香港山路錦標賽2025在今日（25日）舉行，在62.4公里的長距離，謝覺偉及張敏怡分別衛冕男子及女子冠軍。「阿歹」謝覺偉的優勢十分明顯，以6小時52分衝線，領先亞軍的譚子康超過22分鐘。
謝覺偉寓賽於操，視香港山路錦標賽及下月北海道佐呂間湖100公里超馬為訓練，迎接9月在西班牙舉行的山路越野跑世錦賽。他表示今場山路錦標賽的訓練效果不錯，跑完六十多公里仍不算太累，還有力跑多40公里。

香港山路錦標賽2025成績連結

下午近2時，謝覺偉神態自若地跑向終點大美督，步履輕快，臉帶微笑。他花了6小時52分，是唯一一位在7小時內跑完的參賽者。在終點拱門前，他興奮地舉起兩手衝線，但迅即調頭出去，在外面的迴旋處跑多兩個圈，在場人士都摸不着頭腦！

走了62.4公里兼攀升2890米，難道還跑不夠嗎？真的不夠。他看看手錶後說：「因為差少少，唔夠里數，咁就跑多少少。我自己執着啫。（差幾多？）好少啫，差80米啫，就跑埋去。」

跑完那兩個圈，謝覺偉與在場人士寒暄，接受祝賀。大家都知謝覺偉賽後喜歡喝啤酒，紛紛送上冰凍啤酒，很快地，他的跑袋已被一罐又一罐塞滿了。

這天的氣溫比前幾日清涼，而且天陰，沒有炎夏感覺，有利發揮，完成時間比目標快。謝覺偉說：「本來預計7個半鐘，但天氣唔錯。可能呢個星期taper（減量）休息得夠，力量都砰砰聲，但都唔敢用晒，因為下個月有場100K。當係一次練習。」

37歲的謝覺偉表示今場訓練成果不錯，達到教練村尾慎悅的指示。他說：「教練有講過話，跑完呢場要覺得輕鬆、仲可以跑多40K，咁就可以嘞。」

作為應屆100公里超馬世錦賽第八名，謝覺偉續說：「上次練完呢條路（香港山路錦標賽長距離賽道），我返去之後都要訓練，所以我慣咗。試過好多次嘞，所以60K其實好輕鬆。（返去要再練啲咩？）當好似今日咁樣跑完，要返去跑啲強度，可能200（米）快100（米）慢，要跑60隻。咁你話有咩可能跑唔到100K！」

今場香港錦標賽長距離在早上7時於大美督開賽，跑手先上八仙嶺。謝覺偉自稱較慢熱，開頭跟住另一位跑手陳自強上山，經過7至8公里路熱身後，他就開始帶頭，領放至終點，回到大美督。亞軍譚子康慢謝覺偉22分鐘多，花了7小時14分完成。

22分鐘的優勢很大嗎？謝覺偉覺得不夠。他說：「話晒係全職，話晒係體院成年人梯隊，一定要達到佢哋同自己要求咁先啱嘅。（呢個領先時間收唔收貨？）其實唔係快好多，快20分鐘，我覺得唔收貨。」這番話並非不尊重對手，而是對自己要求高。譚子康是兼職跑手，日間要上班，放工抽空才能訓練，相反謝覺偉全心全力練跑，所以他認為自己理應要跑得更好。

謝覺偉在2023年的香港山路錦標賽亦贏得長距離冠軍，完成兩連冠，繼續坐穩香港越野跑一哥之位。他說：「有好有唔好啦。要有其他衝擊先會有更大進步，同埋都希望有新一代接到力，永遠都係靠我咩？我都會退。」

退？聽到這個「退」字，記者大為緊張。謝覺偉說：「呢個社會始終好現實，有錢咪跑。（有冇計畫跑到幾時？）其實冇，真係跑到冇晒錢、跑到冇癮就唔跑。（而家仲有冇癮？）冇癮就唔跑啦。」

今場香港山路錦標賽被視為港隊出戰9月山路越野跑世錦賽的選拔賽，儘管田總未公布名單，但謝覺偉一早以跑好世錦賽為目標去制定今年的訓練計劃。在未來一星期，他會放假休息，晚上多約朋友食飯，到6月2日啟程到日本北海道集訓，會合教練。在6月29日，他會參加北海道佐呂間湖100公里超馬，寓賽於操，希望成績比去年更快；上一屆，他跑出6小時40分。

接着在7月，他會去西班牙試路，實地了解世錦賽的賽道，「個價錢好甘」。他跟住會再到日本，接受高原訓練，「始終個山賽（世錦賽）最高成2千5百幾米，有咗之前嘅經驗，如果冇高原訓練就去2千5百米高比賽，真係跑唔郁，連行都行唔郁，所以希望打好個底。」

為世錦賽那麼出心出錢出力，似乎謝覺偉有一個很有野心的目標。他嘆道：「唔好講出嚟嘞，始終我覺得太高期望。」他坦言，聽到村尾教練給他的世錦賽目標時「呆咗一呆」，他續說：「好似舊年場超馬世錦賽，佢話一定入到頭10名，仲話我係dark horse（黑馬）。我真係笑，忍唔住笑咗出嚟，跟住我又真係跑到出嚟。咁我唯有再信佢，又信自己囉。」

張敏怡衛冕女子長距離　初段與黃琪珍叮噹馬頭

上屆香港山路錦標賽長距離女子冠軍張敏怡亦順利衛冕，以8小時22分衝線，這個成績就算放在男子組都有第七名。張敏怡初段與上屆亞軍黃琪珍叮噹馬頭，一起入檢查站，十分接近。跑到後半程，張敏怡在前往荔枝窩的路上逐步拉開，最終帶到尾。黃琪珍近一年養傷為主，比賽不多，她慢張敏怡約12分鐘，以8小時34分衝線再次得第二，而甄智貽就以9小時15分得季軍。

張敏怡賽後看來不是太累，跟友人談笑風生。她最近征戰頻頻，4月底在日本贏得環富士山越野賽100英里女子冠軍，5月初去印尼贏得峇里BTR Ultra 100公里越野賽女子冠軍，到今場再封香港跑山「女一」。她笑言很幸運，剛剛從疲態恢復過來，她說：「如果係噚日比賽，我都差啲！峇里嗰場我都有特登留少少，返到香港之後我有成個星期冇跑，開始練返幾日，我都覺得好攰，冇乜信心，自己都驚今日恢復唔切，但去到今朝，好似就夠時間恢復到。」

張敏怡覺得自己今場發揮正常，順利在目標8個半小時內完成。她說：「其實好想田總起碼畀第二、第三名一齊去（世錦賽），因為咁樣我哋可以組到一隊人去跑。其實女子長距離水平好高，大家都跑得好快，我都有用啲……好似呢場，我都真係要盡力先至贏到。」

香港山路錦標賽2025長距離三甲

男子冠軍：謝覺偉（6小時52分25秒）

男子亞軍：譚子康（7小時14分39秒）

男子季軍：曾福祥（7小時17分15秒）

女子冠軍：張敏怡（8小時22分22秒）

女子亞軍：黃琪珍（8小時34分48秒）

女子季軍：甄智貽（9小時15分）