吳若希變賽馬慈善機構總理 主席葉思貝稱：佢細細個跟住爸爸入場
自10月10號簽紙一刻，吳若希除咗係歌手、藝人、媽媽，再多左一個新身份 --- 何太。近一年來見到Jinny安胎之餘，不時現身馬場仲有份拉頭馬，好不威風。其實Jinny喺今年初仲同6位名媛，合組愛馬女士協會，榮升做吳總理啦﹗唔通真係嫁入豪門即時升呢？
呢日佢地齊集馬場進行專訪，為莎莎婦女銀袋日宣傳。雖然Jinny因病突然缺席，但另外6位成員包括葉思貝，胡珮君，區結玲，莊幸怡，徐藝載同莫嘉怡並無忘記呢位好姐妹。在座6位都係城中名媛，同歌手出身嘅Jinny看似兩個世界嘅人，到底點解會將7位拉埋一齊呢？葉思貝聽到呢個問題時，就哈哈大笑回應話：「其實Jinny細細個已經認識我先生，因為我先生踢業餘足球，Jinny成日去做啦啦隊，所以佢未入行我地已經認識。同埋Jinny細細個已經跟住爸爸成日入場睇馬，佢同馬一直好有緣。上年我地提起想成立呢個協會，咁啱佢又剛剛成為媽咪，好想做多d慈善工作，第一個舉手話想參與。」
由1月初正式成立至今，協會至今已經有超過180位成員，差不多每個月都有一次活動，例如探訪獨居長者、帶小朋友騎馬、免費剪髮活動等等。7位成員雖然各有頭銜，但問到究竟如何分工，答案居然係無：「邊個得閒就邊個做啦哈哈﹗」即使宜家Jinny住喺澳門，一樣無阻佢地嘅合作，甚至因利成便到澳門行善：「11月我地會去澳門賽馬會，帶孤兒院嘅小朋友去接觸馬仔同食lunch，因為Jinny住澳門，呢次活動就由佢全權負責，之前已經睇過場地，聯絡咗物資安排等等。」
大家一直有個迷思，可以做到馬主，有份拉頭馬都係上流社會人士，佢地即時話：「當然唔係啦我地好貼地架﹗外界成日覺得我地高高在上，只識得行街飲茶食飯，其實唔係架，我地會搭地鐵食大排檔，全部事我地都會落手落腳身體力行，每個活動都親自聯絡搬運，了解受助人士真正需要，送油送米而唔係超市禮卷，因為對佢地嚟講，超市賣嘅嘢都可能太貴啦。」佢地不約而同表示，唔會特別希望增加媒體曝光，幫到真正有需要嘅人先係最重要。