李佳芯卵巢附近生10cm囊腫　入院切除安樂晒：傷口仲有痛

李佳芯（Ali）早前在她的Instagram上載了一張身穿病人袍，戴手術帽和口罩的照片， 並留言表示：「aliaime最近身體有小毛病要維修，馬來西亞粉絲們，希望好快可以再見！休息過後再衝過。」當時她的粉絲都非常擔心，不過她昨日出席活動時就表示身體已經沒有大礙，大家可以放心喇。Ali仲話會趁今個月好好休息，養好身體，等到12月開拍新劇先再搏殺。

Ali透露有關的病情說：「係入醫院割腫瘤，之前已經check到喺卵巢附近生咗個大約10cm嘅囊腫，原本應該早啲割嘅，不過自己一直未有時間去做手術，就無理佢住，點知我喺新加坡返嚟香港之後就開始覺得痛，咁就即刻book時間入醫院做手術喇。醫生話九成係良性，但係都要等化驗結果，我要繼續覆診，傷口仲有痛，最緊要係知道割完無事，安樂晒。」她又多謝男友陳炳銓在她患病期間對她的照顧，出任她的御用柴可夫司機，真係好鬼sweet。

雖然Ali話新劇12月先開拍，她亦非停工休息，今日都有出席品牌活動，再提到之前的手術，Ali直言覺得這次開刀似分娩，因為手術後兩日不可以落床。至於可會影響以後生育，她說：「好彩無影響生育同荷爾蒙，唔會有事。」又呼籲女生要年年驗身並正視女性病。