古惑仔開片|吳志雄曾窮到為$3000犯法:對唔住太太陪我出生入死

撰文:沈洛嘉
出版:更新:

《古惑仔.開片》繼續邀請到「大佬B」吳志雄,戲中他飾演洪興社銅鑼灣堂主,為陳浩南(鄭伊健 飾)的大佬,後來被𡃁坤(吳鎮宇 飾)殺全家,陳浩南為大佬B報仇後成功上位!不過現實中陳浩南原型正正就是吳志雄,而黎姿所演的細細粒便是吳志雄的太太,兩人一同出入入死,經歷過大大少少的打殺場面,由1981年末相愛至今,非常恩愛。

陳浩南同細細粒極經典。(劇照)

志雄哥同時間有8位女朋友 唯獨跟太太才經得起風浪

志雄哥跟太太恩愛超過40載(已結婚41年),不過志雄哥年輕時相當花弗,他毫無避諱:「識太太時已經有8條女,我好犀利㗎,雖然我矮細咋,樣子都OK㗎。」至於點解揀了太太?因為8個入面4個都好壞,都係想威同受保護。反而太太是南昌街五金舖的太子女,不過後生時都鍾意去陳惠敏大哥的場跳Disco,他直言:「我自己唔鍾意㗎,不過媾佢個陣日日喺門口等佢,玩完就送佢返屋企,落咗好多心機!」

更指自己從未試過拍拖,當年兩人從金鐘散步上山頂,一齊8年才生BB,兩人經歷了很多事,他坦言感激:「低潮高峰佢都喺我身邊,從來冇貪我嘢,買咁多樓同首飾俾佢,我冇錢個時佢賣樓賣首飾俾我還債,賣伯爵(PIAGET)手錶,賣埋杏花邨層樓,當時115萬買入而家升到2000多萬,俾着第個女人走晒啦!只有呢個女人同我經歷得起風浪。」

兩性關係中難免會有吵鬧,問到志雄哥維持恩愛的秘笈時,他繼續大讚太太:「試過頂頸但好少鬧交,佢好就我、知道我脾氣,唔使氹佢㗎!」不過在買禮物一事上就能看得出志雄哥有多寵妻,他分享到:「平時行街太太會話『爸爸呢個好靚呀』我都會答『咩呀,咁貴唔好買啦,走啦』不過第二日就會有㗎喇,佢鍾意嘅我都會買,係我應份還俾佢。之前就買咗隻玫瑰金地通拿,個時買廿六萬幾,有次佢話『嘩爸爸而家起到四十幾萬喇!』我就笑笑口叫佢賣咗佢啦。(當時認定太太後,身邊還有沒有其他女人?)都有好多是非嘅女人,但我就冇一個OK,拍戲個啲老婆全部都明。」

曾窮到搵好兄弟借錢但有條件。(陳順禎 攝)

窮到為了$3000去斬人

志雄哥提及當年因欠租,三更半夜跟老婆去搵個好到不得了的兄弟幫忙,希望借三千蚊救急,誰知對方竟然回應:「三千呀?你不如同我斬咗個兩兄弟先。」當時為了錢,身不由己的他答應對方要求,不過他坦承覺得十分對唔住老婆,他:「當時太太幫我睇水,睇下有冇差人,我就入去斬一斬。我覺得對老婆唔住,為咗三千蚊都要帶佢去斬人、做啲咁嘅嘢,太窮真係冇辦法。嗰時三千蚊等於而家三十萬,如果我做錯事做咗殺手咁點算?咁就一世,所以呢次之後就決定洗心革面。」

志雄哥為了家人高調退出江湖。(陳順禎 攝)

為了家庭決意退出江湖

再講到紅極一時的風雲人物選擇在93年高調退出江湖,志雄哥直言全因88年出世的細女最影響自己,而且知道太太多年來跟着自己都是過着刀光劍影的生活,始終為了家庭和女兒想放低江湖事。

言談之間聽得出志雄哥極錫細女,從小已經跟在身邊,就連講數、睇場都走唔甩,難免擔心她學壞,他指:「有得揀都唔會想俾啲細嘅行我哋條路,每個人都會有反叛時期,唔想佢反叛時行差踏錯,加上太太一直都知我兩把西瓜刀跟身,唔想再係兩把西瓜刀陪我而唔係老婆陪我瞓覺。」

後來認識黃霑後,霑叔得知志雄哥想退休於是邀請他上節目《花弗新世界》玩玩,不過志雄哥把心一橫:「我唔玩喇,我上去就講退休。」不過他都講到上完節目後有好多說話聽,直情講埋粗口鬧佢高調兼黐線,志雄哥則表示自己問心無愧。

志雄哥為了愛女改足三次紋身。(陳順禎 攝)

志雄哥身上不乏紋身,紋滿了家人的名字,當中就因為細女改過三次名,為了她將紋身一改再改,就連志雄哥當日都到:「我都叫佢唔好再改名,唔知再點遮好喇。」

+12

Credit:
渝川菜館Yu Chuan Club
灣仔廈門街7-17號百旺都中心