崔建邦首次拍劇做閒角 叫監製好友做哥哥：好感激佢！
除了馬神回歸TVB，今次《跳躍生命線》亦係平時專門做慣主持人嘅崔建邦(Amigo)人生第一套劇，佢固然開心之餘更回憶起以前六年前做PA(助理編導)嘅日子，「而家做演員當然舒服好多，就坐係度。以前做PA咩工作都要做，劇集所有崗位都要兼顧。」Amigo咁有感觸又難怪嘅，當年佢做PA嘅時候，日常生活幾乎無娛樂，日日都係開工收工，仲試過曾經要八達通嘅50蚊按金都要退返出嚟用。
2011年，可以話係崔建邦「最黑仔」嘅一年，涉毆打前女友鄺敏慧後，更在停牌期間揸「大膽車」，負面形象被無綫要求提前解約。幸好，當年仍是TVB總經理嘅陳志雲就俾Amigo一個機會重返無綫，但就要由低做起就係做PA，而負責的第一套劇，正正是今次《跳躍生命線》的監製方駿釗的作品《叛徒》，「我做PA第一套劇，佢就係導演。而我第一套劇佢就做監製，呢啲係緣分。」他透露當時負責劇集《叛徒》，跟方駿釗3個月，又要上山下海、爆破又追逐，好多回憶。Amigo笑言監製係故意搵自己，「好感激佢，人生路上有咁好嘅哥哥、伯樂，係好事嚟。」咁而家拍劇係咪好辛苦？Amigo就咁答，「又唔太覺，做PA咪仲辛苦。拍劇做演員幾好，又有櫈坐。好彩而家未試過由頭到尾再接廠，以前做PA就經常有，都算係適應了。」
做得主持人多嘅Amigo今次轉做演員，佢透露好多時候都諗下點樣打發下時間，「始終我又唔係拍開劇出身，一拍就咁多集，要啲時間諗下。但拍劇可以同一班朋友過時間，反而做主持做完就無，拍劇就日日見好開心。」首次拍劇唔洗講都知心情係好緊張，Amigo直言拍劇對佢超有難度，「好似做主持咁，要諗下對白要用咩聲調講，唔想一陣效果出嚟變咗主持人咁。」
見佢日日都咁充實，問到會唔會忽略咗愛情,佢笑言，「做人好多嘢都分得好好，拍劇同做主持控制時間，樣樣都要做下嘅。」問到係咪之後都唔會做節目司儀？Amigo就話，「重新去試下新嘅工作範疇，應該唔會有影響。」其後提到近年TVB嘅主持大多數都係「cable幫」嘅人，他指非常歡迎大家加入司儀行列，「我都想呢行百花齊放，唔會咁諗。」