老翁獲派公屋想住回劏房!嘆隔音差:鄰居鼻鼾都聽到 惹網民熱議
成功上樓未必代表居住環境一定有改善!本港有老翁近日在Facebook群組「公屋討論區 - 香港facebook群組」發文,詢問「有冇人係本身住劏房;然後派到樓,住住吓覺得衰過住劏房,再租返劏房住?」,帖文引起許多網民熱議,樓主留言解釋,自己獲編配的是位於藍田的長者住屋,屬1人單位,面積只有約8平方米,「唔係講緊租金平定貴,係講緊環境同舒適度」。
樓主形容獲派的公屋單位「細到唔係人住」,而且「隔音差」、「隔籬扯鼻鼾都聽到」,反問「如果你上咗樓之後,晚晚冇覺好瞓,住劏房嗰陣晚晚有覺好瞓,你會揀邊樣?」。
大量網民得知樓主情況,仍然認為公屋好過劏房:
「公屋點差都唔會差過劏房」
「房署有冇揸槍求你住? 咁鍾意劏房,咪畀返間屋房署」
「單人共用廚房廁所都有150呎,1,500蚊租,住咗之後,除非人工變為26,000元以上才會要交雙倍租,1,500蚊你喺香港租個廁所都唔得」
但亦有網民同意樓主看法:
「共用廁所嗰啲長者屋,隨時係衰過劏房」
「其實係, 租劏房住好寧靜,公屋好X嘈, 同埋自己在劏房又係自己喜歡嘅地區」
「未入住已經覺得劏房大好多,又方便,8分鐘行去觀塘站,但租金平3倍都無奈接受。以前我1間房150呎擺到2個大衣櫃,4呎半床,仲有公用嘅廳廚廁。𠵱家230呎包埋廁所廚房,無位整衣櫃,床頂有半個衣櫃仔」
更有網民提出可行方法:
「戴降音耳罩啦」
「如果噪音問題,搵房署跟進」
房委會於2000年停建長者住屋
部份舊式長者住屋的居住環境問題,早已引起政府關注。根據香港房屋委員會資料,「長者住屋」最初為單身長者而設,主要採用院舍式設計,部份單位需要與其他住戶共用廚房或浴室等設施,私隱程度與一般獨立公屋單位有所不同。隨着市民對獨立生活空間的需求增加,房委會早於2000年決定停止興建長者住屋,並由2009年起停止編配一型設計長者住屋。
房屋局2025年7月在立法會回覆議員質詢時亦承認,部份長者住屋及改建一人單位需要共用廚房及浴室等設施,設計已變得不合時宜,因此鼓勵有關住戶調遷,逐步收回單位並改建作一般公屋用途。
公屋住戶特殊情況可申調遷
對於已入住公屋、卻因居住環境影響生活的住戶,房屋署設有不同調遷機制,讓符合條件的租戶申請搬往其他公屋單位。其中公屋住戶如因特殊情況,包括健康或社會因素,難以繼續在現居單位生活,可向所屬屋邨辦事處提出邨內調遷或特別調遷申請,並按個案需要提供醫療或社會評估證明。
遇噪音滋擾可向屋邨辦事處投訴
至於「公屋租戶紓緩擠迫調遷計劃」及「改善居住空間調遷計劃」,一般以每名認可家庭成員平均佔用少於7平方米室內樓面面積作為基本申請門檻。因此,若樓主所述8平方米是房署正式記錄的室內樓面面積,而戶籍只有1人,單憑面積細小未必符合相關計劃資格。
另外,若單位長期受到噪音滋擾,住戶亦可向屋邨辦事處投訴,要求管理人員調查及跟進。不過,正常生活聲響與違規噪音滋擾並不相同,能否採取扣分等租務管制措施,仍須視乎實際情況及調查結果。