搭乘公共交通工具遇到如此無品乘客，實在令人氣憤！本港社交平台瘋傳影片，顯示在城巴巴士上，有大叔因為講電話時不停大聲爆粗，有乘客勸阻對方引來爭執，更被大叔以侮辱性詞語辱罵，之後更演變成車廂罵戰，不少乘客加入「戰團」，紛紛批評大叔的不是，最終需要停車報警，等候警方前來調停。

不過大叔等候警方其間未有收斂，繼續以粗言穢語辱罵乘客和車長，甚至搬出特首李家超、國家主席習近平、一國兩制等，語無倫次對話令車上乘客相當無言。片段曝光惹來網民圍剿大叔，「講粗口問題唔大，嘈到人先係」、「成車鬧佢，佢都覺無問題」、「一啲教養都無，話唔好講粗口就講習近平」，並建議巴士公司「blacklist佢啦」，擔心對方暴躁的情緒會影響司機駕駛，繼而引發意外。

阿叔搭巴士　大聲傾電話兼爆粗

該男乘客在threads帳號「cw_inger」上傳共3條影片，指於周三（7月1日）晚上搭乘城巴930X路線巴士，坐在他後方1名阿叔估計正在和人通話，但因其間多次大聲說出粗言穢語，即使樓主當時已經戴上降噪耳機，坦言「都俾佢嚇親」。

乘客勸止被粗口辱罵　車廂爆發罵戰

樓主指，及後有乘客忍不住上前提醒阿叔「講粗口唔啱」，對方開始大吵大鬧，不斷向乘客爆粗。樓主形容對方「覺得自己講粗口冇問題」，更以「廢柴」和帶有侮辱性字語辱罵其他乘客，之後車長停車上前調停，但阿叔未有收斂，連車長都慘被辱罵，最後需要報警處理。樓主看不過眼阿叔行為，質疑「其實唔係好明呢啲人咩心態」，同時感激當時車上所有見義勇為的乘客以及車長，「辛苦晒你哋」。

阿叔向車長爆粗　挑釁男乘客：過嚟！

從其中一段影片可見，該戴眼鏡、穿著黑衣的大叔站在車廂通道情緒激動，正以粗口斥責車長「X你老X呀」，車長指對方若然再說粗言穢語將會報警，不少乘客見大叔態度氣焰，紛紛表示支持。大叔之後指向車長，「你屈我呀！」後方有男乘客要求大叔「唔好嘈」，他便轉身指向車尾喝斥對方「你收聲啦，X你老X」，又挑釁男乘客上前「過嚟！」待男乘客上前後，有乘客擔心兩人會動手，於是在旁勸架「唔好郁手呀」。

乘客憂釀打鬥出手分隔　大叔持續氣焰斥男乘客：死道友

不過大叔似乎未有理會，並稱男乘客為「道友」、「關你X事咩」，見兩人不斷貼近火藥味甚濃，有原先坐在座位的乘客都擔心雙方會因口角繼而動武，於是伸出手分隔二人，並勸喻男乘客冷靜，「你由佢（阿叔）唔講道理啦」。大叔之後繼續咄咄逼人，斥男乘客「你個死道友」，對方不忍被罵反擊，「你唔好X話我道友呀，我係瘦啲咋，唔係道友呀」。

大叔和男乘客持續爭執　被批評在車廂講粗言穢語

大叔之後懶理對方，坐在座位又「辣火頭」斥責司機不應開車，「你屈X我」。大叔前座另一名男乘客看不過眼，開始和他爭論，被斥「我問司機，關你X事呀」，男乘客之後指對方剛才在座位大聲講粗口，質問對方以上行為「咁你嚇親我啱唔啱呀」，大叔則反問他「你係咪驚呀？」雙方爭拗不斷，男乘客批評大叔「講粗口已經唔啱啦，你見我咁耐都無講過粗口」。

2女乘客「夾擊」　阿叔無言以對提出報警

大叔質問「邊個話唔啱？」有女乘客聞言即時指責「你宜家係影響成車人呀，先生」，大叔反駁「你話呀，你唔好屈我呀」，另一女乘客助攻表示「我都驚呀，我心臟病㗎」，後方女士忍不住發笑。大叔面對2名女乘客你一言我一語「夾擊」，戰鬥力似乎大減，片段終以大叔提出「報警呀」而告終。

車長調停兼被辱罵　累巴士停駛

另一影片可見，大叔仍然和乘客爭拗中，大叔隨即搬出香港特首李家超、以及國家主席習近平、甚至提到一國兩國制，然後向車長連番輸出粗口。車長於是要求對方「尊重吓自己啦」，批評大叔既然乘搭他所駕駛的巴士，但不斷以粗口辱罵，「咁你即係鬧緊邊個呢？」大叔即時「大帝」上身，指「你（揸車）係應份㗎…」，但話還未說完被車長完美反駁，「我收咗份糧緊係應份揸車啦，我緊係要捍衛城巴利益啦」大叔之後似乎稍有語塞，未有像之前般激動，只能淡然稱「真係X你老X臭X，黐X線」。

大叔不滿車長助乘客轉乘巴士　斥女乘客錄片偏袒司機

當時巴士經已停下，相信已報警正等候警方前來，估計車長需要下車安排其他乘客轉乘另一輛巴士，但大叔又開始「發功」，批評司機不應下車，車長解釋他要協助「過客」。大叔不滿稱，「過客係你幫佢哋每一個扶佢咩？」獲車長理所當然回覆後，大叔又轉向另一面女乘客，質疑「你影埋佢（車長）啦，做咩淨係影我呀，X你老X臭X」，再次情緒激動站起身，女乘客即時喝止「你唔好行埋嚟，麻煩你褪返後」、「我鍾意影邊個咪影邊個囉，我㗎嘛部機，關你咩事呀影邊個」。

大叔思維跳脫！　提到國家主席習近平　車上鴉雀無聲

再有1段影片顯示，大叔仍然坐在座位，突然向乘客、車長談到國家主席習近平管治香港話題，如此跳脫思維和對話實在令人難以跟上，然後又繼續大聲辱罵車長，「你廢，話你廢就廢」、「你老X臭X真係好X廢」。雖然片中未見眾人神情，但估計都不想再和大叔爭論，所以完全沒有人再予以回應。

網民斥大叔自私兼擾人：成車鬧佢，佢都覺無問題

片段引來大批網民圍剿大叔無品，「講粗口問題唔大，嘈到人先係」、「冇人想聽你同人吹水嘅內容」、「成車鬧佢，佢都覺無問題」、「以為自己好X型，型到盡頭便是X」、「真係九唔搭八，一啲教養都無，話唔好講粗口就講習近平」、「咁嘅身型仲成日咁躁，因住爆血管」，又揶揄「壞到老，要鐵拳教育」。

建議巴士公司將大叔列入黑名單：影響司機揸車

有人覺得巴士公司應該將大叔列入黑名單，「阿叔叔明顯係病…狂躁要食藥嗰種」、「其實咁樣影響司機揸車情緒，有機會會發生危險」、「巴士公司blacklist佢啦」。樓主之後透露，當警方來到時，大叔仍然保持一貫囂張態度，「只不過冇講粗口咁解」。

根據香港法例第374D章《道路交通(公共服務車輛)規例》，巴士乘客不得使用不良或冒犯性語言或作出不守規矩行為，及不得故意妨礙或阻撓車輛司機或獲授權人或分散其注意力，違者可罰款5,000元及監禁6個月。

同場加映：港鐵阿伯手機大聲播影片　被乘客勸說爆粗狂鬧　網民斥：自我中心

在公眾場合，請使用耳機觀看手機影片！有港鐵乘客於網上發文表示，在車廂內目擊有阿伯用手機大聲播放影片，隔1個座位的男子不滿聲量，勸說阿伯「唔好咁大聲開speaker」，就被阿伯以一輪粗口辱罵。

網民批評阿伯，「愈嚟愈多呢啲人，年紀大聽唔到就戴耳機，開到大大聲，真係好煩」、「佢哋真係自我中心到1個點」，又讚出聲勸說的男子，「四眼哥哥情緒好到呢」，並提議港鐵增設「禁聲車卡」。

有網民認為樓主應加入勸說，「你淨係拍片，其實沉默等如幫兇，有人開咗聲，你加把口成件事唔同晒」、「希望大家每次見到呢啲狀況，除咗拍片之外，都可以上前幫拖加把口，不要令做正確事情的人孤單」。

該港鐵乘客於Threads發文發片，指出「個男人只係叫個伯伯唔好咁大聲開speaker，就俾人粗口話」。影片長38秒，見到坐在優先座的阿伯叉開雙腳坐，爆粗罵隔1個座位的男子「X頭，傻X」，然後繼續用手機大聲播片，隔了幾秒，疑心中怒火仍未平息，指着手機質問男子，「X你老X，咁大聲？」，意即不認為自己手機聲量大。

港鐵阿伯手機大聲播影片　被乘客勸說爆粗狂鬧

男子冷靜說，「你知唔知你繼續係咁嘅話呢，不斷製造緊你嘅證據畀人去捉嘅啫」，阿伯繼續爆粗「X你老X呀，證據」，又指「個個都係咁講，你做咩唔出聲呢？」。男子直言，「你知唔知你繼續喺度犯法嘅啫」，阿伯續用聲勢壓人，「犯你老X，趷我呀？郁我呀？傻X」，影片就此完結。

網民：好心附近啲人幫下口

有網民認為樓主應加入勸說，「好心附近啲人幫下口，呢啲人多人X就會淆底」、「真心見到要幫口X返個阿伯，有時呢啲人一係就聲大大靠惡，一係就恃老賣老，總之欺善怕惡，畀埋下台階都繼續爆你」。

樓主回覆網民說，「對不起，我當時真的不敢插嘴入去，我只是拍下了」，又說「我覺得那個伯伯很無理取鬧，如果片中嘅男人見呢嗰post，想同你講聲你超勇！」。

網民：得1個人係嘈交，多過1個人就係社會教育

網民向樓主表示，「希望你下次有勇氣，幫X係必須，得1個人係嘈交，多過1個人就係社會教育」、「再有咁嘅情況要幫拖XX件X老，件X老多數都會縮，你唔幫拖只會助長不合理事件發生」。

有網民則指出，「其實你幫手錄片已經好好，知道你未必夠膽當時出聲，但係你錄咗片就有證據，其實你下個站落車直接搵職員，佢犯晒港鐵條例，又騷擾又講粗口，港鐵職員會自己同佢傾，你就唔使自己同佢嘈」

（threads＠cw_inger）