王祖藍成績表曝光 被評欠謙遜冇禮貌
撰文：何志衡
出版：更新：
37歲嘅王祖藍最近有時間執屋，執到幾張陳年小學成績表，分別喺facebook、ig同微博開心分享，原來佢小學成績都算唔錯，老師對佢印象亦唔錯，但係去到小六，老師就覺得佢缺乏咗謙遜同禮貌，祖藍你改咗未呀？
王祖藍原來小學成績幾好。
祖藍搵到分別係小三、小四同小六嘅成績表公諸同好，小三嗰年全科平均分有九十幾分，上學期全班考第三，下學期全班第一；去到小四平均分稍為下跌得八十幾至九十，不過名次反而上升，上學期第二，下學期依然第一，論成績的確幾好！
但係睇下王祖藍嘅操行就令人皺眉頭，三年級各項紀律包括勤學、禮貌、誠實等唔係「良」就係「優」，老師評語係「活潑聰穎，熱心奉公，富領袖之才……如能慎言慎行更加可喜。」提醒佢要小心言行。
之不過去到四年級，王祖藍操行開始冇咁好，紀律同禮貌都變咗「常」，老師咁寫：「宜虛心學習，謙誠待人，可成良材。」唔通祖藍上堂有時會頂下嘴？
不過王祖藍讀到小六都未有改善，全部操行分都幾乎變成「常」，只係禮貌同誠實間中係「良」，老師更忍唔住咁寫：「活潑好學，學藝俱佳，惟欠謙遜及禮貌。」睇嚟老師有啲勞氣呀！
王祖藍亦貼咗自己小學時嘅照片，同而家都幾似樣喎。
王祖藍就貼文話：「想當年系列，竟然翻出小學的成績表，雖然成績還不錯，但是評語中老師都教我要有禮貌，可能是因為我身高原因，小時候眼睛必須長在頭頂，才能注視到別人的眼睛吧。」唔通生得矮就冇禮貌？