推廣的同事,於極短時間內了解整個節目的來龍去脈,再找出重點決定如何推廣,是吃力不討好,所以今次她希望可以為他們多走幾步,讓更多觀眾知道《造星II》,「我嚟緊諗住話想喺Social media做好啲,可能會係,除咗節目入面嘅內容之外,我就搵多一啲真係精華嘅嘢畀大家睇,因為我知道呢一集或者呢個人嘅Selling point係乜嘢,係觀眾未睇留意到嘅,再加埋節目本身睇到嘅嘢,去剪一個Promo(宣傳片)出嚟,甚至我哋剪埋畀佢哋,咁佢哋咪唔需要花太多力氣去做囉。」而花姐口中所指「觀眾睇唔到嘅嘢」,就是指節目以外的內容,她說希望可以在比賽前後,在社交網絡平台上發放多點參賽者實際的受訓情況,盡早讓觀眾認識他們。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。