IT狗|神還原《英雄本色》經典場面 網民直言:睇到眼濕濕

撰文:沈洛嘉
出版:更新:

ViuTV節目《IT狗》由凌文龍、陳漢娜、岑珈其、陳湛文、余逸思、彭秀慧、MIRROR成員Lokman(楊樂文)、Frankie(陳瑞輝)、Stanley(邱士縉)主演等人,劇本播出一星期,不少觀眾都說膠得來好笑,觀眾仲勁好鍾意劇中瘋狂抽水明寸香港社會現象。

《IT狗》上周首播有好口碑,ViuTV今日終於發力在社交平台宣傳。(IG)

昨晚(19/1)播出最新一集引起大眾迴響,事關當中有一部分為致敬周潤發主演的《英雄本色》,男B(陳湛文 飾)辭職後扮Mark哥中槍,跛下跛下在停車場食飯盒,當然佢只係話腳痺,網民大讚鏡頭、服裝以及造型都跟得很足,相信一齊都歸功於簡君晉導演。

該集播出後,扮演Mark哥的陳湛文都有在個人Facebook發表「深宵感觸文」,他寫下「今晚ep8,我諗我哋全team都既緊張又期待呢一幕,雖說呢一幕有戲仿成份,但我同 凌文龍拍攝時其實好緊張,就正正因為佢係《英雄本色》、正正因為佢係狄龍、正正因為佢係周潤發,佢哋都係站於香港電影界一個好重要嘅位置。呢一幕係簡導由衷想向《英雄本色》致敬嘅一筆。能夠成為向經典致敬嘅一員,喺感動萬分之餘,伴隨住嘅係見到一種曙光……因為曾經有一段時間,紛紛眾說『青黃不接』,我唔敢講我哋接到/接咗棒,但我想講而家已有一班傻佬傻婆不繼咁開拓、探索緊一個未知嘅新世界。」p.s. 鳴謝太太身懷六甲時探班影嘅相。

點擊睇《IT狗》跟《英雄本色》對比圖:

+15
昨晚(19/1)就連馮德倫都有tag魯生,話想拍埋一份。(馮德倫IG)

早前劇情講到凌文龍希望得到彭秀慧的青睞,採取投其所好,hack入佢電話睇到眾多自拍中得一張合照,而當事人正是馮德倫,所以在彭秀慧上凌文龍公司前就貼滿馮德倫的照片,最終彭秀慧忍唔住問大家係咪好鍾意馮德倫,解開誤會後她講到:「佢係我大學同學嚟!」戲中她最鍾意的其實是姜濤!

而彭秀慧都有在個人Facebook澄清自己同馮德倫並唔係大學同學,她寫下:「唔好再問啦,我同馮先生唔係大學同學,我唔識佢㗎。不過呢張合照先係真嘅,大家有冇留意,馮先生(的名字)都有出現喺《29+1》電影?」

而馮德倫都有在個人IG表示:「下次唔好用我張相,直接叫我嚟拍啦!」更有tag埋ViuTV董事兼總經理魯庭暉添!

你可能感興趣