鄭俊弘何雁詩甜蜜生日相　豬隊友翟威廉：以為Self block係遮自己

今日TVB節目巡禮真係勁過台慶，出動全台總動員之餘，都代表有好多情侶、緋聞男女出現。其中一對就係何雁詩同鄭俊弘，佢哋雖然同場，但就離行離列，高調得嚟又低調。除此之外，昨晚女方開生日派對，阿Fred同埋其他藝人朋友在場。點知就發生咗蝦碌嘢，仲搞到翟威廉意外變成豬隊友。

事緣就係何雁詩喺ig post相，將鄭俊弘用心心圖案遮住，點知翟威廉就post咗原裝版本，之後無奈再砍掉重練，再擺返心心屏蔽版。翟威廉同何雁詩都笑住話其實只係溝通有問題，冇話邊個嬲邊個，翟威廉就話：「我就不嬲都好小心，所以post之前都問一問阿Step，佢就答的：『As you like la』、『Self block la』。」唔知大家睇到「Self block」呢句港式英文有咩解讀？翟威廉就解讀為：「block自己？做咩block自己？」於是佢就直接原裝正版擺上網。點知「Self block」係指遮走鄭俊弘，用英文溝通好似好易有誤會喎。

被指「豬隊友」，翟威廉就話：「無所謂喇，下次我會識做㗎喇。叫我豬隊友，OK吖。」至於何雁詩就話：「佢唔係豬隊友，佢係神隊長！只係雖然大家都知（與鄭俊弘拍拖），但都想自己平台低調少少，其實畀人影到都冇所謂嘅。」何雁詩仲話遮住阿Fred，係自己提出，鄭俊弘都同意無所謂。而男事主鄭俊弘後來得「豬隊友」事件，只係笑咗笑，簡單答：「下次溝通好啲喇，冇事喇。」