躁男大鬧麥當勞!1原因罵足5分鐘震撼全場 喝令職員:你出嚟呀!

撰文:李納德
出版:更新:

新年流流最好和和氣氣,但總會出現例外場面。網傳影片拍到初三(1月31日)赤口有名大叔大鬧馬鞍山新港城麥當勞,他疑不滿店員表示無法送餐,「佢話冇得送餐,冇人送呀,冇得送呀!」,在經理旁大鬧「我唔係要向你投訴佢,我係要直接向麥當勞嗰邊投訴佢」。被投訴的女店員反駁自己說話被扭曲,「我好客氣咁同你講㗎」,大叔即呼喝「你出嚟呀!你驚呀?」。

目擊者指該大叔因為出餐誤會「大大聲罵足5分鐘,全個場都聽到嘅」,讚揚店員已極盡克制,「大家都應該互相體諒,唔好咁多怨氣」。網民群起批評大叔,「你可以投訴,但係你應該有基本嘅禮貌」、「愈X愈大聲,仲要以為自己好威」,店舖客人多人手不足時未必能兼顧好送餐服務,揶揄大叔「識行識走送乜X嘢餐 」。

網民拍到1名大叔在新港城麥當勞和職員理論,要求索取另1職員名字及資料作投訴。(「bigchickenlittlethings」Threads影片截圖)

樓主在Threads上傳影片,指初三(1月31日)攝於新港城的麥當勞,「初三赤口,大家忍下口啦,出餐有誤會啫,唔使咁樣鬧人嘅」、「阿叔不斷話要投訴,記錄下員工係克制嘅」。

不滿未能送餐 索店員名字資料投訴

片段所見,藍衣大叔站在櫃檯前和1名相信為分店經理的女職員理論,他指向鏡頭外位置,情緒激動說「我宜家問佢咩名呀?我宜家投訴埋佢呀!」。片段未清楚錄下女經理回應,但大叔聽後明顯未下火,「你畀個名我,我宜家又唔係投訴你,我係要投訴佢,我唔係要向你投訴佢,我係要直接向麥當勞嗰邊投訴佢,你畀個名,畀佢啲資料我得啦」。

大叔強調:「我唔係要向你投訴佢,我係要直接向麥當勞嗰邊投訴佢。」(「bigchickenlittlethings」Threads影片截圖)

女經理低頭處理事務,大叔突然大喝「咩叫冇得送餐呀?」,經理向其他人交代事宜時,大叔再喝「咩叫冇得送餐呀?了解咩啫,好簡單,我問幾時有,佢話冇得送餐,冇人送呀!冇得送呀!」,大叔指着手機「咁即係點呀?錢都畀咗!」。

被投訴的女店員開聲反駁,大叔呼喝女職員「你出嚟呀,你驚呀」。(「bigchickenlittlethings」Threads影片截圖)

呼喝女店員:你出嚟呀!你驚呀?

被投訴的女職員發聲:「先生,我頭先唔係咁同你講,我好客氣咁同你講㗎。」大叔指住對方說「你宜家話唔係呀,咁你話冇呀嘛,係咪冇呀?」,再呼喝女職員「你出嚟呀!你驚呀?」。女經理則繼續安撫大叔情緒。

樓主稱罵足5分鐘「全個場都聽到」

樓主無奈指,即使員工有出錯,「唔使大大聲罵足5分鐘,全個場都聽到嘅,員工真係唔需要受咁大壓力」,新年流流也不必因為小事「開波投訴人」。他認為餐飲業員工應得到基本尊重,提供送餐服務也加重員工工作量,「薪金有冇調整呢?」、「p.s.最好畀飯鐘錢員工啦」。他又指現時香港社會氣氛以至經濟環境欠佳,「車公求籤都話唔樂觀,大家都應該互相體諒,唔好咁多怨氣」。

大叔不滿質問「咩叫冇得送餐呀?」。(「bigchickenlittlethings」Threads影片截圖)
大叔追問經理「咁即係點呀?錢都畀咗」。(「bigchickenlittlethings」Threads影片截圖)

網民斥大叔態度惡劣

影片引起熱議,雖有網民認為「錯就預咗畀人鬧㗎啦,個收銀克制啫,但明顯被鬧個方無囉」,但絕大部份網民不滿大叔態度惡劣,「你可以投訴,但係你應該有基本嘅禮貌,唔應該將麥當勞嘅職員當係你嘅出氣袋」、「赤口真係特別容易火遮眼架喎!條四眼佬好似乘機搵交嗌咁」、「買個餐以為自己係大爺」。

網民揶揄「識行識走送乜X嘢餐 」

不少人認為客人較多時,職員未必能馬上提供送餐服務,「識行識走送乜X嘢餐 」、「有手有腳,要咩人送餐呀!餵埋你食好唔好」、「除非係老弱傷殘、或者帶住啲小朋友唔方便行開就有理由需要送餐啫,係有手有腳就咪X揀送餐啦」、「有手有腳係可自己取餐嘅,不過得1個人自己去搵到位坐,出去取餐又無人幫手留住個位,先唯有揀送餐」。

網民嘲「憑當眾鬧人去獲得自信」

網民又認為有部份市民喜歡當眾鬧大集團快餐店或小店員工,發現別人做錯事就當眾狂鬧,「仲要係愈多人望就愈X得大聲愈唔收口,而佢哋講嘅嘢同眼神俾人覺得佢哋冇教養不特止,仲要係憑當眾鬧人去獲得自信」、「大把呢啲人,越X越大聲,仲要以為自己好威」。