【求職個案】超級資歷卻有2年湊仔空窗期 獵頭助搵工前大改造

撰文:
最後更新日期:

單親媽媽在市場上會欠缺競爭力嗎?有時CV和profile不夠「靚」或已封塵一段時間,又可以如何重新與市場上的求職者競爭?文字所顯的經驗固然重要,但畢竟文件是死的,人是活的,憑熱誠、投入、準備充足下,同樣可以感動到對方。

獵頭人久保從事獵頭工作近8年,為不少求職者及公司找到合適的工作及人選,但當中,他都遇過不少奇情事件。以下為他於著作《獵頭公司奇情實錄》分享的個案。

女人生完BB、離開job market一段時間會貶值?﹙GettyImages/VCG﹚

撰文:久保 

每逢月尾,都係recruiters做最後衝刺的日子。呢個時候我主要做call客催offer、call candidate sell個offer、推動雙方簽約辭職。務求可以令到所有嘢都under control:譬如防止個客lowball個candidate(試過好多次同某幾個客講咗自己嘅candidate's expected salary,通常都話冇問題,但去到最後往往會少幾千元)、又或者防止candidate接受counter offer,月底前簽約下個月返新工。

自己印象最深刻係幾年前,我有個客戶要請receptionist。印象咁深刻係因為當時我同客戶嗰邊嘅HR一齊合作,改變咗一個單親媽媽嘅人生:幫佢搵咗份工。當時係Q1最後一日,close咗一張幾有意義嘅placement: 一個只做過三份工、因為生小朋友冇做嘢兩年嘅A grade candidate (Big4 + 香港上市公司 + fortune 500 *財富世界500大,世界知名公司排名榜)。

行內稱之為 "classic profile"。最近求職處處碰壁,記得兩個星期前同佢見面,佢有少少徬徨,唔明白點解自己仲未搵到工。呢個時候,我諗起初入行嘅時候自己成日見一啲junior candidate、因為家庭、私人原因冇做嘢一段時間又或者係CV唔夠靚,自己好想幫佢哋搵到工,但往往send俾啲客都石沉大海。當時上司同我講:

唔好再嘥時間係呢啲profile上面,因為大部分客戶都唔鍾意咁嘅profile,除非你去到一個位可以令到啲客好信任你,咁樣就可以sell到。

自己嘅習慣係send candidate profile時往往寫一段嘢介紹個candidate,希望可以立體啲形容、俾到個概念客戶。今次呢個情況,一份進取嘅email同一段詳細嘅candidate summary可以幫到佢。我將佢個profile send去一啲decision maker,例如係CFO、VP﹙副主席﹚或MD等,終於幫佢約到幾個job interviews。嗰晚半夜con-call個客出咗offer,下星期返新工!

久保為求職者半夜con-call客人出offer,非常盡心盡力。﹙GettyImages/VCG﹚

當時客戶係做成衣批發,辦公室喺香港仔,返四日,星期五係半日,佢哋想請一個receptionist,人工$23000。因為地點關係,就算返工時間好好,都唔係太吸引。但係有一個candidate一星期內打過超過十次電話俾我又send咗佢份CV好多好多次,但係因為佢有幾年冇返工,而我又好清楚個客需要一啲咩類型嘅candidate,所以我不以為意,直至收到呢位candidate親筆手寫嘅一封信,我決定要幫佢攞到呢份工作。

介紹返先,佢叫Ivy,個小朋友三歲,因為遇人不淑,所以離婚之後辭咗工照顧小朋友,靠積蓄同前夫嘅贍養費去生活,而家小朋友開始大,所以佢想積極投入返個市場賺錢養家俾好啲嘅生活小朋友同家人。Ivy屋企同我個客嘅公司距離只不過十五分鐘,加上人工唔差時間又幾好,對佢來講係一份好完美嘅工作。所以佢好想見得成呢份工。

但係,我點樣去說服個客去請一個有三年空窗期嘅candidate?呢個係一個難度,思前想後,決定做兩件事:寫一篇超過成千字的candidate summary;幫Ivy做三個reference check,再寫三份報告。然後,約個客同我見面,親自將所有資料交給客戶,再落足嘴頭去sell,終於客戶破例去面試Ivy。

三年空窗期,對久保來說,是一個挑戰。﹙GettyImages/VCG﹚

HR叫Ming,一位好媽媽,响公司做超過十年,Ming見完Ivy之後,可能因為大家都係女人有共鳴,佢決定推Ivy去final interview,見office manager。Ming係一個好HR,特登安排Ivy一星期之後先final interview,俾時間佢準備,因為,Ivy成個look需要大執。Ming細心地同我哋講office manager的喜好、會問麼問題、希望聽到咩答案等等,佢真係好想幫Ivy,唔止Ivy,連我自己都覺得好感動,我決定行多一步,幫Ivy大翻身!

記得當時有七日時間,首先同佢執好返resume先,等見工時office manager可以睇到一份令人眼前一亮嘅resume。之後幾日,因為Ivy要湊仔,所以我放工後都上Ivy屋企幫Ivy「補習」,同佢訓練面試技巧,我哋做咗大約二十次模擬面試,嘗試過各種不同面試會遇到的問題及情景,睇見Ivy由一開始嘅結結巴巴到後期有自信及應答自如,行動已經成功了大半!剩餘兩日,就幫Ivy轉新形象,陪佢去買見工衫同set個新髮型。執一執之後,我覺得Ivy一定會攞到個offer。

久保:「我哋做咗大約二十次模擬面試,嘗試過各種不同面試會遇到的問題及情景,睇見Ivy由一開始嘅結結巴巴到後期有自信及應答自如,行動已經成功了大半!」﹙GettyImages/VCG﹚

終於到咗面試當日,唔知點解自己對呢個case上心,投入咗感情,朝早請假去Ivy屋企幫佢照顧小朋友,而Ming亦係Ivy見office manager之前俾佢一段prep talk,最後,好人有好報,Ivy有Offer啦!

邊個話女人生完BB、離開job market一段時間會貶值?Not on my watch。自己做咗幾年獵頭,終於去到「嗰個位」:客戶會聽自己意見、可以影響到個客嘅hiring decision、而自己嘅行為又可以改變咗一個人嘅職場人生。而家已經唔需要好似以前咁上心,不過諗返起之前幫人「補習」同埋湊仔又真係幾開心嘅。

久保,雙碩士畢業後投身獵頭界,又稱「全職獵人」,多年來為客戶網羅人才、挖角,為員工找好老闆。喜歡和網友分享獵頭界奇聞異事,更喜歡出Post教人求職,幫人做一個由HR到老闆都覺得眼前一亮的Candidate。著作有:《獵頭公司奇情實錄》、《全職獵人 獵頭奇情.求職秘笈》

立即下載《香港01》,緊貼公務員職位空缺、勞工處筍工推介,了解CV、面試致勝技巧!
下載網址:
https://hk01.app.link/bkbJyY5t4O



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。