【降魔的番外篇】陳志健扮魔全日禁食禁去廁所：其實得5分鐘戲

網劇《降魔的番外篇—首部曲》將於今晚9點上架，話晒都係大台首次與劇集互相呼應嘅作品，兼且首部喺Big Big Channel播出嘅劇集，所以12集共90分鐘嘅《番外篇》拍攝時間長達3個多月，戲中一眾演員都大讚整個製作團隊極為有心，試過好幾次拍完之後覺得唔多滿意，於是就再補拍，務求將最好的一面呈現給觀眾，並希望藉《番外篇》令觀眾對無綫過往是是旦旦的製作改觀。
 

《番外篇》總監製李松年表示這網劇是現代版捉妖魔故事，內容圍繞人、神、魔，充滿科幻靈異元素，為求令魔更似魔，所以單係化妝都已經用上4、5個小時，而講到最重妝嗰位，一定係飾演噬靈魔嘅陳志健（Otto)同雪狐妖嘅許家傑（Jack），全劇出場時間加埋都唔知有無10分鐘嘅許家傑，每次上妝前都要先用酒精抹去皮膚上的油份，之後再帶上甚為有份量的雪石頭套，加上一副紅色隱形眼鏡，由於許家傑之前曾經做過矯視手術，所以長時間拍攝會令眼睛十分辛苦。「不過我都覺得好值得，特別係有咁專業的化妝人員，之後化完妝由公司出車，見到好多路人反應都係好驚，雖然化完妝大家更加唔認得我，但自己都好鍾意呢個角色。」
 

至於陳志健，他說監製原先是找他客串其中一個的士司機，到後來話有「勁啲嘅角色」給他。「我第一次試造型差不多用咗10個鐘！之後每次化妝都起碼4個鐘，因為我多數都係早戲，所以有次02就開始化妝。」陳志健嘅噬靈魔全身啡黑膚色加上一頭灰白頭髮，他說每次都要先噴色後黐毛、再裝上假牙同假指甲，同人造人無乜分別。「黐假牙之後完全食唔到嘢，仲有啲假甲，連廁所都去唔到，但你諗下我每次出場都係要打，一打就5個鐘以上，拍外景基本上都係35度以上，出汗之後又濕又癢，拍完一日瘦8磅，都可以話係入行以來最辛苦一次。」陳志健說每次在泥地上打完之後，又汗又泥，身上發出的臭味至今仍然難以忘記，不過能遇上有heart的團隊以及好玩的角色，他認為是十分值得的，並謂：「拍得辛苦，戲份可能連5分鐘都冇，所以唔鍾意真係好難做。」一句講晒：專業！