濁水漂流專訪|吳鎮宇再爆演技做染毒街友 「分明想攞獎啦」

撰文:沈洛嘉
出版:更新:

由《翠絲》導演李駿碩自編自導,吳鎮宇、謝君豪、李麗珍、蔡思韵、朱栢康等人主演的《濁水漂流》,改編自香港真人真事情片,講述一班於深水埗天橋底下聚居的露宿者被社會邊緣化,他們因為城市再發展而長期遭到掃蕩清場的故事,較早前吳鎮宇抽空接受《香港01》訪問,分享飾演火爆街友「輝哥」的心路歷程。

吳鎮宇飾演火爆街友「輝哥」。(影片擷圖)

接拍染毒街友為攞獎?

先問到吳鎮宇今次點解會接拍做染毒街友「輝哥」時,他笑言:「分明想攞獎啦下嘛,上次都有嘅,我成日都唔記得扒龍舟個套叫咩名,真係慘,由佢啦。(記者︰《逆流大叔》),《逆流大叔》增肥三部曲最後一部曲喇嘛,每年都同新導演合作,新導演有新嘅諗法,成本又唔會好多,唔多就唔會俾投資方有咁多掣肘,而呢個係個比較特別嘅題材,係改編真人真事,我諗呢個社會現象幾值得拎出嚟討論下。」

吳鎮宇直言:「香港呢個城市有咩令人反思嘅地方?確實係冇㗎。」(《濁水漂流》劇照)

影帝極投入 睇劇本已落淚

問到首次接到劇本時,哪場戲最令他印象深刻,想不到影帝都睇到投入而落淚。他憶述:「睇劇本喺船上面個場戲喊咗出嚟,個種傷感嚟自於演員同情呢個人,佢冇出過深水埗㗎大佬!搭個船發覺『嘩,咁多樓同人喎,滿到瀉,我就窮民區出嚟,佢又不斷填海,即係有咁多錢點解唔去…』覺得幾慘係踎喺船頭望另一個世界,呢場戲好觸動到自己情緒,都會『嗚嗚,好慘啊..』咁樣。加上維多利亞港冇規劃嘅,地產商話乜就乜,冇一個原則性,點解唔填埋過去啫?」

吳鎮宇直言深水埗咁多年都一樣,條條街都係咁,啲路自己都識行,要食豬油渣、豬潤麵、牛肉麵都要去呢到食。(電影公司提供)

「深水埗咁多年都冇變過,啲路我都識行」

由於電影中一班街友正正就是在深水埗,問及吳鎮宇對深水埗有甚麼特別回憶時,他指自己暑期工正是在深水埗南昌街一間酒樓返工,以前或現在要買雜物都要去深水埗,而且在此能夠搵到以前香港最接地氣的玩具和茶餐廳,直言深水埗咁多年都一樣,條條街都係咁,啲路自己都識行。

吳鎮宇直言現時香港愈來愈冇街坊感,正如你未必知隔籬屋姓甚名誰。(電影劇照)

及後他補充:「其實香港本來係點嘅樣呢?就係深水埗咁嘅樣,跟住就會尖沙咀咁。同埋如果你在深水埗行,行下行下就會及發現點解咁多名校、名車?因為已經到咗太子界限街,真係一條街㗎咋,個分界線唔係好明顯㗎咋。而本身喺深水埗嘅人夜晚係會出嚟喺公園抖涼,而家地攤都被趕絕,雖然有人喺度吸毒,但唔係販毒或製毒嘅主要地方,佢罪惡唔係好大,同埋個啲人係有人拎綜援,但都有人仍然靠緊自己雙手去搵錢,同埋政府真係冇乜點關注佢哋嘅需要,最好已經係俾個針筒收集箱佢哋叫佢哋唔好亂掉,所以喺個度拍感情會變得好濃。」

吳鎮宇訪問時再次提及清場事件都好有火。(電影劇照)

愈拍愈有真感情 提及清場事件仍有道火

早前官方釋出的花絮見到吳鎮宇事後再次提及清場事件仍然好嬲,問到他個人又如何看待該次事件,他今次同樣講講下都有火:「輝哥咪就係我爸媽個類人,未必係香港土生土長,但對於香港嘅建設出咗一分力,將自己最黃金嘅時間投放喺到,只不過係唔好彩冇運氣要住深水埗。佢(輝哥)嬲在個程序,我擺喺到嘅嘢唔執得㗎嘛,又掉晒又咁樣又唔道歉,家下係咪我好恰先,老老實實,X!我哋做錯嘢咪去坐監囉!我覺得換轉輝哥係自己親人都會有道火喺到。」及後吳鎮宇再補充深水埗的街坊感覺好強烈,而家跟囝囝講甚麼是街坊他都不知道,已經沒有了那種守望相助。

吳鎮宇表示完全唔明點解要將《濁水漂流》例為三級片。(電影公司提供)

「咁都三級就咪L拍喇!」

根據《電影檢查條例》,本片列為三級片,只准18歲或以上人士觀看,吳鎮宇聽畢即表示:「個啲係舊式粗口嚟,連你老X都冇㗎,都係托嘜托乜、把嘜把乜,咁都三級,有冇搞X錯啊,X!同埋個個階層嘅人就係咁樣講嘢,好似茶樓啲人、咕喱佬咁,唔係點講嘢呢?我唔覺得係個粗口嚟喎,粗咗喺邊呢?你搵一句係攻擊性鬧人?咁又要點樣表達呢啲人嘅身份呢?點解三級呢?超,如果係咁樣就咪L拍喇!」

吳鎮宇睇紀錄片,每次講到清場掃街又唔道歉都會火滾。(影片擷圖)

堅持有幾值得?

最後吳鎮宇對於因為堅持會失去唯一家園、同伴、甚至係幫自己的人,乍聽的確不值,但他認為:「覺得輝哥好值得發呢個脾氣,我嚟X咗香港做咗咁耐嘢,最後拎綜援瞓街,你搵架車一嘢掃晒撻地,咁我又可唔可以衝入你屋企拆爛你啲僭建物,話因為你僭建?你唔可以越過程序,咁唔使講法律講階級已經得,同第三世界國家比?你點話比人進步都冇用,一個國家、社會嘅進步係你照顧到幾多瞓街嘅人,唔係因為你照顧到幾多住山頂嘅人,山頂嘅人嘅錢係因為我哋瞓街嘅人而得嚟,佢老X佢自己有生活能力咩?唔覺得有喎,所以佢發呢個脾氣係好應該。」

+12

Credit:

Makeup:Kargo

片段提供:mm2 Studios Hong Kong

你可能感興趣