苑瓊丹夠傻大姐超多人追　全盛時期：有4、5個追我

苑瓊丹曾經講過：「我唔愁冇男朋友。」的而且確，憑住苑仔爽朗搞笑的性格，平易近人之餘，又真係幾吸引。苑仔有幾段眾所周知的戀情，除了已經結婚13年的玻璃大王黃乃揚，還有已離世的《殭屍先生》道長林正英都不是秘密。

既然苑仔之前講唔愁冇男友，就會想知道究竟有幾多人追過佢。佢最初笑笑口：「我老公聽到會唔會打我㗎！」不過都過咗去喇！苑仔都有透露：「同一時間，最多都有4、5個嘅。」咁多人追，其實都幾頭痕，如果冇乜興趣，苑仔會點樣曲線拒絕？點知佢聽到就話：「使乜打發佢走？冇興趣都會聽下電話嘅，愛嚟做士啤睇下有冇用呀嘛！」聽到都覺得好搞笑，咁咪即係收兵？苑仔就話：「係觀音兵呀，咁追我都要付出㗎嘛，如果拖唔到手仔，但又可以任勞任怨嘅話，梗係保持聯絡喇！」呢番說話，係咪講中晒現今大部分娘娘嘅心聲？

苑仔面對追求者應接不暇，有冇見過最瘋狂嘅追求者？佢就話：「有個男仔追咗我3日，佢就已經叫我唔好再做嘢，叫我直接嫁俾佢。我唔知佢呢啲係咪叫求婚，但佢咁樣好傻呀！」其實好多人都想知道點樣先可以多啲人追，苑仔最初聽完都笑咗：「無辦法喇！生得靚！」不過，她之後就教各位女士：「要多啲保養自己，你睇我幾風趣幾幽默！咁咪多啲人鍾意你囉！」雖然由苑仔把口講出嚟，好似好有喜感，都會問係咪真，但係佢所講正正就係做人有自信，就會散發一種美，開心啲人咪靚，啲人咪夠膽埋身囉！