【TVB節目巡禮】張秀文舊衫出戰險勝王君馨　：希望大家仲記得我

今晚（3日）為２０１８無綫節目巡禮，簡單來說就是吸客，吸客首要條件係要吸睛，所以小生花旦一定盛裝出席，性感是必勝條件之一，這個條件完美演繹者是張秀文，每次TVB有大騷，張秀文必定出招，而且必中，今日亦不例外，一條紫色晚裝，在她的ig一出，已經知道今晚主角又是她，但原來2018的節目，張秀文都冇份，冇份都盛裝出席，這些員工去邊度揾，她說：「因為好耐冇返嚟出活動喇，自己返咗去內地拍電影，覺得自己同香港冇咗connection,我覺得公司好多人唔記得咗我喇，我返咗嚟３個月，但係完全冇工開，好彩仲有得客串《學是學非》，仲好多謝網民繼續支持我.....所以今日出現，我想話俾大家聽，i'm back,，同埋今日2018哂冷，我係完全冇份，就算而家有工開，都可能下年年尾先見到我。」秀文BB在公司存在感好低喎，不過不用擔心，網民一直記得妳。

張秀文冠軍本來冇得輸，但轉頭王君馨出現，形勢稍為逆轉，集性感與型格於一身，之後亦有李施嬅，至於一向性感的高海寧，就以黑色西裝上陣，明顯是讓賽，當然衣著是用來突出自己優點，陳凱琳就懂得用長腿，這個做法亦是成功。雖然王君馨搶鏡，但張秀文心態一流，自己無劇、無節目都出席，所以紅地毯視后，應該是頒給她。