《毛俠2》陳逸寧做單親媽媽 唐貝詩:演道友被導演要求減足20磅

撰文:
最後更新日期:

2018年香港首部以保護動物為題材的電影《毛俠》推出續集《毛俠2》,今午(7日)舉行發布會,唐貝詩、陳逸寧、陳達仁、李亦喬都有份出席。

《毛俠2》今日舉辦電影發布會。(陳順禎 攝)

問到唐貝詩今次在《毛俠2》中的角色時,她回應:「我角色係一個道友,因為吸毒嘅關係,所以會流落街頭,喺呢個情況底下鍾意咗啲動物,佢哋會同自己建立咗感情,同埋要好瘦好瘦好瘦,導演都有同我講要減20磅,唔要有肌肉同健康瘦,要唔健康嘅瘦。我都有話吓,我咁辛苦健身要我冇晒啲肌肉,不過朋友同我講唔緊要,因為肌肉有肌肉記憶,3個月內做返運動就會返嚟架喇。其實我都唔會咁快減肥嘅,應該會喺部戲開拍前2個月慢慢開始減囉,冇理由4、5個月唔食嘢架嘛。」

唐貝詩自言超愛小動物,自己本身有領養2隻貓貓,一隻19歲、一隻20歲,大讚佢哋好叻,可惜現時已過世,開心可以陪足自己20年。(陳順禎 攝)

講到現時有較多幕前演出作品,唐貝詩回應:「啱啱做完舞台劇《戀上12星座》,其實都幾遺憾,原本上年4月公映,因為疫情關係一推再推,最終改為Facebook網上播,本來做5場變相少咗好多觀眾,加上大家睇時未必會專心,一齊食飯睇戲咁睇就覺得好可惜,希望有機會可以再做。」

唐貝詩講明會努力經營YouTube Channel。(陳順禎 攝)

事實上唐貝詩一直擁有個人YouTube Channel,近日發布了一條新片,但翻看影片清單發現上一次更新已是4年前,她笑言:「而家係想經營返YouTube,因為之前都忙拍戲、做戲,我真係好鍾意做戲,但而家工作量較少,我自己又好鍾意旅行,而家又冇得旅行所以就去咗長洲Glamping(豪華露營)囉,同埋多咗時間都想玩下剪片擺上YouTube。(條片你自己剪?)係啊自己剪架,我都係睇片學,而家啲software(軟件)好易用,iPad都剪到。(下條片會講咩?)會想去試下露營車,因為未試過,或者拍一啲食嘢嘅分享,早前都搞咗個生酮曲奇,都可以同大家分享下又可以講下創業。」

陳逸寧表示暫時未考慮會領養或養小動物,現時會想將時間擺在囝囝身上,又唔想因為咁而冷落到小動物。(陳順禎 攝)

至於上次在《毛俠》演漁農自然護理署政府部門人員的陳逸寧,今次再有份演出《毛俠2》,陳逸寧表示:「角色有唔同,上次做漁護署嗰邊,今次反而做返動保團體,暫時知道個角色係單親媽媽去咗做動保,詳細內容就未確定,未睇劇本。」而問到首次同唐貝詩合作有咩感受時,陳逸寧笑言:「雖然我哋係首次合作,但上次見面時就好似一見如故咁,交換晒電話,佢都有邀請我睇佢套舞台劇,嚟緊我都有套《二次人生》做譚耀文老婆,我都會叫Lydia(唐貝詩)去支持我架。」

點擊睇更多靚相:

+4
+4
+4


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。