【任噏亂評】當年四大天王都會錄　點解年代可以洗走廣播劇？

呢排打開收音機聽《18樓C座》，原來呢個商業電台製作的長壽廣播劇已經有成接近50年歷史，由1968年開始播到而家。我就不禁諗返，我對上一個有深刻印象嘅電台廣播劇究竟係邊套呢？我諗好多人都同我一樣，就係卓韻芝嘅《芝See菇Bi Family》，當時呢套真係晚晚都追住嚟聽。而家？可能好多後生仔都唔知道乜嘢係廣播劇。

其實係電視娛樂尚未普及嘅時間，電台嘅廣播劇就係唔少市民茶餘飯後嘅娛樂節目。香港廣播劇的雛型可以追溯返二次世界大戰後，香港電台會搵一啲話劇團或者舞台劇團製作廣播劇，之後麗的呼聲與商業電台逐漸加入電台行列，更加以廣播劇作為主要的競爭場地。去到70年代更加係廣播劇嘅高峰期，除咗多了以小說作為題目，更加會自製劇本，這些劇本甚至可以反過來發行成小說、變成電影或者電視劇，《小男人周記》就係一個好例子。甚至當時也有不少影星會間中參與製作，在90年代初，連四大天王都會加入其中，關淑怡、吳孟達、彭羚、李蕙敏、陳奕迅、楊千嬅等等個個響噹噹的名字，你也可以在電台聽到他們的聲音。不過原來去到這個時間，電台廣播劇已經是餘暉，踏入21世紀後，已經沒有人再熱衷廣播劇。

究竟點解會搞成咁？一來最大主因係電台都開始式微，試問你而家一天花在電台的時間會有多少？可能係一秒鐘都無，聽得最多電台嘅時候？就係搭的士或者小巴，司機大哥開住個收音機迫你聽。而家娛樂愈來愈多，只要一部手機就可以有過百種娛樂，已經再唔係好似之前咁晚晚返到屋企等收聽電台節目，你諗吓，而家連電視你都無幾可睇喇，就算睇都係會上網睇，咁你又會唔會上網重溫電台嘅節目？可能你連佢個app都無。愈來愈少人聽電台，你要知道製作一個廣播劇係需要花好多心思，可能要度橋，一定要錄音，要後期較聲，之後再剪接，但原來咁辛苦做出嚟已經無人聽，所以廣播劇已經變成一個高成本低收益嘅產業。

第二個原因是而家已經好難搵到一啲有號召力嘅明星去錄廣播劇，上文都講到當年係連四大天王都請得到，因為嗰陣電台依然係一個好好嘅宣傳平台。但係而家根本無乜人再聽電台，連頒獎禮都無人留意嘅時候，又點會留意電台嘅節目？更何況，而家啲星如果想要知名度，又或者想要錢，不如搭路返大陸仲實際，佢哋已經唔會諗到電台㗎喇。

咁而家係咪已經無晒廣播劇？咁又唔會，因為呢個始終都係電台嘅標籤，香港電台都依然keep住做廣播劇推出，商台嘅《歐陽志強》同《十八樓C座》都仲繼續緊。不過你又有無聽過？未必有，因為而家嘅廣播劇已經做唔返去以前嗰種回響，其實係一件好可惜嘅事，我都好想再次聽返《芝See菇Bi Family》呢種一出嚟就有晒回憶，未必要時事，未必要政治，聽落好舒服好想輕鬆嘅廣播劇，苦榮小苦妹，睇怕都只可以繼續沉澱係回憶當中。