香港山路錦標賽2025在今日（25日）舉行，在34.3公里的短距離，「鷹鷹」曾進傑在三椏涌後發力上斜，以3分鐘優勢力壓羅樂賢及黃浩聰，贏得冠軍。至於林楚茹則贏得女子冠軍。

香港山路錦標賽2025成績連結

短距離賽在早上8時30分於大美督開始，競爭十分激烈，在頭20公里，曾進傑、羅樂賢、黃浩聰、魏賡、鄧敏華、劉梓浩、陳家強等難分難解，輪流帶頭，基本上是排住隊前進。曾進傑形容：「頭十幾廿K都係一齊，其實最後都唔知邊個頂得到。」

曾進傑亦享受與一班路跑跑手比賽，他說：「我都想路跑同跑山嘅一齊試試，其實係良性競爭。佢哋平路好快，可以帶快我哋，其實都好。」

離開可跑性高的沿海山徑，由荔枝窩上三椏涌，再登上大峒，曾進傑首先發力。「上三椏涌嗰陣，我上斜好少少，所以就郁。我都叫佢哋做嘢，好在頂得到。」曾進傑說：「發揮正常，平路應該唔夠路跑人，但都係焗住喺馬頭峰郁一郁，都係博一博。博到、頂到就可以。今日嘅節奏都唔錯。」

羅樂賢賽後也表示，在馬頭峰開始被曾進傑拋開，他說：「馬頭峰鬥得最激，基本上每個人都加（速），『鷹鷹』加得最快。」黃浩聰亦提到馬頭峰，他說：「全程都是我、『鷹鷹』、魏賡同Rex（羅樂賢）喺前面拍住跑，去到馬頭峰，魏賡開始跟唔上，可能崎嶇路多，又大上大落，跟住剩返我、『鷹鷹』同Rex，而『鷹鷹』又開始發力。」

曾進傑以3小時19分首先衝線，贏得冠軍。羅樂賢及黃浩聰慢約3分鐘，一起跑回大美督，年輕力壯的羅樂賢快一點，以3小時22分57秒衝線，黃浩聰則稍慢2秒得季軍。

香港山路錦標賽被視為9月世錦賽代表的選拔賽。以往，通常港隊會考慮長距離賽的前列跑手，較少選擇短距離的。曾進傑說：「希望今年（世錦賽）出多啲人，長（距離）一隊、短（距離）一隊就最理想。」羅樂賢也說：「我想去世錦！我唔知第二名有冇得去。」

黃浩聰說：「希望我哋短距離都可以出到一隊。我哋3個同後面有啲差距，而我哋3個嘅距離好近，加上Rex咁後生，畀個機會佢啦。」他透露會在7月到歐洲訓練兩個月，包括會去冰島，希望可以重拾佳態出戰9月的世錦賽。

林楚茹奪女子短距離冠軍

女子方面，林楚茹以4小時01分56秒得冠軍，黃麒旭慢約12分鐘，以4小時14分到終點得亞軍，季軍則屬於黃美欣。林楚茹表示今場跑得很辛苦，成績亦不如預期，她說：「本身打算跑4個鐘內，高標就3個半鐘，結果我連低標都達唔到。」她解釋，上周六剛從冰島回港，跑之前一晚睡得不好，「噚晚喺張床度眼光光」，影響了比賽發揮。

她表示渴望代表香港參加世錦賽，所以為了今場比賽改機票，「我本身係今日先喺冰島返嚟，之後我改機票嚟報呢個比賽。」

林楚茹說：「只要熬夜，我就會不停嘔，我今日成場比賽都不停嘔，嘔到返終點，連啱啱喺車路都有嘔，所以我覺得今日係辛苦嘅。好在只係34K，如果跑長距離，我應該返唔到嚟。」此外，她亦感謝天公造美，天氣陰涼，她說：「如果好像上星期咁大熱天，我應該會中暑。」

香港山路錦標賽2025短距離三甲

男子冠軍：曾進傑（3小時19分46秒）

男子亞軍：羅樂賢（3小時22分57秒）

男子季軍：黃浩聰（3小時22分59秒）

女子冠軍：林楚茹（4小時01分56秒）

女子亞軍：黃麒旭（4小時14分47秒）

女子季軍：黃美欣（4小時15分47秒）